Pōpoaki ʻa e Faiako ʻAʻahí
Ko Hotau Fatongiá ke Kau ʻi he Ngāue Fakatemipalé mo e Hisitōlia Fakafāmilí
Ako ʻa e fakamatala ko ʻení, pea ka feʻunga, aleaʻi ia mo e houʻeiki fafine ʻokú ke ʻaʻahi ki aí. Fakaʻaongaʻi ʻa e ngaahi fehuʻí ke tokoni ʻi hoʻo fakamālohia ʻa e kau fefiné pea ʻai ke hoko ʻa e Fineʻofá ko e konga maʻu pē ia hoʻo moʻui fakafoʻituituí.
Tuí • Fāmilí • Fakafiemālié
Kuo pekia ha kakai tokolahi ʻi he ngaahi senituli kuo hilí mo e ʻikai haʻanau ʻilo ki he ongoongoleleí. Ko e niʻihi ʻo e kakaí ni ko ho kāinga ofi mo e kāinga mamaʻo. ʻOku nau tatali mai ke ke fai ʻa e ngaahi fekumi ʻoku fie maʻú ke fakafehokotaki fakataha homou ngaahi fāmilí pea fakahoko mo e ngaahi ouau fakamoʻuí maʻanautolu.
ʻOku ʻikai femoʻuekina feʻunga ʻa e ngaahi temipale lahi ʻo e māmaní. Kuo talaʻofa ʻe he ʻEikí ʻe liliu homou lotó ki he ngaahi tamaí koeʻuhí ke ʻoua naʻa fakaʻauha ʻo ʻosiʻosingamālie ʻa e māmaní kotoa ʻi Heʻene hāʻele maí (vakai, T&F 2:2–3).
ʻOku ʻi ai ha ngaahi tāpuaki fakatāutaha ʻoku tupu mei hoʻo kau ʻi he ngāue fakatemipalé mo e hisitōlia fakafāmilí. Ko e taha ʻo kinautolú ni ʻa e fiefia ko ia ʻokú ke maʻu ʻi hoʻo tokoniʻi hoʻo ngaahi kuí. Ko e tāpuaki ʻe taha ʻa hoʻo feʻunga ko ia ke maʻu ha lekomeni temipalé, ʻa ia ʻokú ne fakahā ʻa hoʻo moʻui taau ʻi he ʻao ʻo e ʻEikí. ʻOku totonu ke ngāue ʻa kinautolu ʻoku ʻikai ke nau moʻui taau he ʻahó ni ke maʻu ha lekomeni temipale mo ngāue fakataha mo e pīsopé pe palesiteni fakakoló ke nau moʻui taau ʻi he vave tahá. Kātaki ʻo ʻoua naʻa taʻe ʻi ai haʻo tohi fakamoʻoni mahuʻinga peheni. ʻOku ou fakamoʻoni ʻoku moʻoni ʻa e Fakaleleí pea ʻe lava ke fakamolemoleʻi ʻa e ngaahi angahalá ʻi haʻatau fakatomala ʻi he founga totonú.
ʻI heʻetau kau atu ki he ngāue fakatemipalé mo e hisitōlia fakafāmilí, ko e meʻa pau pē ʻa ʻetau maʻu ʻa e Laumālié ke fakafiemālieʻi kitautolu ʻi hotau ngaahi faingataʻaʻiá mo fakahinohino kitautolu ʻi he ngaahi fili ʻoku mahuʻingá. Ko e konga ia ʻo ʻetau ngāue fakatemipalé mo e hisitōlia fakafāmilí ko ʻetau foaki ʻa e fakafiemālié, pe tokoni ki heʻetau ngaahi kuí.
Julie B. Beck, palesiteni lahi ʻo e Fineʻofá.
Mei he Folofolá
Malakai 4:5–6; 1 Kolinitō 15:29; 1 Pita 3:18–19; T&F 110:13–16; 128:24
Mei Hotau Hisitōliá
“Naʻe pehē ʻe he Palōfita ko Siosefa Sāmitá, ‘Ko e fatongia maʻongoʻonga taha kuo tuku mai kiate kitautolu ʻe he ʻOtuá ʻi he māmaní ke tau fekumi ki hotau kau pekiá’ (History of the Church, 6:313). Talu mei he kamataʻangá mo hono poupouʻi e he kau Fineʻofá ʻa e ngāue maʻongoʻongá ni. ʻI Nāvū ʻi he 1842, naʻe hanga ʻe he holi naʻe maʻu ʻe Sela M. Kimipolo ke tokoniʻi e kau ngāue langa temipalé ʻo ueʻi ha kau fafine ke nau fokotuʻutuʻu kinautolu ke nau lava ʻo toe ngāue lelei ange. ʻI he kamata ʻenau fakatahá, naʻe fokotuʻu … ʻe he Palōfitá ʻa e fuofua Fineʻofá ʻo fakatatau ki he sīpinga ʻo e lakanga fakataulaʻeikí. Mei he taimi ko iá ne tokoni leva ʻa e kau Fineʻofá ke laka ki muʻa ʻa e ngāue ki he Temipale Nāvuú. …
“ʻI he 1855, hili ia ha taʻu ʻe valu mei he ʻuluaki tūʻuta ʻa e Kāingalotú ʻi ʻIutaá, naʻe fokotuʻu ʻa e Fale ʻEnitaumení. Naʻe uiuiʻi ʻe Palesiteni Pilikihami ʻIongi ʻi he 1866 ʻa ʻElisa R. Sinou ke hoko ko e palesiteni lahi ʻo e Fineʻofá ko e taha ia ʻo e kau fuofua mēmipa ʻo e ʻUluaki Fineʻofá pea naʻá ne tauhi mai ʻa e ngaahi lekooti ʻo e kautahá. Naʻá ne ngāue faivelenga mo ha kau fafine kehe ʻi he Fale ʻEnitaumení. Pea hili ʻa e kakato hono langa ʻo e Temipale Seni Siaosí, Lōkaní, mo Manitaí, naʻe fononga e kau fafiné ni ki he temipale takitaha ke nau fakahoko ʻa e ngāue maʻá e kau pekiá.”1
Faitaaʻi ʻe Jerry Garns