ʻI he Ongoongó
Kamata ʻo e Ngaahi Fakaʻaliʻali Fakataʻú ʻaki ʻa Mesa
ʻOku fakalele ʻe he Siasí ʻi he taʻu kotoa pē ha fakaʻaliʻali lalahi ʻe nima ʻi he ʻIunaiteti Siteití. ʻOku ʻoatu heni ʻa e fakamatala ki he ngaahi fakaʻaliʻalí takitaha.
Fakaʻaliʻali ʻi Mesá
Ko e Fakaʻaliʻali ʻi Mesá, ‘Alesona, Sīsū ko e Kalaisí, ʻokú ne toe fakamatalaʻi ʻa e talanoa ʻo e ʻaloʻi ʻo Sīsū Kalaisí, ʻEne ngāué, ʻa ʻEne pekia taʻe-siokitá, mo ʻEne Toetuʻu fakaofó. ʻOku fakahoko ʻa e fakaʻaliʻalí ni mei he ʻaho 24 ʻo Māʻasí ki he ʻaho 3 ʻo ʻEpelelí. Vakai ki he www.easterpageant.org ka fie maʻu ha fakamatala lahi ange.
Fakaʻaliʻali ʻi Menitaí
ʻOku fetuiaki ʻa e fakaʻaliʻali ʻi Menitai, ʻIutā, ʻo e The Mormon Miracle [Fakaʻaliʻali Mana ʻo e Māmongá] mo e ngaahi talanoa ʻo hono toe Fakafoki mai ʻo e ongoongoleleí, fakamoʻoni ʻo e Tohi ʻa Molomoná pea mo e fononga ʻa e kau paionia faivelenga ki he Teleʻa Senipití. ʻOku lele ʻa e fakaʻaliʻalí ni mei he ʻaho 17 ki he ʻaho 26 ʻo Suné. Vakai ki he www.mormonmiracle.org ka fie maʻu ha fakamatala lahi ange.
Fakaʻaliʻali ʻi Nāvuú
ʻOku fakamanatua ʻe he Nauvoo, ‘Ilinoisi, Pageant {Fakaʻaliʻali ʻi Nāvuú}, A Tribute to Joseph Smith {Ko ha Fakaʻapaʻapa kia Siosefa Sāmitá], ʻa e ongoongolelei kuo fakafoki maí, misiona fakapalōfita ʻo Siosefa Sāmitá pea mo e tukufakaholo ʻo e kau fuofua Kāingalotu ʻo e Ngaahi ʻAho Kimui Ní ʻi Nāvuú. ʻOku fakahoko ʻa e fakaʻaliʻalí mei he ʻaho 6 ʻo Siulaí ki he ʻaho 31 ʻo Siulaí. Vakai ki he www.nauvoopageant.org ka fie maʻu ha fakamatala lahi ange.
Hill Cumorah Pageant [Fakaʻaliʻali ʻi he Moʻunga ko Komolá]
ʻOku toe fakamatalaʻi ʻe he Fakaʻaliʻali ʻi he Moʻunga ko Komolá, Niu ‘Ioke, ʻa ia ko e Fakamoʻoni ʻa ʻAmelika kia Kalaisí, ʻa e talanoa ʻo e Tohi ʻa Molomoná, kau ai ʻa e ngaahi faingataʻaʻia ʻo e fāmili ʻo Līhaí mo hono hakó, ʻa e ʻaʻahi ʻa Sīsu Kalaisi ki he Ongo ʻAmeliká, mo hono maʻu ʻe Siosefa Sāmita ʻa e ngaahi lauʻi peletí. ʻOku fakahoko ʻa e fakaʻaliʻalí mei he ʻaho 9 ʻo Siulaí ki he ʻaho 17. Vakai ki he www.hillcumorah.org ka fie maʻu ha fakamatala lahi ange.
Castle Valley Pageant [Fakaʻaliʻali he Teleʻa Kāsoló]
Ko e Fakaʻaliʻali he Teleʻa Kāsoló, ʻIutā, ko ha tulama fakahisitōlia lahi ia ʻokú ne fakatātaaʻi hono nofoʻi ʻo ha kiʻi kolo paionia ʻi Kāsolo Teila ʻi ʻIutā. ʻOku fakahoko ʻa e fakaʻaliʻalí mei he ʻaho 29 ʻo Siulaí ki he ʻaho 7 ʻo ʻAokosí. Ke maʻu ha fakamatala lahi ange, telefoni ki he 1-435-687-2403. ʻOku fakahoko fakahilitaʻu ʻa e Fakaʻaliʻali ʻi he Teleʻa Kāsoló ʻo fetongitongi mo e Clarkston Pageant [Fakaʻaliʻali ʻi Kalakesitoní] Martin Harris: The Man Who Knew [Māteni Hālisi: Ko e Tangata Naʻá Ne ʻIló], ʻi Kalakesitoni ʻi ʻIutā.
Mūsika mo e Ngaahi ʻAati Fakafonua Fie maʻu Ke Fakahū Maí
ʻOku lau uike pē pea aʻu ki he ʻaho ke ngata ai hono fakahū mai ʻe he kāingalotú ʻenau ngaahi fasi mo e ngaahi tulama faʻu ke fakakaukauʻi ke pulusi pe fakahoko ʻe he Siasí. ʻOku ngata hono fakahū mai ʻo e ngaahi meʻa ko ʻení ʻi he ʻaho 31 ʻo Māʻasi 2010.
ʻE fakaʻaongaʻi ʻa e ngaahi fasi ʻe filí ʻi he Fakaʻaliʻali Mūsika ʻa e Siasí, pea ko e ngaahi tulama mo e maau ʻe filí ʻe fakaʻaliʻali ia ʻi he Cultural Arts Submission Presentation [Polokalama ki he Ngaahi ʻAati Fakafonuá ʻe ʻOmí]. ʻOku faʻa fili ha ngaahi meʻa ʻe niʻihi ke pulusi ʻi he kahaʻúʻ i he Uepi saiti ʻa e Siasí pe ʻi he ngaahi makasini ʻa e Siasí. ʻOku kau ʻi he ngaahi meʻa fakamūsiká ha ngaahi hiva, ngaahi hiva ʻa e fānaú, ngaahi himi, ngaahi ʻanitema, ngaahi fokotuʻutuʻu makehe ʻo e himí, mo ha ngaahi fasi tokoniʻi ʻe he meʻaleá pea mo ha ngaahi meʻa kehe pē.
Ko e ngaahi ʻaati fakafonuá ʻoku meimei ke kau ai ʻa e ngaahi fakalea ki ha tulama, tulama fakaoli mo fakahiva. Kuo tali foki mo e ngaahi meʻa fekauʻaki mo e māú mo e ngaahi lea ʻoku mahuʻinga hono fakahokó.
Ko e ngaahi meʻa ʻe fakahū maí ʻoku totonu ke taau ke fakaʻaongaʻi ʻi he ngaahi ʻiuniti ʻo e Siasí, ke akoʻi ʻaki ʻa e ngaahi tefitoʻi moʻoni ʻo e ongoongoleleí ʻi ha ngaahi founga langaki moʻui, tonu fakatokāteline pea mo tonu ʻaupito kapau ʻoku fakahisitōlia. ʻOku tali lelei ʻa e ngaahi meʻa ʻe fakahū maí ʻi ha faʻahinga lea fakafonua pē.
Ke maʻu ha fakamatala lahi ange ʻi he fakahinohino ki he meʻa ʻe fakahū maí pea mo e ngaahi ʻaati fakafonuá, telefoni ki he 801-240-6492.