Ko e hā ha ngaahi founga te tau lava ai ʻo fakaʻapaʻapaʻi ʻa e ngaahi ʻaho mālōlō ʻo e ngaahi tui fakalotu kehé?

Ko e taha ʻo ʻetau ngaahi tefitoʻi tuí ko hono fakaʻapaʻapaʻi ʻa e tui fakalotu ʻa e niʻihi kehé: “ ʻOku mau ʻekea ʻa e faingamālie ke hū ki he ʻOtua Māfimafí ʻo fakatatau ki he ngaahi tuʻutuʻuni ʻa homau konisēnisí ʻomautolu pē, pea tuku ki he kakai kotoa pē ʻa e faingamālie tatau, ʻo tukuange ke nau lotu, pē ʻe founga fēfē, pē ʻe fai ʻi fē, pe ko e hā te nau lotu ki aí” (Ngaahi Tefito ʻo e Tuí 1:11).

ʻOku faʻa kau ʻi he ngaahi ʻaho mālōlō fakalotú ha faʻahinga lotu. Pea hangē ko hono fakamanatua ʻe he kāingalotu hotau Siasí ʻa e Kilisimasí mo e Toetuʻú, ʻoku fakamanatua ʻe he kāingalotu ʻo e ngaahi tui fakalotu kehé ʻa e ngaahi ʻaho mālōlō ko ʻení pea mo ha ngaahi ʻaho mālōlō kehe ko e fakalāngilangiʻi ha ʻOtua ʻe taha pe ke fakamanatua ha meʻa ne hoko ʻi he hisitolia ʻenau tui fakalotú.

ʻE lava ke ke fakaʻapaʻapaʻi e ngaahi ʻaho mālōlō ʻa e ngaahi tui fakalotu kehé ʻaki haʻo ʻilo ʻa e ngaahi ʻaho ʻoku fakamanatu ai kinautolú. Te ke lava ʻo lautohi fekauʻaki mo e ngaahi ʻaho mālōlō fakalotu ʻe niʻihi mo talanoa mo ho ngaahi kaungāmeʻá fekauʻaki mo e founga ʻoku nau fakahaaʻi ai ʻenau ʻofa ki he ʻOtuá ʻi he ngaahi ʻaho mālōlō makehe ko ʻení. ʻOku ʻikai totonu ke ke fakakata ʻaki ʻenau tuí, ngaahi tala fakalotú, pe ngaahi tōʻongá. Fakaʻapaʻapaʻi ʻa e ngaahi fakaʻilonga ʻoku nau fakaʻaongaʻi ki hono fakamanatuá pea mo ʻenau mōihuú.

Kapau ʻoku fakaafeʻi koe ke ke kau, ʻeke ange ʻi he founga fakaʻapaʻapa ke nau fokotuʻu atu ʻa e founga te ke fakahoko totonu ai ʻení. Mahalo te nau fiefia pē ke ke mamata he meʻa ʻoku nau faí, pe te nau fokotuʻu atu ha ngaahi meʻa te ke lava ʻo kau ai pea mo ha ngaahi meʻa ʻoku totonu ke ke fakaʻehiʻehi mei ai. Hangē ko ʻení, kapau ko e taha ʻo ʻenau ngaahi angafai fakalotú ʻoku fepaki ia mo hoʻo ngaahi tui fakalotú, hangē ko e inu uainé, te ke lava pē ʻo talaange ʻi ha founga fakaʻapaʻapa, ʻikai, pe te ke inu vai pē ʻo ka lava. Ko e lahi ange ngaahi meʻa te mou muʻaki felotoi ki aí, ko e lahi ange ia ʻo e faingamālie ke taʻofi ai ha ngaahi meʻa fakamā.

Te ke lava ʻo fakahaaʻi hoʻo fakaʻapaʻapá ʻaki haʻo ako e founga ʻoku lotu ai ʻa e kakai kehé, pea te ke lava foki ʻo fakaafeʻi ʻa e kakaí ke nau fakamanatua e ngaahi ʻaho mālōlō hoʻo tui fakalotú mo koe koeʻuhí ke mahino ai kiate kinautolu ʻa e meʻa ʻokú ke tui ki aí.