Ko e ʻUluaki Meʻaʻofa Faka-Kilisimasí
“He naʻe ʻofa pehē ʻa e ʻOtuá ki māmani, naʻá ne foaki hono ʻAlo pē taha naʻe fakatupú” (Sione 3:16).
-
Naʻe kei toe ha ngaahi uike siʻi ki he Kilisimasí, ka naʻe ʻosi fokotuʻu ʻe Tulumani ia mo hono fāmilí ʻa e fuʻu ʻakau Kilisimasí. Naʻá ne fiefia ʻi heʻene fakakaukau atu ki he ngaahi meʻaʻofa naʻá ne ʻamanaki ke sio ki ai he lalo ʻakaú ʻi he pongipongi Kilisimasí.
-
Hili mei ai ha ngaahi ʻaho siʻi, naʻe hū atu ʻa Tulumani ki he loki talanoá peá ne sio ki ha kiʻi puha pē ʻe taha ʻi he lalo ʻakaú. Naʻe kofukofu ʻaki e pepa kulokula pea nonoʻo ʻaki ha loufau lanu mata.
Ko ʻetau ʻuluaki meʻaʻofá ʻeni! Ko hai naʻá ne ʻomaí? Ko e kuifefine nai?
ʻIkai.
Ne ʻomi nai ia ʻe ha taha ʻo kinautolu ʻoku ou tokoua ʻakí?
ʻIkai.
-
Naʻe puputuʻu ʻa Tulumani.
Ko hai leva naʻá ne ʻomaí?
Kiʻi tatali ʻo sio. Ko e meʻa pē te mau lava ʻo talaatú ko ha meʻaʻofa mātuʻaki makehe ia.
-
Ne ʻalu pē ʻahó mo e ʻasi mai mo ha ngaahi meʻaʻofa lahi ange ʻi he lalo ʻakaú, ka naʻe kei fifili pē ʻa Tulumani ki he meʻaʻofa lanu kulokula naʻe nonoʻo ʻaki e loufau lanu matá.
-
Naʻe lele ʻa Tulumani he pongipongi Kilisimasí ke fafangu hono ongo tokouá mo ʻene ongomātuʻá.
ʻĀ hake! Ko e Kilisimasí ʻeni!
-
ʻI he hili e aʻu atu ʻa Tulumani ki he fuʻu ʻakaú, naʻá ne fiefia he sio ki he ngaahi meʻaʻofa ʻi he lalo ʻakaú.
Tulumani, ʻe lava ke ke fakaava e kiʻi puha ʻoku kofukofu ʻaki e pepa lanu kulokulá mo e loufau lanumatá.
Naʻe fiefia ʻa Tulumani ke faifai pea sio ki he meʻa ʻi lotó.
-
Naʻe toʻo ʻe Tulumani ʻa e tāpuní ʻo sio ki ha fanga kiʻi meʻa iiki ʻi ai. Naʻá ne toʻo tahataha hake kinautolu ki tuʻa—ko ha fakatātā ʻo Sīsū Kalaisi, ko ha foʻi maau fekauʻaki mo hono ʻaloʻi ʻo Sīsuú, mo ha foʻi fetuʻu. Naʻe fakaʻaliʻali ʻe Tulumani ʻa e fakatātaá ki he tokotaha kotoa pē ai, pea lau ʻe he tangataʻeiki ʻa e foʻi māú.
Naʻá ku tuku e puhá he lalo ʻakaú koeʻuhí ke tau lava ʻo manatuʻi ʻa hono ʻuhinga totonu ʻoku tau fakafiefiaʻi ai e Kilisimasí.
-
Naʻe fiefia ʻa Tulumani ke ne manatuʻi ʻa Sīsū.
Tangataʻeiki, ko koe naʻá ke tuku e puha he lalo ʻakaú, ka ʻoku ou ʻilo he taimí ni ʻa e tokotaha moʻoni naʻá ne foaki mai ʻa e meʻaʻofa ko ʻení maʻatautolú.
Ko hai?
Tamai Hēvaní.
Tā fakatātaaʻi ʻe Adam Koford