Ngaahi Fakakaukau Maʻá e Efiafi Fakafāmili ʻi ʻApí

ʻOku ʻi he makasini ko ʻení ha ngaahi fakamatala mo ha ngaahi ʻekitivitī ʻe lava ke fakaʻaongaʻi ki he efiafi fakafāmili ʻi ʻapí. Ko ha ngaahi sīpinga pē ʻeni ʻe niʻihi.

“Ko ha Meʻaʻofa ʻOku Taau ke Toe Lahi Ange HonoTokangaʻí,” peesi 26: ʻOku vahevahe mai ʻe ʻEletā Nili L. ʻEnitasoni ha ngaahi sīpinga lahi ʻo e founga ʻoku tataki ai ʻe he Laumālie Māʻoniʻoní e kakaí. Fakakaukau ke ke lau ha niʻihi ʻo e ngaahi sīpinga ko ʻení pea kole leva ki he kau mēmipa ʻo e fāmilí ke nau vahevahe ha ngaahi meʻa ne nau aʻusia ʻi heʻenau ongoʻi e Laumālie Māʻoniʻoní.

Ki he fānau iiki angé, ʻe lava ke ke fakaʻaliʻali ha ngaahi meʻa ʻoku nau fakafofongaʻi e ngaahi tāpuaki ʻo e Laumālie Māʻoniʻoní. Hangē ko ʻení, ʻoku hangē ʻa e Laumālie Māʻoniʻoní ko ha sipi kafú he ʻokú Ne fakafiemālieʻi kitautolu (vakai, Sione 14:26), ko ha kāpasa he ʻokú Ne tataki kitautolu (vakai, 2 Nīfai 32:5), mo ha koa he ʻokú Ne lava ʻo tokoniʻi kitautolu ke tau ʻiloʻi e taimi kuo fakamaʻa ai kitautolu ʻi he Fakaleleí (vakai, 2 Nīfai 31:17; 3 Nīfai 27:20).

“Ngaahi Tukufakaholo Faka-Kilisimasi ʻa e Kau Fitungofulú,” peesi 32: Lau ha niʻihi ʻo e ngaahi tukufakaholo ʻoku lisi atu ʻi he fakamatalá, pea ʻeke leva ki he kau mēmipa ʻo e fāmilí e ngaahi tukufakaholo faka-Kilisimasi ʻoku nau manako taha aí. ʻOku ʻi ai mo ha ngaahi tukufakaholo foʻou te ke fie tauhi?

“Ko ha Tokotaha ʻAʻahi Makehe,” peesi 68: ʻE lava ke mou fakamanatu e ʻaho fāʻeleʻi ʻo e Palōfita ko Siosefa Sāmitá hangē ko e fāmili ʻi he talanoá, ʻaki hoʻomou ako kau ki he ʻUluaki Mata-Meʻa-Hā-Maí. Mahalo te mou fie maʻu foki ke lau mei he malanga konifelenisi kau kia Siosefa Sāmita (ke sīpinga ʻaki, vakai, Tad R. Callister, “Siosefa Sāmita—Ko e Palōfita ʻo Hono Toe Fakafoki Mai ʻo e Ongoongoleleí,” Liahona mo e Ensign, Nōv. 2009, 35–37).

Ko hono Fakahoungaʻi e Misiona ʻo e Fakamoʻuí

Ne tokoni ha taha ʻo ʻemau ngaahi efiafi fakafāmili ʻi ʻapi fakalata tahá ke mau fakahoungaʻi lelei ange ʻa e moʻui mo e misiona ʻo e Fakamoʻuí. Ne mau kole ki he mēmipa kotoa pē ʻo e fāmilí ke ne kumi ha ngaahi potufolofola fekauʻaki mo e ongo nima, fofonga, ongo vaʻe pe ngutu ʻo e Fakamoʻuí. Hili iá ne mau takitaha vahevahe leva e ngaahi potufolofola ko iá. Hangē ko ʻení, ne fakamoʻui ʻe he toʻukupu ʻo e Fakamoʻuí ʻa e tangata kiliá, naʻá Ne ʻeveʻeva ʻi he fukahi vaí, ne tangi ʻi he faʻitoka ʻo Lasalosí. Naʻa mau aleaʻi foki e ngaahi kafo ʻi he sino ʻo Sīsuú pea moe haohaoa ʻo ʻEne feilaulaú. Ne hanga ʻe heʻemau fealēleaʻaki kau ki he moʻui mo e ngaahi ngāue ʻa Sīsū Kalaisí ʻo fakaafeʻi mai e Laumālié pea lava ai ke fai ʻe he mēmipa takitaha ʻo e fāmilí ʻa ʻene fakamoʻoni ki hotau Fakamoʻuí.

Tēvita R. ʻEnitasoni, ʻIutā, USA