Ko ha Fakaafe Makehe
“Kuo fai ʻe Siosefa Sāmita … ha meʻa lahi ange ki hono fakamoʻui ʻo e faʻahinga ʻo e tangatá ʻi he māmaní, tuku kehe ʻa Sīsū pē, ʻi ha toe tangata ʻe toko taha ʻa ia naʻe moʻui ʻi ai ʻi ha kuonga” (T&F 135:3).
Naʻe talamai ʻe he tangataʻeikí hili e kai pongipongí, “ʻE ʻi ai ʻetau fakaafe makehe ʻanai ʻi he efiafi fakafāmili ʻi ʻapí.”
Naʻe ʻohovale ʻa Taniela ʻo hanga hake. “Ko hai ʻoku haʻú?” ko ʻene fehuʻí mai ia.
Naʻe pehēange e fineʻeikí, “Ko ha tokotaha ʻokú ke ʻilo lahi fekauʻaki mo ia. Ko ha tokotaha te ke fiefia ke mo feʻiloaki!”
Naʻe fifili ʻa Taniela he ʻahó kakato pe ko hai ʻe haʻu ki he efiafi fakafāmili ʻi ʻapí. ʻOku toe pē ngaahi ʻaho siʻi pea hoko e Kilisimasí. Mahalo pē ʻoku ʻi ai ha kaunga ʻa e tokotaha ʻaʻahi makehé ki he Kilisimasí.
Naʻe faifai pea fakataha mai ʻa e fāmilí he efiafí. Naʻe pehēange ʻe he tangataʻeikí, “ʻE hoko ʻa Siosefa Sāmita ko ʻetau tokotaha ʻaʻahi makehe ki he efiafi ní. ʻOku hoko hono ʻaho fāʻeleʻí ʻi he ʻaho 23 ʻo Tīsemá. Te tau fakafaivaʻi fakafāmili ʻa e talanoa ki he ʻUluaki Mata-Meʻa-Hā-Mai ʻa Siosefa Sāmitá.”
Naʻe tānaki mai ʻe he tokotaha kotoa pē ʻa e ngaahi meʻa mo e ngaahi teunga ki he ngaahi konga naʻe vahe ange kiate kinautolú. Naʻe akoako ʻe Taniela ʻene kongá mo e tangataʻeikí lolotonga ko iá naʻe akoako ʻa hono toé mo e fineʻeikí. Taimi nounou pē kuo nau maau.
Naʻe fiefia ʻa e kiʻi tamasiʻi ko Mātiú ke ne fakafaivaʻi ʻa Siosefa Sāmita. Ko e fāmili leva ʻo Siosefá ʻa Taniela mo ʻElisapesi. Naʻe ʻai leva ko e ongo faifekau e tangataʻeikí mo e fineʻeikí mei ha ngaahi siasi kehe.
“Kau ki homau siasí pea ʻe fakamoʻui koe!”
“ʻIkai, mou ō mai kiate kimautolu. Ko kimautolu ʻoku moʻoní!”
“Ko e meʻa ʻeni ʻoku talamai ʻe he Tohi Tapú!”
“Ka ʻoku ʻikai ko hono ʻuhingá ia!”
Naʻe fehuʻi ange ʻe he tangataʻeikí, “ʻOku mou pehē leva ko e hā e ongo naʻe maʻu ʻe Siosefá?” ʻOku mou pehē naʻá ne fifili pe ko e hā naʻe lea ʻaki ai ʻe he kau faifekaú ʻa e ngaahi meʻa kehekehé pea ko hai naʻe totonú?”
Naʻe loto taha ʻa Taniela, Mātiu, mo ʻElisapesi kuo pau pē naʻe fifili ki ai ʻa Siosefa.
Naʻe tutu leva ʻe he tangataʻeikí ha foʻi teʻelango. Naʻe ongoʻi ʻe Taniela hangē naʻá ne ʻi ai tonu pē mo Siosefa Sāmita ʻi he lau ʻa e tangataʻeikí mei he Sēmisi 1:5 ʻi he maama ʻo e teʻelangó, “Ka ai hamou taha ʻoku masiva ʻi he potó, ke kole ʻe ia ki he ʻOtuá.” Naʻe kamata lau leva ʻe he tangataʻeikí ʻa e talanoa ki he ʻUluaki Mata-Meʻa-Hā-Maí.
Naʻe tūʻulutui ʻa Mātiu ʻo hangē naʻá ne lotú ʻo tatau mo ia naʻe fai ʻe Siosefa Sāmitá. Fakafokifā pē kuo ulo mai e maama ʻo ha kasa ʻo ne maamangia ia, pea toki lau ʻe Taniela ʻi he founga ʻapasia ʻa e ngaahi laine naʻe tokoniʻi ia ʻe he tangataʻeikí ke ne ako maʻulotó: “Ko Hoku ʻAlo ʻOfaʻangá ʻEni. Fanongo kiate Ia!” ( Siosefa Sāmita—Hisitōlia 1:17).
Naʻe fakamatalaʻi ʻe he tangataʻeikí ʻa e hā ʻa e Tamai Hēvaní mo Sīsū Kalaisi kia Siosefa Sāmita ʻo fakahā ange ʻoku ʻikai totonu ke ne kau ki ha taha ʻo e ngaahi siasi naʻe ʻi he māmaní.
Naʻe fakamatala ʻa e tangataʻeikí, “Naʻe fili ʻe he ʻEikí ʻa Siosefa Sāmita ke hoko ko ʻEne palōfita ke toe fakafoki mai ʻa e Siasi moʻoni ʻo Sīsū Kalaisí ki he māmaní. Naʻe fakahoko faivelenga ʻe Siosefa ʻa e misiona ko iá.”
Hili ha ngaahi ʻaho siʻi mei ai, naʻe haʻu ʻa ʻEnitī ko e kaungāʻapi ʻo Tanielá ke na vaʻinga. Naʻe kei fakakaukau pē ʻa Taniela ki he efiafi fakafāmili ʻi ʻapi mo Siosefa Sāmitá.
Naʻá ne tafoki hake ʻo pehē kia ʻEnitī, “ʻOku ou ʻiloʻi e palōfita naʻe moʻui ʻi he taimi fuoloá—ko Siosefa Sāmita. ʻOkú ke ʻiloʻi ia?”
Ngaahi tā fakatātā ʻa Jennifer Tolman