ʻIloʻi ʻo e Maama ʻo e Ongoongoleleí

Fai ʻe Yulia Phares

He ʻikai ke u pehē naʻe taʻe ʻi ai haʻaku ngaahi taumuʻa ki muʻa peá u toki papitaiso ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ka te u lava ke pehē naʻe ʻikai ha taumuʻa mahino ki heʻeku moʻuí. Naʻá ku faʻa ongoʻi he taimi ʻe niʻihi ʻo hangē ʻoku ou fononga ʻi he fakapoʻulí, ʻo ʻikai ʻiloʻi moʻoni ʻa e feituʻu ke u ʻalu ki aí.

Pea hangē ko ha kau taʻu 19 tokolahi ʻi Seni Pitasipeeki ʻi Lūsiá, naʻá ku fakaʻamu ke u mali ʻi ha ʻaho, ʻi ai haʻaku fānau mo nofo fiefia ai pē ʻo lauikuonga. Ka, he ʻikai ke u pehē naʻá ku ʻiloʻi moʻoni e founga ke lavaʻi ai ʻa e taumuʻa ko ʻení—tautautefito ki he konga fekauʻaki mo e nofo fiefia ʻo lauikuongá.

Ka naʻe ʻafioʻi ʻe he Tamai Hēvaní. Naʻá Ne tomuʻa ʻafioʻi ki muʻa peá u toki lava ʻo maʻu ʻa e fiefiá, ʻoku fie maʻu ke u ʻuluaki ʻai Ia mo Hono ʻAló ki he uho ʻo ʻeku moʻuí. Naʻá ku kamata ako e founga ke fakahoko ai ʻení ʻi ha taimi nounou kimuʻa pea hoko hoku taʻu 20 ʻi hono kamata akoʻi hoku fāmilí ʻe he ongo faifekaú fekauʻaki mo e founga ke maʻu ai ʻa e fiefiá tuʻunga ʻi hono moʻui ʻaki ʻa e ngaahi fekaú.

Hili ʻemau talanoa mo e ongo faifekaú, naʻe ʻikai fuoloa kuó u ʻilo ʻa e meʻa ke faí. Naʻá ku lotu mo ʻiloʻi kapau ʻoku ou fie aʻusia ʻa e ngaahi taumuʻa ʻo ʻeku moʻuí, naʻe fie maʻu ke u papitaiso ko ha mēmipa ʻo e Siasi ʻo Sīsū Kalaisí.

Hili hoku papitaisó, ne motuhi au ʻe ha niʻihi hoku ngaahi kaungāmeʻá mo e kau mēmipa ko ē hoku fāmilí naʻe ʻikai mahino kiate kinautolu ʻa e ʻuhinga ʻoku fuʻu mahuʻinga ai kiate au hono fai ʻo e fili ko ʻeni ke u muimui ʻi he palani ʻa e Tamai Hēvaní. Ka neongo ʻeni, naʻá ku fiefia pē. Naʻá ku ʻiloʻi naʻá Ne fakafiemālieʻi au ʻaki ʻEne tuku ke u foua ʻa e ngaahi faingataʻá ni ʻi he nongá.

Ko e taimi ne hoko ai hoku taʻu 21, naʻá ku maʻu ha holi lahi ke u fakamoʻoniʻi ʻa e moʻoni ʻo e ongoongoleleí mo vahevahe mo e niʻihi kehé ʻa e founga ne hanga ai ʻe heʻete tukupā ke moʻui ʻaki ʻa e ngaahi fekaú ʻo liliu ʻeku moʻuí, ko ia ne u hoko leva ko ha faifekau. Naʻá ku ongoʻi fiefia ke vahevahe mo e kakaí ʻa e meʻa ne hoko ki heʻeku moʻuí ʻo kamata mei he taimi naʻá ku pehē ai ke u fakamuʻomuʻa ʻa e ongoongoleleí.

Kuo fonu ʻeku moʻuí ʻi he ngaahi tāpuakí talu mei he taimi ko iá. ʻI he taʻu ʻe valu kuo hilí naʻá ku lava ai ʻo hū ʻi he temipalé mo aʻusia ʻeku taumuʻa ʻo e malí. Neongo ia, naʻe ʻikai ngata pē ʻi heʻeku malí, ka naʻe fakamaʻu au mo hoku husepānití ki ʻitāniti.

ʻI he ngaahi taʻu siʻi kuo maliu atú, ne toe fakahoko ai foki mo ʻeku taumuʻa ke hoko ko ha faʻē. Kuo tāpuekina au ʻaki ha fānau tangata fakaʻofoʻofa ʻe toko tolu.

Naʻá ku maʻu mo hoku fāmilí ʻi ha taimi siʻi mei heni ha faingamālie ke ʻaʻahi ki ha ʻoupenihausi ʻo ha temipale. ʻI heʻemau fononga takai ʻi he loto temipalé, naʻe tafoki mai ʻema tamasiʻi taʻu faá kiate au ʻo ne pehē mai, “Mami, koeʻuhí ko hoʻo mali mo Teti ʻi he temipalé, ʻe taʻengata hotau fāmilí.”

ʻOku ou ongoʻi tāpuekina mo loto fakatōkilalo ʻi heʻeku fakakaukau ki he taʻu ʻe hongofulu fakamuimui ʻo ʻeku moʻuí. ʻOku ou hanga atu ʻeni ke aʻusia ʻeku taumuʻa ke “fiefia ʻo lauikuongá,” pea fakafetaʻi muʻa ʻi heʻeku fakatafoki ʻeku moʻuí ki heʻeku Tamai Hēvaní pea mo Sīsū Kalaisí. Kapau te u ʻai maʻu pē Kinaua ko e uho ʻo ʻeku moʻuí, ʻoku ou ʻiloʻi te u lava ʻo aʻusia ʻeku ngaahi taumuʻá. ʻOku ou ʻiloʻi ʻoku ʻofa mo fie tokoni mai ʻa e Tamai Hēvaní mo e Fakamoʻuí kiate kitautolu.