Tohi ki he ʻĒtitá

ʻOku Fakahoko ha Liliu ʻe he Liahoná

ʻOku ou fie fakamālō atu ko e ngaahi pōpoaki ko ia ʻoku ʻomi ʻi he Liahoná he māhina kotoa peé. ʻOku nau fuʻu ʻaonga ʻaupito; ʻoku nau tokoniʻi au ke u ʻai ke toe lelei ange e ʻaho kotoa pē. ʻI he taimi kotoa pē ʻoku ou loto-foʻi ai mo fakakaukau ʻoku fuʻu faingataʻa e moʻuí, ʻoku ou lau ha pōpoaki mei he Liahoná pea ʻoku liliu e meʻa kotoa pē. Fakamālō atu ʻi he meʻa hono kotoa ʻoku mou fai—maʻaku pea mo ha niʻihi kehe tokolahi.

ʻEtikā Selesitino, Tekisisi, USA

Ko e Fetuʻutaki ʻi he ʻInitanetí

Naʻe papitaiso au he 1990 pea ne u ʻalu maʻu pē ki heʻeku ngaahi fakatahaʻanga faka-Siasí. Ka ne toki fekauʻi atu au kimuí ni pē ke u ngāue ko ha tokotaha fakamelino ʻi he sōtiá ki ha fonua kehe, pea ʻoku ʻikai leva te u kei lava ki ha faʻahinga fakatahaʻanga. Ko e founga pē ʻoku ou fetuʻutaki ai mo e Siasí ko e lau e ngaahi makasiní ʻi he ʻInitanetí. Ne hoko ʻeni ko ha ueʻi fakalaumālie lahi kiate au. ʻOku ou ongoʻi mālohi ʻaupito e Laumālié ʻi heʻeku lau e ngaahi lea ʻa hotau palōfitá mo e kau taki kehe ʻo e Siasí. ʻOku ou ongoʻi ʻa e ʻikai ke u maʻu e sākalamēnití, ka ʻoku ou ʻilo ʻoku mahino ki he Tamai Hēvaní e tūkunga ne u ʻi aí. Fakamālō atu koeʻuhí ko e ngaahi makasiní ʻi he ʻInitanetí.

ʻOlukunipai ʻOlaimoloi, Naisīlia

Kātaki ʻo ʻave hoʻo ngaahi fakakaukaú pe fokotuʻú ki he [e-mail]. ʻE lava pē ke liliu ʻa e ngaahi faitohi maí koeʻuhí ko e lōloá pe ke toe mahinongofua.

Kole ke ʻOmi ha Ngaahi Fakamatala

Kuo ʻikai nai hoko hoʻo fakafiefiaʻi e Kilisimasí ʻo hangē ko ia naʻá ke fie maʻú pe ʻikai hangē ko hoʻo palaní? Mahalo pē ne ke puke, tengihia ha fakamasiva ne hoko, ʻi he ngāue fakakautaú, mamaʻo ʻi he akó, pe māvae mo e fāmilí mo e kaungāmeʻá. Naʻá ke fakamanatu fēfē nai e Fakamoʻuí mo Hono ʻaloʻí ʻi he ngaahi tūkunga ko iá? Kātaki ʻo fakangatangata pē hoʻo fakamatalá ki he foʻi lea ʻe 500, fakahingoa ia ko e “Fakafiefiaʻi ʻo e Kilisimasí,” pea ʻave ki he [e-mail].