Ko e hā hono faikehekehe ʻo e ʻaukaí mo e taʻe-kaí?

Ko e meʻa pē ʻoku fai ʻe he taʻe-kaí ko e ʻai koe ke ke fiekaia. Ka ko e ʻaukai, ʻoku fai ʻi he taumuʻa pau pea kau fakataha mo e lotú, te ne ʻomi koe ke ke ofi ange ki he ʻOtuá mo ʻoatu ha ngaahi tāpuaki mo ha ivi fakalaumālie (vakai, ʻĪsaia 58:6–11).

Ko e taimi ʻoku tau ʻaukai aí, ʻoku ʻikai tatau ia mo e taʻe-kaí, ka ʻoku tau fili ke fai ʻeni koeʻuhí ko ha taumuʻa mahino mo fakalaumālie. Te ke lava ʻo ʻaukai ki ha tokoni ʻa e ʻEikí ke mahino kiate koe ʻa e ngaahi tefitoʻi moʻoni ʻo e ongoongoleleí pe ke fakahoko haʻo ngaahi fili fakafoʻituitui pe ngaahi meʻa ʻokú ke foua. Te ke toe lava foki ʻo ʻaukai ki ha ngaahi tāpuaki maʻá e kakaí, hangē ko ʻenau moʻuí pe ke nau tali ʻa e ongoongoleleí (vakai, ʻAlamā 6:6). Te ke lava foki ʻo toe ʻaukai ke fakahaaʻi hoʻo houngaʻia ki heʻetau Tamai Hēvaní.

Ko e lotú ko ha konga ia ʻe taha ʻokú ne ʻai ʻa e ʻaukaí ke kehe mei he taʻe-kaí. ʻOku totonu ke kamata mo fakaʻosi ʻaki ʻa e ʻaukaí ha lotu fakamātoato, pea ʻi he lolotonga ʻo e ʻaukaí kotoa, te ke lava ʻo fakalaulauloto mo lotu fekauʻaki mo e meʻa ʻokú ke ʻaukai ki aí. ʻE hanga ʻe he meʻá ni ʻo ʻai hoʻo fakakaukaú ke nofotaha ʻi he ʻuhinga ʻokú ke ʻaukai aí kae ʻikai ko hoʻo ongoʻi fiekaiá. “Pea te ke toki ui, pea ʻe tali ʻe [he ʻEikí]; te ke kalanga, pea te ne pehē, Ko au ʻeni ” (ʻĪsaia 58:9).

Ko e taimi ʻoku tau ʻaukai aí, ʻoku tau fai ia koeʻuhí ko ha taumuʻa fakalaumālie mo mahino.