Ngaahi Ongoongo Fakatemipalé

Ko Hono Fakatapui ʻo e Temipale Venikuvá

Ne fakatapui ʻe Palesiteni Tōmasi S. Monisoni e temipale hono 131 ʻo e Siasí ʻi tuʻa Venikuva pē, ʻi Pilītisi Kolomupia, ʻi he ʻaho 2 ʻo Mē, 2010. Ne feʻunga mo e kakai ʻe meimei toko 40,000 ne nau mamataʻi e temipalé lolotonga e ʻoupeni hausí, ʻa ia ne fai ʻi ha māhina ʻe ua hili e Feʻauhi ʻOlimipiki ʻo e Faʻahitaʻu Momokó ʻo e 2010 ʻi Venikuvá. ʻE ngāue ʻaki e Temipale Venikuvá ʻe he kāingalotu ʻi Pilītisi Kolomupiá mo Uasingatoni tokelaú, ʻi he USA. ʻOku ʻi ai ha temipale ʻe valu he taimí ni ʻo e Siasí kuo ʻosi palani pe lolotonga ngāue ʻaki ʻi Kānata.

Ko Hono Fakatapui ʻo e Temipale Teleʻa Keila ʻAlesoná (Gila Valley Arizona Temple)

Ne fakatapui ʻe Palesiteni Tōmasi S. Monisoni e Temipale Teleʻa Keila ʻAlesoná ʻi he ʻaho 23 ʻo Mē, 2010, ʻi ha fakatahaʻanga ʻe tolu. ʻOku ngāue ʻaki e temipalé ʻe he kāingalotu ʻi he feituʻu fakatonga-hahake ʻo ʻAlesoná mo e fakatonga-hihifo ʻo Niu Mekisikoú. ʻOku tuʻu e temipalé ʻi he feituʻu fakatonga-hahake ʻo ʻAlesoná, ʻo ʻikai mamaʻo mei he feituʻu naʻe tupu hake ai ʻa Palesiteni Sipenisā W. Kimipoló (1895–1985). Ko e Temipale Teleʻa Keilá ʻa e temipale hono tolu ke fakaava ʻi ʻAlesoná, pea kuo ʻosi fakahā mo e temipale kehe ʻe ua (Kilipati ʻAlesoná mo e Fīniki ʻAlesoná).

Ko Hono Fakatapui ʻo e Temipale Sepu Sití

Ne fakatapui ʻe Palesiteni Tōmasi S. Monisoni e temipale hono ua ʻi he ʻOtu Filipainí ʻi he ʻaho 13 ʻo Sune, 2010. ʻOku tuʻu e Temipale Sepu Siti Filipainí ʻi ha meimei maile ʻe 350 (km ʻe 563) mei he Temipale Manila Filipainí. ʻE ngāue ʻaki e temipalé ʻe he kāingalotu ʻe toko 200,000 tupu ʻi he feituʻu Visaiasí (Visayas) mo Minitanaó (Mindanao). Ne laka hake he kakai ʻe toko 45,000 naʻe haʻu ki he ʻoupeni hausi uike ʻe ua naʻe fakahokó. Ne kau atu mo ha toʻu tupu ʻe toko 3,000 tupu ki ha faiva fakafonua he pō kimuʻa ʻi he fakatapuí.

Tanupou ʻi Pilikihami Siti, ʻi ʻIutā

Naʻe fakahoko e tanupou maʻá e Temipale Pilikihami Siti ʻIutaá ʻi he ʻaho Tokonaki, 31 ʻo Siulai 2010, he taimi 9 pongipongí. Ne tokangaʻi e tanupoú ʻe Palesiteni Poiti K. Peeka, Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻa ia ne fakamafola ki he ngaahi siteiki senitā ʻi he vāhenga fakatemipalé kotoa. Naʻe fakahā e Temipale Pilikihami Sití ʻi he konifelenisi lahi ʻo e ʻaho 3 ʻo ʻOkatopa, 2009. Ko e temipale ʻaki ia hono 14 ʻo e Siasí ʻoku lolotonga ngāue ʻaki ʻi ʻIutaá.

Ko Hono Fakatapui ʻo e Temipale Kaiví

Ne fakatapui e Temipale Kaivi ʻIukuleiní ʻi he ʻaho 29 ʻo ʻAokosi 2010, ʻi ha fakatahaʻanga ʻe tolu naʻe fakamafola ʻi he vāhenga fakatemipalé kotoa. Naʻe fai ha ʻoupeni hausi maʻá e kakaí mei he ʻaho 7 ki he ʻaho 21 ʻo ʻAokosí, mo ha fakafiefia fakafonua ʻi he ʻaho 28 ʻo ʻAokosí. Naʻe fakahā e temipalé ʻi he ʻaho 20 ʻo Siulaí, 1998. Naʻe kamata e langá ʻi he ʻaho 23 ʻo Sune, 2007. Ko e fuofua temipale ia ʻo e Siasí ke tuʻu ʻi ʻIulope Hahaké pea ko e 11 ʻaki ia ke tuʻu ʻi he konitinēniti ʻIulopé. ʻOku ngāue ʻaki e Temipale Kaiví ʻe he kāingalotu ʻi ha fonua ʻe 13.

Ko Hono Toe Fakatapui ʻo e Temipale Laʻié

Hili hano ngaahi fakaleleiʻi lahi ʻo e Temipale Laʻie Hauaiʻí, naʻe toe fakatapui ia ʻi ha fakatahaʻanga ʻe tolu ʻi he ʻaho 21 ʻo Nōvema ʻo e 2010, hili ia ha ʻoupeni hausi maʻá e kakaí mei he ʻaho 22 ʻo ʻOkatopá ki he ʻaho 12 ʻo Nōvemá. Naʻe fakamafola hono toe fakatapuí ʻi he ngaahi vāhenga fakatemipale ʻo Laʻie mo Koná. Ko e temipale ʻeni hono nima ʻo e Siasí, naʻe fakatapui ʻi he 1919 ʻe Palesiteni Hiipa J. Kalānite pea toe fakatapui ʻi he 1978 ʻe Palesiteni Sipenisā W. Kimipolo.

Naʻe fakatapui e Temipale Kaivi ʻIukuleiní ʻi he ʻaho 29 ʻo ʻAokosi 2010.

Faitā ʻa Weston C. Colton