Ko Hoku Kilisimasi Lelei Tahá
Morten Sønderskov, Tenimaʻake
Naʻe puke lahi ʻeku faʻeé ʻi ha Tīsema ʻe taha, heʻeku kei siʻí. Naʻá ne vaivaia tupu mei he faitoʻo naʻá ne fakaʻaongaʻí, pea naʻá ne mohe he houa ʻe 18 nai ʻi he ʻaho.
Koeʻuhí naʻe ʻikai mali ʻema faʻeé, naʻá ma feinga ai mo hoku taʻoketé ke fakalele homau ʻapí ʻi he lelei taha naʻá ma lavá, ka naʻá ma kei siʻi pea ʻikai ke ma taukei, pea naʻe ʻikai ke fuʻu ola lelei ʻema feingá. Hili ha ngaahi ʻaho lahi mei he puke ʻema faʻeé naʻá ma kumi ha meʻa ke ma kai. ʻI heʻema kumi holo he peitó, naʻe lea ʻa e fafangu ʻo e matapaá.
Naʻe tuʻu he falefakatoló ha fefine mei homau uōtí ʻokú ne toʻotoʻo ha meʻakai. Naʻe ʻikai te ne ʻiloʻi ʻe ia ʻemau fie maʻú, ka ko ʻeni kuo haʻu mo e meʻakai. Naʻá ne ʻeke mai e fuoloa ʻo e puke ʻa ʻema faʻeé pea naʻá ma fēfē ʻi he fuʻu fuoloa pehē ʻema tokangaʻi homau ʻapí. Naʻá ma talaange ne ma fai pē homa lelei tahá, ka naʻe hounga kiate kimaua ʻene angaʻofa ʻo ʻomi ʻemau meʻakaí.
ʻI he foki atu ʻa e fefiné ni mei homau ʻapí, naʻá ne telefoni ki he palesiteni Fineʻofá ʻo fakahā ange ʻa e tuʻunga naʻe ʻi ai homau fāmilí. ʻI he ʻaho hono hokó mo e ngaahi ʻaho lahi hokohoko mai aí, naʻe ʻomi ʻe he kāingalotu ʻo e uōtí ʻa e meʻakai ki homau ʻapí. Naʻa mau houngaʻia lahi ai! Ko e meʻa naʻe ʻikai ke mau kai he taimi ko iá, naʻá ma tuku ia ʻi he ʻaisí, pea tupu mei he angalelei ʻa homau uōtí, naʻe hulu ʻānoa e meʻakai ʻa homau fāmilí ʻi he māhina ʻe tolu hono hokó. Ka ne ʻikai ngata pē ai ʻa e angaʻofa ʻa e niʻihi kehé.
Ne ofi mai ʻa e Kilisimasí, pea naʻe māmālie pē ʻa e fakaakeake ʻa e fineʻeikí, ka naʻe teʻeki ai ke ne aʻu ki hono tuʻunga naʻe ʻi ai ki muʻá. Naʻe haʻu ʻeku faʻētangatá mei Koupeniheikeni, ʻa ia naʻe maile ʻe 40 (kilomita ʻe 65) hono mamaʻó, ke tokoni ki he ngaahi teuteu ki he Kilisimasí. Naʻá ne angaʻofa ʻo fai e ngaahi meʻa naʻá ne lavá, ko hono ʻomai ha fuʻu ʻakau Kilisimasi mo ha meʻakai ki he fakafiefia homau fāmilí. Naʻá ne fakatau mai foki mo ha meʻaʻofa maʻa hoku tokouá mo au. Ne ma fakatau mai leva ʻe kimaua ʻa e ongo meʻaʻofa feʻunga pē maʻa ʻema faʻeé mo e faʻetangatá. Naʻá ma ʻiloʻi ʻa e lahi ʻo e ngaahi meʻa ke ma fakamālō aí, ka koeʻuhi ko e fānau pē ʻa kimaua, naʻá ma kiʻi ongoʻi loto mamahi ʻi he Kilisimasi ko ʻení.
Ne tatangi e fafangu he matapaá ʻi he Efiafi ki muʻa he Kilisimasí. Ne u fakasio ki tuʻa he matapā sioʻatá ka ne ʻikai ke u sio ki ha taha. Ne u pehē mahalo ko ha taha pē naʻe haʻu ʻo pauʻu, ka naʻe talamai ʻe hoku tokouá ke u fakaava e matapaá. Ne mau ʻiloʻi ʻi homau falefakatoló ha fuʻu kato naʻe fonu ʻi he meʻakaí mo e ngaahi meʻa kehekehe fakataha mo ha ngaahi meʻavaʻinga. Ne ma ʻilo fakapapau naʻe ʻomi ia ki he ʻapi hala. Naʻa mau ō ki he fale ʻo e kaungāʻapí ʻo ʻeke pe naʻe ʻi ai ha kato naʻe totonu ke ʻomai ki honau ʻapí, ka ne nau ʻosi ō kinautolu. Ne u toki fakatokangaʻi atu leva naʻe ʻosi tohi pē homau hingoá ʻi he ngaahi meʻaʻofá. Ne aʻu pē ki ha ngaahi meʻa maʻa ʻeku faʻētangatá. Naʻe ʻi ai ha tokotaha naʻe fakakaukau mai kiate kimautolu.
Naʻe ngaohi ʻe he angaʻofa ʻa kinautolu naʻe ʻikai fakahā mai honau hingoá ki homau fāmilí he taʻu ko iá ke hoko ʻa e Kilisimasi naʻe meimei taʻeoli mo fakamamahí ko e Kilisimasi lelei taha ʻo ʻeku moʻuí. ʻOku ou kei ongoʻi pē he ʻahó ni ʻa e angaʻofa mo e ʻofa ne fakahā mai kiate kimautolu ʻe he niʻihi kehé.