Mohuku ki he ʻAiʻangakai ʻo e Manú
“Ko e meʻa kotoa pē ʻoku fakaafeʻi mo poupouʻi ke failelei, mo ʻofa ki he ʻOtuá, pea tauhi kiate iá, ʻoku ueʻi hake ia ʻe he ʻOtuá” (Molonai 7:13).
Naʻe sio fakamamaʻu ʻa Maikolo ki he kiʻi mohenga molū naʻe ngaohi ʻaki e mohukú. Naʻá ne fakakaukau ʻo pehē, “ʻOku ou fiefia ʻe ʻi ai e mohenga molū mo māfana ʻo e valevale ko Sīsuú ʻi he Efiafi ki muʻa he Kilisimasí.”
ʻI he uike kuo hilí naʻe fakahū fakalelei tahataha ai ʻe Maikolo ʻa e ʻū lauʻi mohuku ki he kiʻi ʻaiʻangakai ko ʻení. Naʻe fakakaukau ʻa Maikolo mahalo ko e Kilisimasi lelei taha pē ʻeni kuó ne aʻusia he kuó ne lahi feʻunga ʻeni ke mahino kiate ia ʻa hono ʻuhinga ʻo e Kilisimasí.
ʻI he uike ʻe taha kuo hilí, naʻe fai ai ʻe he fineʻeikí ha lēsoni efiafi fakafāmili ʻi ʻapi ʻo kau ki he ʻuhinga totonu ʻo e Kilisimasí. Naʻá ne pehē ko Sīsū Kalaisi ʻa e meʻaʻofa maʻongoʻonga taha kuo foaki ʻe he Tamai Hēvaní maʻá e māmaní. Hili iá naʻá ne ʻoange ki he kiʻi tamasiʻi/taʻahine takitaha ʻi he fāmilí ha kiʻi ʻaiʻangakai ʻoku teʻeki faʻo ki ai ha mohuku mo ha kiʻi ʻīmisi siʻisiʻi ʻo e valevale ko Sīsuú.
Naʻe pehē ʻe he fineʻeikí, “ʻI he uike hoko maí, te mou maʻu takitaha ha faingamālie ke ʻoatu fakafoki ha kiʻi meʻaʻofa ki he Tamai Hēvaní.”
Naʻe fehuʻi ange ʻe Maikolo, “ʻE lava fēfē ke mau fai ia?”
Naʻá ne pehē mai, “Ko hoʻo meʻaʻofa ki he Tamai Hēvaní ke tokoni ki he kakai kehé. Ko e taimi kotoa pē ʻokú ke fai ai ha ngāue lelei pe tokoni ki ha taha kehe peá ke tānaki atu ha meʻi mohuku ki hoʻo ʻaiʻangakai ʻo e manú. Ko e lahi ange hoʻo fakahā ʻa e angaʻofa ki he niʻihi kehé, ko e molū ange ai pē ia ʻa e kiʻi ʻaiʻangakaí ʻi he Efiafi ki muʻa he Kilisimasí.”
Naʻe fakakaukau ʻa Maikolo, “ʻOku ou ʻamanaki pē te u lava ʻo tuku ha mohuku lahi ange ʻi ha toe taha ʻi heʻeku ʻaiʻangakai ʻo e manú!”
Naʻe kamata ngāue ʻa Maikolo ʻi he ʻaho hono hokó ke tānaki ha mohuku.
ʻI he sio ʻa Maikolo ki hono fakamaʻa ʻe he fineʻeiki ʻa e peitó, naʻá ne ʻeke ange, “ʻE Fineʻeiki, ʻe lava ke u tokoni atu ʻi hono tafi ʻo e falikí?”
Naʻá ne talaange ki hono kiʻi tokoua siʻí ʻi heʻene tangi he mole ʻene meʻavaʻingá, “Te u tokoni atu ke kumi hoʻo kiʻi peá.”
Naʻá ne pehē ange ʻi he taimi naʻe ʻalu ai ʻene tamaí ki tuʻa ke tata e sinou he ʻaluʻangá, “ʻOku ou fie tata sinou mo au.”
ʻI he ʻosi pē ha ngaahi ʻaho siʻi kuo hā kehe e kiʻi ʻaiʻanga-kai ia ʻa Maikoló. Kuo fonu ia he mohukú! Ka naʻe ongoʻi foki ʻe Maikolo mo ha liliu ʻiate ia. Naʻe kamata ke ne fiefia ʻi hono fai ʻo e ngaahi meʻa lelei maʻá e niʻihi kehé he naʻá ne ʻiloʻi ko e meʻa ia naʻe fie maʻu ʻe he Tamai Hēvaní ke ne faí. Taimi ʻe niʻihi kuo ngalo ia ke ne tuku ha meʻi mohuku ki he ʻaiʻangakaí ʻi he taimi naʻá ne tokoni aí.
Naʻe fakakaukau ʻa Maikolo ʻoku hanga ʻe heʻene fai e ngaahi meʻa leleí ʻo ngaohi ia ke ne ongoʻi loto fiefia. ʻI he tuʻu ʻa Maikolo he tafaʻaki ʻo e fanga kiʻi maama he fuʻu ʻakau Kilisimasí, naʻá ne fakatokoto fakalelei ʻene kiʻi valevale ko Sīsuú ʻi he ʻaiʻangakaí, ʻa ia kuo fonu hake ʻi he mohukú.
Naʻe ʻiloʻi ʻe Maikolo kuó ne fai hono lelei tahá ke fakahā ʻa ʻene ʻofa ki he Tamai Hēvaní mo Sīsuú. Ko e toki Kilisimasi lelei tahá ʻeni.
Tā fakatātaaʻi ʻe Jim Madsen.