ʻOku Hanga ʻe Hono Toe Fokotuʻutuʻu ʻo e Mormon.org ʻo Fakafehokotaki e Kāingalotú mo e Kau Fiefanongó
Talu hono kamata ʻo e Mormon.org ʻi he 2001 mo ʻene tokoni ki he kakaí ke maʻu ha ngaahi tali hangatonu mo totonu ki heʻenau ngaahi fehuʻi kau ki he Siasí. Naʻe haʻu fakahangatonu pē e ngaahi tali ko iá mei he hetikuota ʻo e Siasí.
ʻOku kei ʻomai pē ʻe he fakamatala fakamuimuitaha ʻi he Mormon.org,—kau ai hono fokotuʻutuʻu foʻou kakató—ha ngaahi tali lahi mo ha founga ke fetuʻutaki ai ki he kau faifekaú. Kae fakamālō ki ha tafaʻaki fakamatala fakafoʻituitui foʻou ʻi he ʻInitanetí, ʻoku haʻu fakahangatonu ai ʻeni ha ngaahi tali lahi mei he kāingalotu ʻo e Siasí ʻi māmani kotoa.
ʻE lava ʻe kinautolu ʻe hū ki he saiti foʻoú—ʻa ia ʻe kamata ke hā mai ʻi he ngaahi lea fakafonua makehe mei he lea faka-Pilitāniá ʻi he vaeuaʻangamālie ʻo e 2011—ʻo fakafaʻafaʻahinga ʻa e ngaahi fakamatala fakafoʻituitui ʻo ha kāingalotu ʻe toko lauiafe ʻo fakatatau ki honau tuʻunga tangata pe fefiné, taʻu motuʻá, matakalí, puipuituʻa fakalotú, mo e ngaahi meʻa kehe pē ke kumi ʻaki e kāingalotu ʻo e Siasí ʻoku faitatau mo kinautolú. Ko ʻene hā pē ʻeni ʻi ha peesi fakamatala fakafoʻituitui, ʻe lava leva ʻe kinautolu ʻoku ngāue ʻaki e saití ʻo lau e ngaahi fakamoʻoní, fai mo ha toe ngaahi fehuʻi, pea fetuʻutaki mo e kāingalotu ʻo e Siasí ʻi he ngaahi Uepi saiti fengāueʻaki fakasōsialé. ʻOku lava ke maʻu ʻe he kau fiefanongó ʻa e fakaʻuhinga ʻa honau toʻú ʻo kau ki he Siasí, ʻi he fetuʻutaki fakatoʻu ko ʻení.
Naʻe pehē ʻe ʻEletā Lisiate G. Hingikelī, Talēkita Pule ʻo e Potungāue Fakafaifekaú, “ ʻI he taimi ʻoku fekumi ai e kakaí ki ha fakamatala ʻi he ʻInitanetí, ʻoku nau tui ange ki he ngaahi fakakaukau ʻa honau toʻú ʻi he meʻa ʻoku fakamatalaʻi ʻe ha kautaha ʻo kau kiate ia pē, kae tautefito kapau ko ha kautaha lotu kuo ʻosi fokotuʻutuʻu lelei. Ko e ʻuhinga ia ʻoku hoko ai e ngaahi fakamatala fakafoʻituitui ʻa e kāingalotú ko ha konga mahuʻinga ʻo e Mormon.org foʻoú.”
ʻOku vahevahe e Mormon.org foʻoú ki he tafaʻaki lalahi ʻe fā, ʻo nofo taha ʻa e konga takitaha ki hono akoʻi ʻo ha tafaʻaki pau ʻo e Siasí: Ko Hotau Kakaí, Ko Hotau Ngaahi Tuʻunga ʻUlungāanga Mahuʻingá, Ko ʻEtau Tuí, mo e Ngaahi Fehuʻi ʻOku Lahi Hono ʻEké.
