Meʻatokoni ki he Toenga ʻo e Uiké
Maliela Tōlisi Mesa, Seni Hōsei, Kosita Lika
ʻI he ofi ʻa e tānaki tuʻunga ʻa e ako māʻolungá, ne u nofo ʻamanaki mo hoku ngaahi kaungāmeʻá ki he hulohula ʻa e kau ʻosí. Ka ʻi he taimi naʻe fakahā ai ʻe homau ʻapi akó ʻa e ʻaho ʻo e hulohulá, naʻá ku loto mamahi ke ʻilo ʻe fakahoko ia ʻi ha ʻaho Sāpate.
Ne talamai ʻe ha taha ʻo hoku ngaahi kaungāmeʻá, “Maliela, ʻoku tuʻo taha pē ʻene hoko ʻa e meʻá ni ʻi heʻete moʻuí! ʻOku totonu pē ke ke ʻalu. ʻOsi ko iá he ʻikai ke ke toe liʻaki ʻa e lotú. Ka ko e tuʻo taha pē ko ʻení, ʻoku totonu ke ke liʻaki lotu ka ke ʻalu ki he hulohulá.”
Naʻá ku fakamatalaʻi ange ʻoku ʻikai ko e liʻaki pē ʻo e lotú—ka ʻoku fekauʻaki ia mo hono tukuange ʻo e ʻaho ʻe taha ki he ʻEikí. Ka ʻi heʻeku fakakaukau ki he meʻa naʻá ne talamaí, naʻá ku fifili leva, “ ʻE fuʻu kovi fēfē kapau he ʻikai ke u tauhi ʻa e Sāpaté, ko e tuʻo taha pē?” He ko hono moʻoní, ko ʻene ʻosi ʻení, te mau māvahevahe leva mo hoku ngaahi kaungāmeʻá, pea ne mau nofo ʻamanaki mai ki he meʻa ko ʻeni ʻo e taʻú. ʻE ʻomi ʻe he hulohulá hamau faingamālie ke mau fakafiefia fakaʻosi fakataha ai.
Pea ʻi heʻeku fakakaukau ki he meʻa ke u faí, naʻá ku manatuʻi naʻe akoʻi au heʻeku tangataʻeikí ko e ʻaho Sāpaté ko ha “meʻatokoni” ia ki he toenga ʻo e uiké. ʻOku totonu nai ke u liʻaki ʻa e ngaahi tāpuaki fakalaumālie mo fakatuʻasino ʻoku talaʻofa ʻe he ʻEikí maʻá e kau talangofuá? Naʻá ku fuatautau leva ʻeku ngaahi meʻa ʻe faí, peá u ʻiloʻi ʻeku filí.
Naʻe ʻikai mahino ia ki hoku ngaahi kaungāmeʻá ʻi heʻeku talaange he ʻikai ke u ʻalú. ʻI he ngaahi uike hono hokó, naʻá ku ongoʻi taʻefiemālie ʻi he taimi kotoa pē naʻa nau talanoa ai fekauʻaki mo e hulohulá, ka naʻá ku ʻilo naʻe tonu pē ʻeku filí.
ʻI he ofi mai ʻa e hulohulá, ne hoko ha meʻa taʻe-ʻamanekina. Fakafokifā pē kuo fakakaukau ʻa e ʻapiakó ia ke liliu ʻa e ʻahó. Naʻe ʻikai ke toe fai ia he efiafi Sāpaté, ka ʻe fakahoko ia ʻi ha efiafi Tokonaki! Naʻá ku mātuʻaki fiefia ke u ʻalu ʻo maʻu ha taimi fakafiefia mo hoku ngaahi kaungāmeʻá. Ko e meʻa naʻá ne ʻai ke u fiefia lahi aí ko ʻeku ʻilo ko ia naʻá ku tauhi ʻeku tukupā ke talangofua ki he ʻEikí.
ʻOku ou fakamālō ʻi he lava ke u ʻalu ki he hulohulá, ka naʻá ku fakatokangaʻi ʻoku ʻikai ke tāpuakiʻi maʻu ai pē kitautolu ʻi he foungá ni. ʻOku fie maʻu kitautolu he taimi ʻe niʻihi ke tau fakahoko ha ngaahi feilaulau lalahi maʻá e ongoongolelei ʻo Sīsū Kalaisí. Ka naʻá ku ʻilo he meʻá ni, pea kuó u ʻiloʻi ʻeni, ʻoku tāpuakiʻi maʻu pē ʻe he Tamai Hēvani ʻofá kitautolu ʻi ha faʻahinga founga kehekehe ʻi he taimi ʻoku tau talangofua aí.
ʻOku ʻomi kiate au ʻe hono fokotuʻu ko ʻeni ha sīpinga talangofua ʻi heʻeku kei ʻi he ako māʻolungá ha ngaahi tāpuaki maʻongoʻonga ʻi hoku tuʻunga ko e tāutaha kei talavoú. ʻOku femoʻuekina ʻeni hoku taimí ʻi he ngaahi ngāue fakaakó, ngaahi ngāue kuo pau ke faí, pea mo e ngaahi ʻekitivitī fakafiefiá, ka ʻoku ou ʻilo ʻoku ʻi ai haku faingamālie ke mālōlō mei he ngaahi ngāue ko iá ʻi he uike kotoa pē ʻaki haʻaku tukuange taha ʻa e Sāpaté maʻá e ʻEikí.
Naʻe tonu pē ʻeku tangataʻeikí: Ko e Sāpaté ko ha maʻuʻanga tokoni lelei ia ʻo e meʻatokoni fakalaumālié. ʻE hoko maʻu pē hono tauhi ʻo e Sāpaté ko ha meʻa fika ʻuluaki kiate au koeʻuhí ke u lava ʻo fakafoʻou ʻeku ngaahi fuakavá, toe fakafonu ʻeku tānakiʻanga ivi fakalaumālié, pea mo fakafoʻou ʻeku fakakaukaú ki he uike hoko maí.
Ne talamai ʻe ha taha ʻo hoku ngaahi kaungāmeʻá, “Ka ko e tuʻo taha pē ʻeni, ʻoku totonu ke ke liʻaki lotu ka ke ʻalu ki he hulohulá.”