ʻOku Mau Lea ʻia Kalaisi
Ko e Meʻaʻofá
Ko e taha ʻo e ngaahi hiva Kilisimasi ʻoku ou manako taha aí ko e “Kuo ʻAloʻi Mai ha Tamá” mei he Mīsaiaʻa Hanitelí. ʻOkú ne fakamanatu mai ʻa hono ʻuhinga ʻo e Kilisimasí. ʻOku ou faʻa fifili pe ko e hā nai e ongo naʻe maʻu ʻe Mele ʻi hono fakahā ange ʻe he ʻāngelo ko Kepalelí, “Siʻoto ʻofa, ʻokú ke ʻofeina lahi, ʻoku ʻiate koe ʻa e ʻEikí: ʻokú ke monūʻia ʻi he fefine fulipē” (Luke 1:28).
Naʻe tāfuʻua ʻa Mele ʻi he meʻá ni, pea hoko atu e lea ʻa e ʻāngeló:
“Mele, ʻoua ʻe manavahē: he ʻokú ke ʻofeina mei he ʻOtuá.
“Pea vakai, te ke tuʻituʻia ʻi ho manavá, pea fāʻeleʻi ʻa e tama, peá ke ui hono huafá ko Sīsū.
“Pea ʻe lahi ia, pea ʻe ui ia ko e ʻAlo ʻo e Fungani Māʻolungá: ʻe ʻange kiate ia ʻe he ʻEiki ko e ʻOtuá ʻa e nofoʻa ʻo ʻene tamai ko Tēvitá:
“Pea ʻe pule ia ki he fale ʻo Sēkopé ʻo taʻengata; pea ʻe ʻikai hano ngataʻanga ʻo ʻene pulé” (Luke 1:30–33).
Toki meʻa fakaofo moʻoni ʻeni! ʻE hoko ʻa e tama naʻe talaʻofa ʻaki kia Melé ko e ʻAlo pē Taha ʻo e Tamai Hēvaní Naʻe Fakatupu ʻi he kakanó. Kuo fili ia ke ne ʻomi ki he māmaní ʻa e meʻaʻofa mahuʻinga tahá: ʻa hotau Fakamoʻui ko Sīsū Kalaisí.
Naʻe foaki mai ʻe he Tamai Hēvaní ʻa e meʻaʻofá ni kiate kitautolu hono kotoa, talavou pe motuʻa, koloaʻia pe masiva. Naʻe ʻikai fie maʻu ia ke tau fekumi ki ai ʻi he ngaahi falekoloá. Naʻe ʻikai mole ki ai haʻatau sēniti ʻe taha. Naʻe ʻikai ke kofukofuʻi mai ʻaki ia ha pepa ngingila. Naʻe takatakai ʻaki ʻa e meʻaʻofa mahuʻinga tahá ha pulupulu ʻo ha valevale pea fakatokoto ʻi ha ʻaiʻangakai ʻo e manú. Naʻe ʻomai ia kiate kitautolu hono kotoa fakataha mo e ʻofa mei heʻetau Tamai Hēvaní.
Pulupulu ʻo ha Valevale, tā ʻe Liz Lemon Swindle, Foundation Arts, ʻoua naʻa hiki hano tatau