Kuo ʻAloʻi ʻa Sīsū
Naʻe ʻalu māmālie hake ʻa e fakapoʻulí ʻi he ngaahi tafatafa moʻunga lanumata ofi ki Pētelihemá. Ko e faʻahitaʻu failaú ia, ʻa e faʻahitaʻu ʻoku fāʻeleʻi ai e fanga kiʻi lami foʻou tokolahi. Naʻe vakaiʻi taha taha ʻe he kau tauhisipi ne femoʻuekiná ʻa e fanga lamí ki muʻa pea nau toki mohé.
Naʻe femoʻuekina foki mo Pētelihema. Kuo ō mai ha kau fononga tokolahi ki he koló he kuo tala ʻe he pule ʻo e kau Lomá kuo pau ke ō ʻa e kakai kotoa pē ki he kolo ʻo ʻenau ngaahi kuí ke tukuhauʻi kinautolu. Naʻe pau ke kumi ʻe ha toko ua ʻo e kau fonongá—ʻa Siosefa mo hono uaifi ko Melé—ha feituʻu ke na nofo ai he pō ko iá.
Naʻe faifai pea maʻu ʻe Siosefa mo Mele ha feituʻu naʻe tauhi ai e fanga manú. Naʻe fāʻeleʻi ʻa e valevale ʻa Melé ʻi he ʻaiʻangakai māʻulalo ʻo e manú. Ko e valevalé ko e ʻAlo ia ʻo e ʻOtuá, ko e Fakamoʻui ʻo e māmaní.
Naʻe takatakai ʻe Mele ʻene tamá ʻaki ʻa e kofu maʻa pea ʻai Hono kiʻi mohenga ʻi he mohuku molu mo maʻa ko ia ʻo e ʻaiʻangakaí. Naʻe ʻiloʻi ʻe Siosefa ko e pēpe ko ʻení ko e ʻAlo ia ʻo e Tamai Hēvaní. Naʻá ne ui ʻa e valevalé ko Sīsū, ʻo hangē ko hono fakahā ange ki muʻa ʻe he ʻāngeló.
Naʻe fiefia ʻa e kau ʻāngelo ʻo e langí! Naʻe fakahoko e ngaahi talaʻofa ʻa e kau palōfitá. Kuo ʻaloʻi ki he māmaní ʻa Sihova, ʻa ia ʻoku ui he taimí ni ko Sīsuú. Naʻe ulo ha fetuʻu foʻou ʻi he langí ke ne talaki ʻa e ongoongo leleí.
Naʻe hā ha ʻāngelo ki he kau tauhisipí ʻi ha tafa-moʻunga, pea naʻe ulo takai ai ha maama naʻe ulo lahi. Ne teʻeki sio ʻa e kau tauhisipí ʻi ha meʻa pehē, pea naʻa nau manavahē lahi.
Naʻe pehē ʻe he ʻāngeló, “ʻOua ʻe manavahē: vakai, he ʻoku ou ʻomi kiate kimoutolu ʻa e ongoongo lelei ʻo e fiefia lahi, ʻa ia ʻe hoko ki he kakai fulipē. He kuo ʻaloʻi kiate kimoutolu ʻi he ʻaho ni, ʻi he kolo ʻo Tēvitá,ʻa e Fakamoʻui, ʻa ia ko Kalaisi ko e ʻEikí. Ko e fakaʻilonga ʻeni kiate kimoutolu; Te mou ʻilo ʻa e tamasiʻí kuo takatakai ʻaki ʻa e kofu, pea tokoto ia ʻi he ʻaiʻangakai ʻo e manú.”
Fakafokifā, naʻe ʻi ai ha kau ʻāngelo pea naʻa nau pehē ki he kau tauhisipí, “Fakafetaʻi ki he ʻOtua ʻi ʻolungá, pea ʻi māmani ʻa e melinó, ko e ʻofa ki he kakaí.”
ʻI he mavahe atu ʻa e kau ʻāngeló, naʻe omi fakavavevave ʻa e kau tauhisipi naʻe ofó ki Pētelihema , ʻo ʻilo ʻa e valevale ko Sīsuú ʻoku tokoto ʻi he ʻaiʻangakai ʻo e manú. ʻI he foki ʻa e kau tauhisipí ki heʻenau fanga sipí, naʻa nau fakafetaʻi ki he ʻOtuá pea fakahā ki ha niʻihi kehe ʻa e ngaahi meʻa kotoa ne nau mamata aí.
Selusalema
Pētelihema
Mei toʻohemá: konga naʻe toʻo mei he Ko Kalaisi mo e Talavou Koloaʻiá, tā ʻe Heinrich Hofmann, ʻi he angalelei ʻa e C. Harrison Conroy Co.; tā ʻo Pētelihemá naʻe fai ʻe Scot Proctor; mape mei he Mountain High Maps © 1993 Digital Wisdom; ngaahi tā fakatātā ʻa Sam Lawlor; tā valivali ʻo e Kau Tangata Potó naʻe fai ʻe Paul Mann © 1999 IRI