ʻOkú ke Tui ki he Tohi ʻa Molomoná?
Sonola Olatapo Solomone, Lākosi, Naisīlia
Fakafuofua ki he taimi naʻá ku kau ai ki he Siasí, ne mole ʻeku ngāué koeʻuhí ko ha ngaahi tūkunga fakaʻekonōmika faingataʻa ʻi Naisīliá. Naʻá ku pehē kuo ngata ʻa māmani kiate au, ka naʻá ku falala ki he ʻOtuá—ʻo lotu mo ʻaukai ke tokoni mai ke toe maʻu haʻaku ngāue.
ʻI ha māhina pē taha kuo ʻinitaviu au ʻi ha taha ʻo e ngaahi kautaha langa tupu vave taha ʻi Naisīliá. Naʻá ku fakataha mo ha pēnolo ʻo ha kau fai ʻinitaviu ʻe toko tolu: ʻa ia ko e talēkita pulé, pule lahí pea mo e tokotaha fai-faleʻi. Naʻe faingofua pē ʻeku tali ʻa e ngaahi fehuʻi angamahení, ka naʻe fai fakatuʻupakē ʻe he tokotaha fai-faleʻí, ʻa ia ko ha taha faifekau ʻi ha siasi fakalotofonua pē, ha fehuʻi fakaʻohovale: “Ko ha Kalisitiane, Musilimi, pe Lotu Fakakuonga muʻa koe?”
Naʻá ku malimali, peá u tali ange, “Ko e Kalisitiane au.”
Peá ne toe pehē mai, “Ko e hā ʻa e hingoa ho siasí?”
Naʻá ku talaange leva, “Ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.”
Naʻá ne kaila, “Ko e hā! ʻA e Siasi ko iá? Ko hoʻo ʻuhingá ʻokú ke ʻalu ki he siasi ko iá, ʻa ē ʻoku fai fakapulipuli ʻenau ngaahi ʻekitivitií kotoá?” Ne sio hangatonu mai ki hoku matá, peá ne pehē mai, “Talamai ʻoku ʻikai ke moʻoni ia.”
Naʻá ku tali vave ange leva, “ ʻOku moʻoni ia.” Peá u toe pehē ange, “ ʻOku ʻikai ke fai pe fakapulipuliʻi ʻemau ngaahi houalotú. Te ke lava pē ʻo ʻalu ange ki heʻemau ngaahi houalotú he Sāpate kahaʻú ʻo sio tonu.”
Naʻá ne tali mai leva, “He ʻikai ke u fie kau ki ha fakataha pehē.” ʻI heʻene fakatokangaʻi ʻa e huʻunga ʻo e ʻinitaviú, ne talaange leva ʻe he talēkita pulé ki he tokotaha fai-faleʻí ke tuku pea fakamālō mai ʻi heʻeku haʻú.
Hili ha ʻaho ʻe tolu mei ai kuo toe fie maʻu ke u foki ange ʻo ʻinitaviu. Naʻe ʻi ai kotoa ʻa e talēkita pulé, pule lahí, mo e tokotaha fai-faleʻí. Hili ʻemau talanoa ki he fakatau mai ʻo e ngaahi fie maʻú mo hono fakanāunaú, ne ʻeke mai leva ʻe he tokotaha fai-faleʻí, “Ko ha Māmonga koe?”
Naʻá ku tali ange, “ ʻIo, ko e Māmonga au.”
“ ʻOkú ke tui ki he Tohi ʻa Molomoná?”
Naʻá ku tali ange, “ ʻAupito! ʻOku ou tui ki ai.”
“ ʻOkú ke tui naʻe femātaaki ʻa Siosefa Sāmita mo e ʻOtua ko e Tamaí mo Hono ʻAlo ko Sīsū Kalaisí, ʻi heʻene kei taʻu 14?”
Naʻá ku tali ange, “ ʻIo, ʻoku ou ʻilo ʻoku moʻoni.”
ʻI he fakaʻosinga ʻo e ʻinitaviú, ne fakahā mai naʻe tokolahi fau naʻe ʻosi ʻinitaviú. Hili ha ngaahi uike siʻi mei ai, ne u ʻohovale, ʻi heʻeku maʻu ha telefoni mei he talēkita pulé. Naʻá ne fakahoko mai ne ola lelei ʻeku ongo ʻinitaviú fakatouʻosi, peá ne kole mai ke u foki ange ʻo fakamoʻoni he tohi aleapau ngāué.
ʻI heʻeku vakai atu ki he meʻa ne hokó, ʻoku ou fakamālō ʻi he ʻikai ke u fakaʻikaiʻi ʻa e Siasí pe ko ʻeku tuí. Naʻe tali ʻe he ʻOtuá ʻeku ngaahi lotú mo Ne tāpuakiʻi au ʻaki ha ngāue. ʻOku ou ʻilo kapau te tau tuʻu maʻu, te Ne fakapaleʻi lahi kitautolu.
Naʻe fehuʻi mai ʻe he tokotaha fai-faleʻí, “Ko hoʻo ʻuhingá ʻokú ke ʻalu ki he siasi ko iá?”