Pōpoaki ʻa e Kau Palesitenisī ʻUluakí
Loto-toʻa Moʻoní
Ko e taha ʻo e ngaahi taumuʻa ʻo e moʻui fakamatelié ke tau fakamoʻoniʻi ki he ʻOtuá te tau tauhi ʻEne ngaahi fekaú ʻi he taimi ʻe fie maʻu ai ha loto toʻá. Naʻa tau lavaʻi ʻa e sivi ko iá ʻi he maama fakalaumālié. Ka naʻe angatuʻu ha vahe tolu ʻe taha ʻo [kinautolu] naʻe ʻi he langí ki he fokotuʻu ke siviʻi kinautolu ʻi he moʻui fakamatelié he ʻe malava pē ke nau tō ai.
Ki muʻa pea toki fanauʻi kitautolú, naʻa tau ʻiloʻi fakatāutaha ʻa e ʻOtua ko e Tamaí mo Hono ʻAlo ko Sīsū Kalaisí. Naʻa tau lava ke mamata mo fanongo kiate Kinaua ʻi Heʻena akoʻi mo fakalotolahiʻi kitautolú. Ka ko ʻeni kuo fakapūlouʻi ʻaki ha veili ʻetau fakakaukaú mo ʻetau manatú. ʻOku maʻu faingamālie ai ʻa Sētane, ʻa e tamai ʻo e ngaahi loí, koeʻuhí he kuo pau ke ʻā hotau matá ʻo tau ʻiloʻi pe ko hai koā kitautolu ʻo fakafou ʻi he tuí, lolotonga iá ʻoku fakamoʻulaloaʻi ʻe hotau sinó kitautolu ki he ngaahi ʻahiʻahi fakakakanó pea mo e ngaahi vaivai fakatuʻasinó.
ʻOku tau maʻu ha ngaahi tokoni maʻongoʻonga ke ne fakalotolahiʻi kitautolu ʻi he moʻuí ni. Ko e maʻongoʻonga tahá ko e Fakalelei ʻa Sīsū Kalaisí. Tuʻunga ʻi he meʻa naʻá Ne fakahokó, ʻe lava ke fakamolemoleʻi ai e ngaahi angahalá ʻi he vai ʻo e papitaisó. Te tau lava ke fakafoʻou ʻa e tāpuaki ko iá ʻi he taimi ʻoku tau maʻu ai ʻa e sākalamēnití ʻi he tui pea ʻi ha loto fakatomala.
Ko e ngaahi meʻa-foaki fakalaumālié, ko ha tokoni ia ʻe taha. ʻOku tau maʻu ʻa e Laumālie ʻo Kalaisí ʻi hotau fāʻeleʻí. ʻOkú ne ʻomi kiate kitautolu ha mālohi ke tau ʻiloʻi ʻa e taimi ʻoku ʻi ai ha fili ke fai ʻe iku ki he moʻui taʻengatá. ʻOku hoko ʻa e ngaahi folofolá ko ha fakahinohino falalaʻanga ʻi he taimi ʻoku tau lau ai kinautolu mo hoko ai ʻa e Laumālie Māʻoniʻoní ko hotau takauá.
ʻOku fakaʻatā ʻe he Laumālie Māʻoniʻoní ke tau fakahā ʻetau fakamālō mo kole tokoni ʻi he lotú, ʻi he tuʻunga mahino mo falala ko ia ne tau maʻu mo ʻetau Tamai Hēvaní pea te tau toe maʻu ʻi haʻatau toe foki kiate Ia. ʻOku tokoni ʻa e fetuʻutaki ko ia mo e ʻOtuá ke tekeʻi atu ʻa e ilifiá mei hotau lotó he ʻokú ne langaki hake ʻa e tui mo e ʻofa ki he Tamai Hēvaní mo Sīsū Kalaisi.
ʻOku ʻomi kiate kitautolu ʻe he lakanga fakataulaʻeiki māʻoniʻoní ha loto toʻa ʻi heʻetau ngāué. ʻOku tau maʻu ʻi hono ngaahi ouaú ha mālohi ke ngāue maʻá e fānau ʻa e ʻOtuá pea mo matuʻuaki ʻa e mālohi ʻo e koví. Ko e taimi ʻokú Ne ui ai kitautolu ke tau ngāué, ʻoku tau maʻu ʻa e talaʻofa ko ʻení: “Pea ʻilonga ia ʻe tali ʻa kimoutolú, te u ʻi ai foki mo au, he te u muʻomuʻa ʻi homou ʻaó. Te u ʻi homou nima toʻomataʻú pea ʻi homou toʻohemá, pea ʻe ʻi homou lotó ʻa hoku Laumālié, pea ʻe takatakai ʻa kimoutolu ʻe heʻeku kau ʻāngeló, ke poupouʻi hake ʻa kimoutolu” (T&F 84:88).
Naʻe maʻu ʻe he Palōfita ko Siosefa Sāmitá ha ʻuhinga ʻi heʻene ngāué ke ilifia. Ka naʻe foaki kiate ia ʻe he ʻOtuá ha loto toʻa ʻaki ʻa e sīpinga mahino ko ʻeni ʻa e ʻEikí:
“Pea kapau ʻe lī koe ki he luó, pe ki he nima ʻo e kau fakapoó, pea fakamaaumatea koe; kapau ʻe lī koe ki he loto moaná; kapau ʻe feinga ʻa e hou ʻo e peaú ke fakaʻauha koe; kapau ʻe hoko ʻa e ngaahi matangi fakailifiá ko ho fili; kapau ʻe fakatahataha ʻe he langí ʻa e ngaahi ʻao ʻuliʻulí, pea fakatahataha ʻa e ngaahi ʻelemēnití kotoa pē ke fakaʻefiʻefi ʻa e halá; pea ko e meʻa tēpuú, kapau ʻe fakamanga mai ʻa e ngutu ʻo helí kiate koe, ke ke ʻiloʻi, ʻe hoku foha, ʻe foaki ʻe he ngaahi meʻá ni kotoa pē ʻa e potó kiate koe, pea ʻe hoko ia ʻo ʻaonga kiate koe.
“Naʻe ʻalu hifo ʻa e Foha ʻo e Tangatá ʻo māʻulalo ange ʻiate kinautolu kotoa pē. ʻOkú ke lahi ange koe ʻiate ia?” (T&F 122:7–8).
Kuo hulu atu ʻa e meʻa kuo foaki mai ʻe he ʻOtuá ke tokoni ʻi hono tekeʻi ʻo e manavaheé mo ne ʻomi ha loto toʻa kiate kitautolu, ʻo tatau ai pē pe ko e hā te tau fehangahangai mo ia ʻi he moʻui ko ʻení. ʻI heʻetau kole ʻa ʻEne tokoní, te Ne lava ʻo ʻohake kitautolu ki he moʻui taʻengata ko ia ʻoku tau fekumi ki aí.
Ko e Tohi ʻa Nīfai ʻi he Ngaahi Peleti Koulá, tā ʻe Paul Mann; tā fakatātaaʻi ʻe Matt Smith