Tāpuaki Lakanga Fakataulaʻeiki ʻo Linisií
“Pea ko kinautolu kotoa pē foki ʻoku maʻu ʻa e lakanga fakataulaʻeiki ko ʻení ʻoku nau maʻu au, ʻoku folofola ʻe he ʻEikí” (T&F 84:35).
Naʻe ongoʻi manavasiʻi ʻa Linisī ʻi heʻene vakavakai takai ʻi he loki he fale-mahakí. Naʻa ne ʻiloʻi ʻe vavé ni pē ha haʻu ha taha ke ʻave ia ki he loki tafá ke fakahoko hono faitoʻó. Naʻe tuʻu pē ʻa e Tangataʻeikí mo e Fineʻeikí ʻo ofi hono veʻe mohengá.
ʻI he ngaahi ʻaho siʻi ki muʻá, naʻe fakahoko ai ha efiafi fakafāmili ʻi ʻapi makehe ʻa e fāmili ʻo Linisií. Naʻe fai ʻe he Fineʻeikí ha lēsoni fekauʻaki mo e ngaahi tāpuaki ʻi he lakanga fakataulaʻeikí. Pea takitaha fakamatala leva ʻa e kau mēmipa taki taha ʻo e familí fekauʻaki mo ha taimi naʻe tāpuakiʻi ai ia ʻaki ʻa e mālohi ʻo e lakanga fakataulaʻeikí. Naʻe ongoʻi nonga pē ʻa Linisī mo fiefia ʻi heʻene fanongo ki heʻenau ngaahi fakamoʻoní. Naʻe fakamatala ai ʻe he Fineʻeikí ko e ongoʻi nongá ko hono talaange ia ʻe he Laumālie Māʻoniʻoní kia Linisī ko e meʻa ʻoku fanongo ki aí ʻoku moʻoni.
ʻI he hili hono fakahoko ʻa e lēsoní, ne ʻai leva ʻe he tuongaʻane lahi ʻo Linisií, ʻa ia naʻá ne maʻu ʻa e Lakanga Taulaʻeiki Faka-Melekisētekí, ha tulutā ʻo e lolo tapú ki hono ʻulú pea fai ʻa e lotu. Pea toki fai leva ʻe he Tangataʻeikí hano tāpuaki fakaʻofoʻofa moʻoni. Naʻá ne pehē ʻoku ʻafioʻi mo ʻofaʻi ia ʻe he Tamai Hēvaní. Naʻá ne pehē ʻe tāpuakiʻi ʻa e kau toketaá ʻi heʻenau ngāué pea ʻe ola lelei mo e tafá. Naʻá ne toe talaʻofa foki ʻe maʻu ʻe Linisī ha ongoʻi makehe ʻo ha fakafiemālie mo ha nonga ke ne fetongi ʻene manavasiʻí.
ʻI heʻene talitali ʻi he fale-mahakí, ne feinga ʻe Linisī ke toʻa, ka naʻe tafe māmālie hifo hono loʻimatá mei hono fofonga. Ne hū mai ha ongo tangata kuó na ʻosi teunga ngāue falemahaki ki hono lokí ʻo talaange kuo taimi ʻa e tafá. Naʻá na angaʻofa ʻi heʻena feinga ke fakafiefiaʻi iá, ka naʻe ʻikai ke mole ai ʻa e ilifia ʻa Linisií.
Naʻe fāʻofua ʻa Linisī ki he Fineʻeikí mo e Tangataʻeikí mei hono mohengá. Pea hanga leva ʻe ha taha ʻo e ongo tangatá ʻo fusiʻi hake ʻa e ʻā ʻo hono mohengá ke malu ʻi he lolotonga ʻena teke atu ia he loto holó. ʻI he taimi ne tafoki ai ʻa Linisī ke vakai pe ko e hā ʻokú ne faí, naʻá ne fakatokangaʻi ha foʻi mama siliva anga-maheni ʻi hono nimá. Ne fakafonu ai hono lotó ʻe ha ongoʻi fiefia mo nonga ʻi heʻene fakatokangaʻi ʻa e ngaahi mataʻi tohi FKT ʻi he foʻi mamá. Ne malimali ʻa Linisī ʻi he mahuʻi atu ʻene ilifiá. Naʻá ne ʻilo ʻe lelei ʻa e meʻa kotoa pē.
Tā fakatātaaʻi ʻe Adam Koford