Ko Hotau Kakaí
ʻOku ʻi he konga ko ʻení e ngaahi fakamatala fakafoʻituitui ʻo e kāingalotú, ʻo lava ke ako lahi ange ai e kau fiefanongó ki he ongoongoleleí ʻaki ʻenau “feʻiloaki” mo kinautolu kuo ʻi ai ʻenau fakamoʻoni ki he ongoongolelei kuo toe fakafoki maí.
Naʻe pehē ʻe Loni Uilisoni, pule ʻo e ʻInitanetí mo e fakamāketí maʻá e Potungāue Fakafaifekaú, “Ko e meʻa ʻe taha ʻoku tokoni ki he kakaí ke nau mavahe ai mei he ngaahi maʻuhala fekauʻaki mo e Siasí ko ʻenau maʻu e faingamālie ke ʻiloʻi ha taha Māmonga. ʻOku nau fakatokangaʻi ʻe ʻikai tatau e ngaahi meʻa kovi ʻoku nau fanongo ai kau ki he Siasí mo e founga ʻoku moʻui ʻaki ʻe honau ngaahi kaungāmeʻa Māmongá.”
Ko Hotau Ngaahi Tuʻunga ʻUlungāanga Mahuʻingá
ʻOku akoʻi ʻe he konga Ko Hotau Ngaahi Tuʻunga ʻUlungāanga Mahuʻingá ʻa e meʻa ʻoku fakahoko ʻe he kāingalotú tupu mei heʻenau tuí. ʻOkú ne fakamatala ki ha niʻihi ʻo e ngaahi meʻa ʻoku fakamuʻomuʻa ʻe he Siasí, kau ai e tokoni ʻofa fakaetangatá, ngaahi fāmilí, akó, ngāue tokoní, mo e hisitōlia fakafāmilí. ʻE tokoniʻi ʻe he konga ko ʻení e kau fiefanongó ke nau fakafehokotaki e tokāteline ʻa e Siasí mo e founga ʻoku moʻui ʻaki ʻe he kāingalotú.
Ko ʻEtau Tuí
ʻOku fakamatalaʻi ʻe he konga Ko ʻEtau Tuí ʻa e ngaahi tefitoʻi tokāteline ʻa e Siasí. ʻE lava ke tali ʻe he meʻa kotoa pē he konga ko ʻeni ʻo e saití ʻa e fehuʻi, “Ko e hā e meʻa ʻoku tui ki ai e Kau Māmongá?” ʻOku ʻomi foki ʻe he konga ko ʻeni ʻo e saití e kakano ʻo e ngaahi tafaʻaki kehe ʻo e saití. ʻE lava ke ako ʻa kinautolu ʻe hū ki he saití ʻo kau ki heʻetau tui kia Sīsū Kalaisi ko hotau Fakamoʻuí, ʻa hono Fakafoki Mai ʻo e ongoongoleleí, Siosefa Sāmita, ko e palani ʻo e fakamoʻuí, Tohi ʻa Molomoná, mo ha ngaahi tefito kehe pē.
Ngaahi Fehuʻi ʻOku Lahi Hono ʻEké
ʻOku fokotuʻutuʻu ʻe he kāingalotu ʻo e Siasí ʻa e fakamatala maʻá e konga ko ʻení ʻaki ʻenau tali e ngaahi fehuʻi ʻi heʻenau ngaahi fakamatala fakafoʻituituí. ʻOku nau tali e Ngaahi Fehuʻi ʻOku Lahi Hono ʻEké ʻi heʻenau lea pē ʻa kinautolú, ʻo tokoni ia ke ako ʻa kinautolu ʻoku hū ki he saití ʻo kau ki he Siasí mei hono kāingalotú.
ʻE kamata ke ʻasi mai ʻa e Mormon.org kuo toe fokotuʻutuʻu foʻoú ʻi he ngaahi lea fakafonua kehe ʻi he vaeuaʻangamālie ʻo e 2011.