Kae ʻOua ke Tau Toe Feʻiloaki
Fakakaukau loto Atu Ki he Tuʻunga Fakaetamaí
Naʻe ʻikai ko ha meʻa foʻou ʻete sio ki he ongo meʻa heka pasikalá, ka ʻi he Sāpate ko ʻení, naʻe fakamanatu ʻe hona ʻīmisí kiate au ʻa e kuo hilí mo ne ʻomi ha loto falala ki he kahaʻú.
Ko e ʻaho Sāpate, pea naʻá ku kau mo hoku fāmilí ʻi he ouau fakatapui ʻo ha falelotu naʻe toki fakafoʻou ʻi homau feituʻú. ʻI he toe ʻo ha ngaahi miniti siʻi pea kamata ʻa e houalotu sākalamēnití, kuo kole mai ʻa e palesiteni fakasiteikí ke u lele meʻalele ki homau fale fakauōtí, ʻoku kilomita ʻe tolu hono mamaʻó, ke ʻomi ha meʻa naʻá ne fie maʻu. Naʻe feʻunga pē ʻa e taimí ke u aʻu ki ai mo foki mai. Ka ʻi he lolotonga ʻeku fakahoko ʻa e kiʻi fekau faingofua ko iá, ne hoko kiate au ha meʻa naʻe ongo fakalaumālie kiate au—ko hano fakamanatuʻi lelei mai ʻo e meʻa ʻoku mahuʻingá.
ʻI he toe siʻi pē peá u aʻu mai ki he fakatahá, naʻá ku fakatokangaʻi atu ʻi muʻa ʻiate au ha pasikala ʻe ua, ko e taha naʻe lahi pea ko e tahá naʻe kiʻi siʻisiʻi hifo, naʻá na fakatou ʻaka mālohi. Naʻá ku ʻiloʻi ʻa e ongo heka pasikalá he taimi pē ko iá. Ko ha ongo meʻa ʻeni naʻá ku ʻiloʻi lelei, ko ha tangata lelei mei hoku uōtí mo hono foha kei siʻí. Ko ʻena ʻaka ki he lotú—ʻo hangē ko ia ʻokú na fai he Sāpate kotoa peé.
ʻI heʻeku siofi kinauá, naʻe haʻu ki heʻeku fakakaukaú ha ʻīmisi ʻo e kahaʻú, ʻi he taimi ʻe manatuʻi ai ʻe he kiʻi tamasiʻí—pea mo ʻene tamaí—ʻa ʻena ngaahi heka pasikalá. Naʻá ku fakakaukau ai, “Ko ha sīpinga lelei moʻoni kuo tā ʻe he tamaí ni pea ko ha ivi tuʻuloa ia ʻokú ne maʻu ki he foha mahuʻinga kuo foaki ange ki ai ʻe he ʻOtuá.” Naʻá ku pehē, “Ko e tamasiʻi ko ʻení, ʻe tupu hake ʻo ne mataʻikoloaʻaki ʻa e meʻa ne ne fouá, pea mahalo te ne toe fai ʻa e meʻa tatau ʻi he taimi ʻe hoko ai ko ha tamai.”
ʻI heʻeku aʻu atu kiate kinauá, naʻá ku manatu ki heʻeku kei siʻí pea mo ʻeku tangataʻeikí, he naʻá ne faʻa fakaheka au ʻi he kau ʻo ʻene pasikalá. Ko e faʻahinga feohi vāofi ʻoku maʻu mei he faʻahinga meʻa peheé ko ha faingamālie ia ke maʻu pea fakalata ke te manatuʻi.
Ko e taimi naʻá ku aʻu ai ki he fale lotú, naʻá ku fakafeʻiloaki ki he ongo heka pasikalá ʻaki haʻaku malimali pea naʻá na fai mai ʻa e meʻa tatau pē ʻi heʻena fakahaaʻi fakalongolongo ʻena fiefia ke maʻu ʻa e lotú. ʻI he fakataha lakanga fakataulaʻeiki he hoʻatā ko iá, naʻá ku maʻu ai ha faingamālie ke fakahā ki he tangatá ni ʻene ongo kiate au ʻa e ʻīmisi angatonu ʻo e tuʻunga fakaetamai ne u mamata aí. Naʻe malama hono fofongá, pea mahalo naʻe ʻohovale he ko e meʻa naʻá ku fakamatalaʻi angé ko ha meʻa anga-maheni pē ia kiate ia.
ʻI hotau tuʻunga ko e Kāingalotu ʻo e Ngaahi ʻAho Kimui Ní, ʻoku tau monūʻia ke mamata ʻi ha ʻīmisi ʻo ha ngaahi tamai tokolahi hangē ko ʻení ʻoku nau paotoloaki ʻa e tuʻunga uelofea fakalaumālie mo fakaeloto ʻo ʻenau fānaú. Pea ʻi hono tāpuakiʻi ʻaki e fānaú ha mātuʻa peheé, te tau lava ai ʻo ongoʻi houngaʻia ʻi loto ʻi heʻenau ngaahi sīpingá mo ʻenau ngaahi feilaulau kāfakafá.
Faitaaʻi ʻe Ruth Sipus