ʻI he Ngaahi Lea ʻa e Kau Palōfitá
Ko ha Manatu ki he Kilisimasí
Mei he “Ngaahi Meʻaʻofa ke Mataʻikoloa ʻAki,” Liahona, Tīsema 2006, 3–4.
ʻI ha kiʻi tuliki malu ʻi homau ʻapí, ʻoku tuku ai ha kiʻi tokotoko lanu ʻuliʻuli ʻoku kau lanu siliva. Ko e tokotoko ʻo haku kāinga. Ko e hā ʻoku ou kei tauhi ai ia ʻi ha vahaʻataimi kuo laka hake ʻi he taʻu ʻe 70? ʻOku ʻi ai hono ʻuhinga makehe. ʻI heʻeku kei tamasiʻí ne u kau ʻi ha polokalama Kilisimasi homau uōtí. Ne u monūʻia ke u hoko ko e taha ʻo e kau Tangata Poto ʻe toko tolú. Naʻe takai ʻaki hoku ʻulú ha fuʻu holoholo, peá u pulupulu e tupenu ʻufiʻufi piano ʻa ʻeku faʻeé, toʻo e tokotoko lanu ʻuliʻulí ʻi hoku nimá, peá u lau ʻa e lēsoni ne vahe maí: ʻʻOku ʻi fē ia ʻa ia kuo ʻaloʻi ko e Tuʻi ʻo e kakai Siú? He kuo mau mamata ʻi he potu hahaké ki hono fetuʻú, pea kuo mau haʻu ke hū kiate ia” (Mātiu 2:1--2). ʻOku ou manatuʻi lelei pē ʻa e ongo naʻe ʻi hoku lotó ʻi heʻemau sio hake ki he “Kau Tangata Poto” ʻe toko tolú ʻo mamata ki ha fetuʻu, pea mau fononga hake he funga siteisí, ʻo aʻu kia Mele mo e valevale ko Sīsuú, pea mau fakatō mapeʻe ʻo hū kiate Ia mo fakaava pea vete ʻemau ngaahi koloá ʻo foaki ʻemau ngaahi meʻaʻofá: ko e koula, laipeno, mo e mula.
Ko e konga ne u mālieʻia taha aí ko e ʻikai ke mau foki ki he tokotaha angakovi ko Hēlotá ke lavakiʻi ʻa e valevale ko Sīsuú ka mau talangofua ki he ʻOtuá ʻo foki ʻi he hala kehe.
Kuo ʻosi atu e ngaahi taʻu, ka naʻe kei tuku pē ʻa e tokotoko faka-Kilisimasí ʻi ha feituʻu makehe ʻi hoku ʻapí; pea ʻi hoku lotó ha tukupā kia Kalaisi.