Naʻe fakatokanga ʻa e ʻOtuá kia Noa fekauʻaki mo e lōmakí peá Ne fakahā ki he kau angatonú e founga ke nau hao aí. Naʻe fakahā ʻe he ʻOtuá ʻi ʻIsipite kia Siosefa ʻa e hongé mo e founga ke teuteu aí. Ko e ʻOtua tatau pē ia ʻoku folofola he ʻahó ni ʻo fakafou ʻi Heʻene kau palōfitá, ʻo foaki ʻa e faleʻi ko ia ʻokú ne ʻomi ʻa e nongá mo e malú ʻi he taimi ʻoku tau muimui ai ki aí.
ʻOku ou tuku ʻa e melinó kiate kimoutolu, ko ʻeku melinó ʻoku ou foaki kiate kimoutolu. … ʻOua naʻa mamahi homou lotó, pea ʻoua naʻa manavahē ia” (Sione 14:27). ʻI he lōngonoa toputapu he loki ʻi ʻolungá, ne hoko atu ʻa e Fakamoʻuí ʻo fakamatala ki Heʻene kau ʻAposetoló te nau fehangahangai mo e fakatangá mo e mamahí. Peá Ne toki folofola: “Kuó u tala ʻa e ngaahi meʻá ni kiate kimoutolu, koeʻuhí ke mou maʻu ʻa e fiemālié ʻiate au. Te mou maʻu ʻa e mamahí ʻi māmani; ka mou loto toʻa; kuó u ikuʻi ʻa māmani” (Sione 16:33).
ʻI Heʻene talateu ki he Tokāteline mo e Ngaahi Fuakavá, naʻe fakatokanga ai ʻa e ʻEikí ʻe “toʻo atu…ʻa e melinó mei māmani, pea ʻe maʻu ʻe he tēvoló ʻa e mālohi ki hono puleʻanga ʻoʻoná.” Ka naʻe toe talaʻofa pē foki ʻa e Fakamoʻuí, “ ʻE maʻu …ʻe he ʻEikí ʻa e mālohi ki hono kakai māʻoniʻoní, pea te ne pule ʻi honau lotolotongá” (T&F 1:35–36).
Fekauʻaki mo e ngaahi moveuveu ʻi he ngaahi ʻaho fakaʻosí, ʻoku talamai ʻe “vaivai ʻa e loto ʻo e tangatá” (T&F 45:26; 88:91). Ka ko e pōpoaki ʻo e ongoongoleleí ʻoku taha pē ʻa ia ko ha pōpoaki ʻo e melino—melino ki he māmaní mo e melino mei, he māmaní. ʻOku akoʻi moʻoni kitautolu ʻe he kupuʻi lea “ke mou fiefiá” ke ʻoua naʻa tuku ke vaivai hotau lotó.
Kuo mamata ʻa e kuonga fakakosipeli kotoa pē ʻi he haʻahaʻa, fakalilifu pea mo e ngaahi fie maʻu ʻo e taú. Pea kuo fekauʻi ʻe he ʻEikí ki he kuonga fakakosipeli kotoa pē ha kau palōfita ke fakatokanga ki he kau angahalá pea fakapapauʻi mo teuteuʻi ʻa e kau angatonú. ʻOku ʻikai kehe ia heni, ʻi he kuonga fakakosipeli maʻongoʻonga fakaʻosí ni. Kuo tau maʻu hokohoko ʻo ʻikai toe motu talu meia Siosefa Sāmita ha kau palōfita mo ha kau ʻaposetolo, kau tangata kikite mo ha kau tangata maʻu fakahā, ke tataki mo faleʻi kitautolu. ʻOku nau lea ʻaki e pōpoaki ʻo e melino mo e ʻamanaki lelei ʻa e Fakamoʻuí. ʻOku nau tokoni ke teuteu hotau ngaahi ʻapí mo hotau ngaahi lotó koeʻuhí ke tau lava ʻo maʻu ha ʻamanaki lelei kae ʻikai ko e manavahē; melino kae ʻikai ko e hohaʻa.
ʻOku ʻomi ʻe he ngaahi ʻotu laine ko ʻení ha fakakaukau ʻoku fakapapauʻi. Naʻa mo e taimi naʻe moveuveu lahi ai ʻa e māmaní pea fekuki ʻa e Kāingalotú mo e ngaahi fakatanga fakamamahí, kuo kei tuʻu maʻu pē ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi hono halangá. ʻOku tupu tokolahi hono kāingalotú, mafola mo e ngaahi siteikí pea mo e ngaahi temipalé he funga ʻo e māmaní, pea ʻoku kei hokohoko atu ai pē hono fakahinohino kitautolu ʻe he ʻEikí ʻo fakafou ʻi Heʻene kau tamaioʻeikí.
Tatau ai pē pe ko e fē ʻi he ngaahi faingataʻa ʻoku tuʻunuku mai kiate kitautolú, fakafoʻituitui pe fakalūkufua ko e kakaí, ʻoku totonu ke ongona ʻa e leʻo ʻo e ʻEikí ʻi hotau lotó: “ ʻOua ʻe manavahē ʻe fānau iiki, he ʻoku ʻaʻaku ʻa kimoutolu, pea kuó u ikunaʻi ʻa e māmaní, pea ʻoku mou kau kiate kinautolu kuo foaki ʻe heʻeku Tamaí kiate aú” (T&F 50:41).
Taupotu ki toʻomataʻú: ngaahi ʻīmisi ʻo Siosefa Sāmita mo e Temipale Ketilaní ʻi he angalelei ʻa e Laipeli Hisitōlia ʻo e Siasí.
Ngaahi ʻīmisi ʻo Pilikihami ʻIongí, kau paioniá, mo e Tohi ʻa Molomona Faka-Tenimaʻaké, mo e ngaahi taú ʻi he angalelei ʻa e Laipeli Hisitōlia ʻo e Siasí; tā ʻo e faʻitoká ʻi he angalelei ʻa Samantha Bridge