Ko Hai ʻe Hoko Ko e Meʻaʻofá?

Ana Márcia Agra de Oliveira, Penamapuko, Palāsila

ʻI he 1982, ko e Kilisimasi ia hono ua hili ʻema malí, ne ma fakakaukau mo Kelito ke fokotuʻu haʻama ngaahi tukufakaholo faka-Kilisimasi. Koeʻuhí ko kimaua naʻe fuofua kau ki he Siasí ʻi homa ongo fāmilí, naʻe ʻikai ke ʻi ai ha manavaʻofa moʻoni mo ha ngāue tokoni ʻi heʻemau ngaahi fakafiefia ʻo e Kilisimasí ki muʻá —neongo ʻokú ma maʻu pē ha ngaahi manatu fiefia ki ai. ʻIkai ko ia pē, ka naʻe hoko ʻema fuofua pēpē māhina valu ko Tiekó ko ha ʻuhinga feʻunga ia ke fakaleleiʻi ai ʻema moʻuí ʻi he foungá ni.

Ne ma mātuʻaki femoʻuekina ʻaupito ʻi he ako he ʻunivēsití, ngaahi ngāue fakaʻapí, ngaahi fatongia faka-Siasí, mo ʻema feinga ke ako ki he tauhi fānaú he ko e fuofua taimi ʻeni ʻema hoko ko ha mātuʻá, ka naʻá ma kei nofo pē ʻo teuteu ki ha meʻa makehe ʻe hoko. Naʻá ma fakaʻaongaʻi e efiafi fakafāmili kotoa ʻi ʻapi ʻi he māhina ko Tīsemá ke ngaohi ha fanga kiʻi meʻa teuteu pea ke mahino lelei ange kiate kimaua ʻa e ngaahi fakaʻilonga mo e ngaahi lanu ne ma sio ai he feituʻu kotoa peé. Ne ma palani foki ke teuteuʻi ha kiʻi meʻatokoni faingofua pē, peá ma fakakaukauʻi e fanga kiʻi meʻaʻofa ʻaonga mo ʻikai fakamolé. ʻI heʻema fakahoko ha polokalama ako folofolá, naʻá ma ʻiloʻi ko e liliu moʻoni ʻi heʻema founga fakafiefiaʻi ʻo e ʻaloʻi ʻo Kalaisí ʻe totonu ke kau ai hano fili ha meʻaʻofa maʻá e Fakamoʻuí.

Ne ma fifili ʻo pehē, “Ko e hā ha meʻa te ke foaki maʻá ha taha ʻoku pule ki he ngaahi meʻa ʻo e langí mo māmani?” Naʻe ʻomi ʻa e talí ʻe he folofolá, ʻi heʻene pehē, ko e hā pē ha meʻa ʻoku tau fai “ki ha taha ʻoku kihiʻi siʻi hifo ʻi hoku kāingá ni” (Mātiu 25:40) ko ʻetau fai ia kiate Iá. Koeʻuhí ko ha faʻahitaʻu ʻa e Kilisimasí ʻo e anga fakakaumeʻa mo ha taimi ʻo e ʻofa, naʻá ma loto ke fakaafeʻi mai ha mēmipa ʻo e Siasí ke ne aʻusia ʻa e ongo māfana mo e laumālie fiefia naʻá ma ongoʻi ʻi homa ʻapí. Naʻá ma fekumi mālohi ke maʻu ha taha naʻe fie maʻu ke fakafiefiaʻi pea hoko ʻa e tokoni ki aí ko ʻema meʻaʻofa Kilisimasi ia ki he Fakamoʻuí.

ʻI he taimi kotoa pē naʻá ma fakaafeʻi ai ha tangata pe fefine mei he uōtí pe siteikí ki homa ʻapí, naʻá ma fiefia hono ʻiloʻi ʻoku ʻosi ʻi ai e ngaahi ʻekitivitī kehe ia ne kau ki ai e tokotaha ko iá. Ka ne vave ʻene hoko mai ʻa e Efiafi ki muʻa he Kilisimasí, mo e teʻeki pē ke ma maʻu ha taha ke mau Kilisimasi.

ʻI heʻema fakakaukau ko ia kuo ʻikai pē maʻu ha tahá, ne ma teuteu ke maʻu meʻatokoni mo e tatangi ʻa e fafangu he matapaá. ʻI heʻeku fakaava hake e matapaá, ne u fiefia ke mamata atu ki haku kaumeʻa ne fuoloa ʻema taʻefesiofakí. Ne toki māvae ʻa ʻAvelā mo hono uaifí pea naʻe fakamamahi ʻeni kiate ia pea siva mo e ʻamanakí. Naʻá ne loto mamahi mo tuēnoa pea naʻá ne ongoʻi ha fuʻu fie maʻu ke fakataha mo kimaua.

Naʻá ma talitali ʻa ʻAvelā ʻi he loto ʻofa, pea naʻá ne talamai kuó ne maʻu ʻa e ʻātakai naʻá ne fie maʻu ke fakafiemālieʻi ai ia ʻi he lotolotonga ʻo hono ngaahi faingataʻaʻiá. Naʻá ma talaange ʻema ngaahi teuteu ko ia ke tokoniʻi ha taha faingataʻaʻiá koeʻuhí ke ne lava ʻo ʻiloʻi naʻe ʻafioʻi mo ʻofeina ia ʻe he ʻEikí.

Ko e meʻa fakaʻofoʻofa ia kiate kimautolu hono kotoa ke ʻiloʻi kuo fekauʻi mai ʻe he Fakamoʻuí kiate kimaua ha taha naʻe ʻikai ke ma lava ʻo maʻu: ʻa homa kaumeʻa ko ʻAvelaá. Naʻá ma ʻiloʻi ʻa e mahuʻinga lahi ʻo e ngaahi fetuʻutaki ʻi he vahaʻa ʻo e ngaahi foha mo e ngaahi ʻofefine ʻo e Tamai Hēvaní. Ko hono ʻuhinga ia ʻoku mau manatuʻi maʻu ai pē mo ʻema fānau ʻe toko tolú ʻi he ngaahi Kilisimasi hokohoko maí ko e taumuʻa ʻo e faʻahitaʻu ko iá ke fakamālohia ʻa e ngaahi haʻi ʻo e uouangatahá, ʻofá, mo e anga fakakaumeʻá.

ʻI heʻema fakakaukau ko ia kuo ʻikai pē maʻu ha tahá, ne ma teuteu ke maʻu meʻatokoni ka ne tatangi ʻa e fafangu he matapaá.