Ko e Ongoongoleleí ʻi Heʻeku Moʻuí
ʻIkai ha Taimi Feʻunga?
Naʻe ʻikai te u fakakaukau ʻe ʻi ai haku taimi ki he ʻinisititiutí. Ka naʻe ueʻi au ʻe he laumālié ke u tuku ha taimi ki ai.
ʻI he konga ki mui ʻo Tīsema 2008, ne u tangutu ai ʻi he loki silesitiale ʻo e Temipale Soulu Kōleá ʻo fakakaukau ki he taʻu foʻou ʻoku hanga mei muʻá. Ne u mali ʻi he temipale tatau pē ko ʻení ʻi he māhina ʻe ua kuo hilí, pea kimuí ni maí naʻe hangē ne femoʻuekina fau hoku ngaahi ʻahó mo hoku ngaahi uiké he ngāué, hoku fatongia faka-Siasí, mo hoku fāmili foʻoú. Ne u ʻalu maʻu pē ki he ngaahi kalasi ʻinisititiutí, pea kuó u fakakaukau ʻeni mahalo ʻe tuku ʻeku ʻalu ki aí.
ʻI heʻeku lotu ke maʻu ha fakahinohino ki he taʻu foʻoú, ne u maʻu ha ongo mahino ke kei hokohoko atu pē ʻeku ʻalu ki he ʻinisititiutí. Ne u ongoʻi foki naʻe ueʻi au ke toe lahi ange ʻeku ʻalu ki he temipalé. ʻI heʻeku mavahe mei he temipalé ʻi he ʻaho ko iá, ne fakafonu au ʻe ha ongo nonga mo e fakafetaʻi ʻi he fakahinohino foʻou ko ia kuo fai kiate au ʻe he ʻEikí. Ne u ongoʻi mālohi ʻe faitāpuekina au kapau te u muimui ʻi he fakahinohino kuó u maʻú.
Naʻe kamata ʻi Sānuali ʻeku hoko ko ha tokotaha ngāue temipale ʻi he Temipale Soulú. ʻA ia naʻe fie maʻu ai ke u fononga he houa ʻe taha tuʻo ua he uike ki he temipalé ki hoku taimi ngāué. ʻIkai ngata aí, ka naʻe fononga tuʻo ua taki houa ʻe taha hoku uaifí he uike, ko e tahá ke ngāue he temipalé, pea ko e tahá leva ke ma ō ki he kalasi ʻInisititiuti Tohi ʻa Molomoná.
ʻI heʻeku fakahoko e ngaahi tukupā makehe ko ʻení, naʻe vave ʻene mahino kiate au kuo pau ke tuʻusi hoku taimi ngāué ʻaki ha ngaahi houa lahi he uike takitaha. ʻOku ou ngāue ʻi he tafaʻaki tuʻuakí, ko ia ʻoku totongi fakatatau pē au ki he tokolahi ʻo e kakai ʻoku ou maʻu heʻeku tuʻuakí. Naʻá ku ʻiloʻi ʻe lahi mo e toʻo ʻeku vahé ʻi hono tuʻusi ko ʻeni ʻeku ngaahi houa ngāué. Neongo ia, naʻá ku manatuʻi ʻa e ongo ne u maʻú, pea naʻá ku ʻilo ʻe iku lelei ʻa e meʻa kotoa pē ʻo kapau te u fakatukupaaʻi kakato au ke u muimui ʻi he ʻEikí.
ʻI he toe lahi ange ʻeku ʻalu maʻu pē ki he ʻinisititiutí mo e temipalé, naʻe kamata ke tafe mai ha ngaahi tāpuaki lahi ki heʻeku moʻuí. Ne u fakatokangaʻi ha ngaahi liliu naʻe fuʻu ʻilonga ʻaupito. Ne u ongoʻi ʻoku faʻa toe ofi ange ʻa e Laumālié, pea tupulaki mo ʻeku fakamoʻoni ki he ongoongolelei kuo toe fakafoki maí. Ne u maʻu mo hoku uaifí ha lelei lahi moʻoni mei heʻema ngāue ʻi he temipalé mo ʻalu ki heʻema kalasi ʻinisititiutí. Pea naʻe taʻeʻamanekina foki mo ʻeku maʻu ha ngaahi tāpuaki fakatuʻasino. Neongo hono fakasiʻisiʻi ʻeku ngaahi houa ngāué, ka naʻe lava pē ke u feʻiloaki mo ha kakai tokolahi ange ke fai ki ai ʻeku tuʻuakí. Naʻe ʻikai holo ʻeku paʻanga hū maí; ka naʻe ʻalu hake ia ʻo meimei liunga ua.
ʻOku ou ʻilo naʻe haʻu e ngaahi tāpuaki fakaʻofoʻofa ko ʻení mei he ʻEikí. ʻOku ou houngaʻia ko ʻEne fakafiemālieʻi au ke u ʻiloʻi ko e taimi ko ia ʻoku tau “fuofua kumi ʻa e puleʻanga ʻo e ʻOtuá mo ʻene māʻoniʻoní, …ʻe foaki ʻa e ngaahi meʻá ni kotoa pē kiate kimoutolu” (3 Nīfai 13:33).
Tā fakatātaaʻi ʻe Scott Greer