Ne u Taukapoʻi e Palōfita ko Siosefá

Maria Brando, ʻĪtali

Ne ʻi ai ʻeku misi fakangalongataʻa ʻi he 1978 ʻoku hā mai ha toko ua kiate au. ʻI heʻeku talanoa mo kinaua ʻi he misí, ne u ongoʻi ha fiefia lahi. Ne u kei maʻu pē ʻa e ongo ko iá hili ʻeku ʻā hake he pongipongi hono hokó.

ʻI he ʻaho pē ko iá ne tukituki ai ha ongo faifekau ʻa e Siasí ʻi he matapā homau ʻapí ʻo kole pe ʻe lava ke na vahevahe mai ha pōpoaki. ʻI heʻeku manatu ki heʻeku misí, ne u loto ki ai pea fakaafeʻi kinaua ki fale. Naʻe ʻikai ke fuʻu māfana ki ai hoku husepānití, ka ʻi heʻeku talaange he ʻikai lava ke u tuku kinaua ke na ʻalu taʻefai ha talanoa mo kinauá, naʻá ne loto leva ki ai.

Naʻe akoʻi au ʻe he ongo faifekaú he ʻaho ko iá ʻo kau ki ha ngaahi meʻa kehekehe kau ai ʻa e kau pālofitá. Ne u ʻiloʻi e kau palōfita ʻi he Tohi Tapú, hangē ko ʻĒpalahame mo Mōsesé, ka ne akoʻi foki au ʻe he ongo faifekaú ʻo kau ki ha palōfita ʻo onopooni, ko Siosefa Sāmita. ʻI he ʻosi ʻemau lēsoní, ne kole mai e ongo ʻeletaá pe ʻe lava ke na toe foki mai ke hoko atu ʻemau fevahevaheʻakí. Ne u ʻio ange.

Hili mo ha toe ngaahi lēsoni kehe, naʻe fakaafeʻi au ʻe he ongo faifekaú ke u papitaiso. Ne u saiʻia ʻi he meʻa kuó u ʻosi akó, ka ne u loto ke u maʻu ha fakamoʻoni kau kia Siosefa Sāmita ki muʻa pea toki papi au. ʻI he ngaahi meʻa kotoa ne akoʻi mai ʻe he ongo faifekaú, ko e meʻa faingataʻa taha ke u talí ʻa e talanoa kau ki aí. Ka ne u ʻiloʻi kapau te u fekumi fakamātoato ke maʻu ha fakamoʻoni, ʻe fakamoʻoniʻi mai ʻe he Tamai Hēvaní ʻa e moʻoní kiate au.

Naʻá ku ʻalu ʻo sio ki ha faifekau ʻi he siasi ne u tupu hake aí. Naʻá ku talaange ki ai e meʻa kuo akoʻi mai ʻe he ongo faifekaú kiate aú peá u fakahā ange ʻeku fie maʻu ke toe talanoa mo kinauá. Ki muʻa pea lava ke u lea ʻaki ha toe meʻá, naʻá ne talamai ʻoku fakasesele ʻa Siosefa Sāmita, pea ko e tokotaha faʻa misi.

Fakafokifā ne u fanongo ki ha leʻo ʻoku pehē mai kiate au, “Ko e palōfita moʻoni ʻa Siosefa Sāmita.” Naʻe kamata ke tā mālohi hoku mafú, pea neongo ne teʻeki ai ke u papitaiso ki he Siasí, ka naʻá ku taukapoʻi ʻa e Palōfita naʻá ne Toe Fakafoki Mai ʻa e ongoongoleleí.

ʻI heʻeku mavahe mei he ʻōfisi ʻo e faifekaú, naʻe fakautuutu ʻa e ongo naʻá ku maʻú. Ne u maʻu ʻeku talí peá u ʻiloʻi ʻa e siasi ʻoku totonu ke u ʻohake ai hoku ngaahi fohá.

Ne taimi nounou pē mei ai kuó u papitaiso, pea naʻá ku ongoʻi ha loto holi lahi ke vahevahe ʻa e meʻa kuó u ʻiló mo e niʻihi kehé. Kuo fakamoʻoniʻi mai kiate au ʻe he laumālié ʻa e Palōfita ko Siosefa Sāmitá, pea naʻá ku loto ke aʻusia ʻe ha niʻihi kehe ʻa e fiefia ʻoku ou maʻu ʻi heʻeku moʻuí tupu mei aí. Naʻe aʻusia tonu ʻe hoku husepānití ʻa e fiefia ko iá ʻi heʻene kau ki he Siasí hili ha taʻu ʻe ua ʻeku papitaisó.

ʻOku ou fakamālō ʻi heʻeku moʻui ʻi ha kuonga ʻoku tau toe maʻu ai ha kau palōfita ʻi he māmaní. Koeʻuhi ko ʻenau fakahinohinó, ʻoku ou maʻu ha hala pau ʻe lava ke u muimui ai.