Toʻu Tupú
Kilisimasi Ngāue Fakafaifekau
Lolotonga ʻa e Kilisimasi hono ua ʻi heʻeku ngāue fakafaifekau taimi kakató, ne ma ʻaʻahi ai mo hoku hoá ki ha mēmipa ne toki papitaiso pē mo hono fāmilí. Hili ha kai efiafi Kilisimasi ifo ʻaupito, naʻá ma vahevahe mo kinautolu ha pōpoaki faka-Kilisimasi.
Naʻá ma kole ki he fāmilí ke nau tā ha ngaahi fakatātā ʻo e ngaahi meʻa naʻá ne fakamanatu ange kiate kinautolu e faʻahitaʻu ko ʻení, hangē ko e ngaahi fetuʻú, ngaahi meʻaʻofa, ngaahi fakatātā ʻo e ʻaloʻí, mo e ʻakau Kilisimasí. Hili ia ne ma lau leva ha ngaahi potufolofola, kau ai ʻa e 2 Nīfai 19:6: “He kuo fanauʻi kiate kitautolu ha tama, kuo foaki kiate kitautolu ha foha; pea ʻe ʻi hono umá ʻa e pulé; pea ʻe ui ʻa hono huafá ko Fakaofo, ko Akonaki, ko e ʻOtua Māfimafi, ko e Tamai Taʻengata, ko e Pilinisi ʻo e Melinó.” Ne mau hivaʻi ʻa e “Once in Royal David’s City” (Hymns, fika 205), sio he foʻi faiva kau ki he ʻAloʻí, pea fai ʻema fakamoʻoni kia Sīsū Kalaisi.
Ko ha Kilisimasi ia ʻi ha ngaahi tūkunga faingofua pē, ʻo mamaʻo mei homa ongo fāmilí mo e ngaahi fakafiefia angamaheni ʻo e Kilisimasí, ka ʻi heʻema fakamoʻoni ki he Fakamoʻuí, ne u ongoʻi ha ʻofa mo ha houngaʻia lahi ange kiate Ia mo Hono ʻaloʻi maí ʻi ha toe taimi ne u ʻilo kimuʻa. Ne u ʻiloʻi ko hoku Kilisimasi fakaʻosi ʻeni ʻi he malaʻe ʻo e ngāue fakafaifekau taimi kakato maʻá e Tamai Hēvaní, ka ne mahino kiate au ʻe lava ke fakamoʻoniʻi kiate au ʻe Hono Laumālié ʻa Hono ʻAló ʻi ha feituʻu pē te u ʻi ai.