Talafungani ʻo e Ongoongoleleí
Ko e Talanoa ʻOku Foʻou Maʻu Peé
Kuo ʻikai ha taha ʻe moʻui ʻi he māmaní te ne fakaʻaongaʻi ʻa e ivi tatau ki he ngaahi ikuʻanga ʻo e māmaní ʻo hangē ko ia naʻe fakahoko ʻe hotau ʻEiki mo e Fakamoʻui ko Sīsū Kalaisí.
Ko ha talanoa motuʻa ʻa e talanoa ʻo Sīsū ko e Kalaisí ʻa ia ʻoku ongo foʻou maʻu pē. Ko e lahi ange ʻeku faʻa laukonga kau ki Heʻene moʻuí mo ʻEne ngaahi ngāué ko e lahi ange ia ʻa e fiefia, nonga, mo e nēkeneka ʻokú ne fakafonu hoku laumālié. ʻOku haʻu maʻu pē kiate au ha ongo foʻou ʻi heʻeku fakakaukauloto ki Heʻene ngaahi folofolá pea mo e palani ʻo e moʻuí mo e fakamoʻuí naʻá Ne akonaki ʻaki ki he tangatá lolotonga ʻEne moʻui ʻi he māmaní.
ʻOku tau ʻilo kotoa pē kuo ʻikai ha taha ʻe moʻui ʻi he māmaní te ne fakaʻaongaʻi ʻa e ivi tatau ki he ngaahi ikuʻanga ʻo e māmaní ʻo hangē ko ia naʻe fakahoko ʻe hotau ʻEiki mo e Fakamoʻui ko Sīsū Kalaisí; ka ne ʻikai ʻiloa Hono ʻaloʻí, naʻe fakatokoto Ia ʻi ha ʻaiʻangakai ʻo e manú. Naʻá Ne fili ha kau tangata toutai naʻe masiva pea ʻikai poto ke hoko ko ʻEne kau ʻAposetoló. Kuo ʻosi atu ʻa e taʻu ʻe 1,900 [tupu] mei hono Tutuki Iá, ka ʻoku kei ongo pē ʻi he loto ʻo ha kakai ʻe lauimiliona ʻi māmani ha fakamoʻoni ki hono faka-ʻOtua ʻo e ngāue naʻá Ne fakahokó, neongo ʻa e tau mo e moveuveu kotoa ʻoku hokó. …
Ko ha maʻuʻanga fiefia ia kiate au ʻoku ʻikai hano ngataʻanga pea ʻoku fonu hoku lotó ʻo ʻikai lava ʻe hoku mālohí ke fakamatalaʻi ʻeku fakakaukau ki he foʻi moʻoni naʻe ʻaʻahi mai ʻa e ʻOtua ko ʻetau Tamai Hēvaní mo hotau ʻEiki ko Sīsū Kalaisí ki māmani ʻo toe fakahā mai ʻa e ongoongoleleí ki he tangatá; pea ʻoku fonu hoku lotó ʻi he fakamālō mo e fakafetaʻi, ʻoku ʻikai faʻa malava ʻe hoku mālohí ke fakamatalaʻi, ʻEne tāpuakiʻi au ʻaki ʻa e ʻilo ki hono faka-ʻOtua ʻo e ngāue ʻoku tau kau ki aí. Kuo hoko ko ʻeku lotu tāumaʻu mo fakamātoato maʻu pē kiate Ia ke ʻoua ʻaupito naʻa ʻi ai ha taimi ʻe fakapoʻuli ai hoku ʻatamaí, ke ʻoua ʻaupito naʻa ʻi ai ha taimi te u mavahe ai mei he hala ʻo e angatonú, ka ke u tupulaki ʻi he mahinó ʻi he fakaʻau ke u motuʻa angé, pea ke lava ʻo māfana ʻi hoku lotó ʻa e maama mo e ueʻi ʻa e Laumālie ʻo e ʻOtuá ʻo fakamāmaʻi ʻa ʻeku ʻiló pea ngaohi au ke u tuʻumaʻu mo faivelenga ʻi he tauhi ki heʻeku Tamai Hēvaní.
Pea ʻoku ou fie lea ki he Kau Māʻoniʻoni ʻi he Ngaahi ʻAho Kimui Ní, ʻoku fie maʻu kitautolu kuo tau maʻu ha fakamoʻoni ki hono faka-ʻOtua ʻo e ngāue ʻoku tau kau ki aí, ke tau fakamaau ʻetau moʻuí ʻi he ʻaho takitaha ʻi ha founga ʻe fakalāngilangiʻi ai ʻa e ngāue ʻa e ʻOtuá ʻi he ngaahi ngāue lelei ʻoku tau faí, pea ulo atu ʻa ʻetau māmá ʻo mamata ʻa e kakaí ki heʻetau ngaahi ngāue leleí, pea fakalāngilangiʻi ai ʻa e ʻOtuá. Kuo ʻikai mo ha kakai ʻi he funga ʻo e māmaní ʻe monūʻia ange ʻo hangē ko e Kau Māʻoniʻoni ʻi he Ngaahi ʻAho Kimui Ní; kuo ʻikai mo ha kakai kuo fakahā ki ai ʻa e angalelei mo e ʻaloʻofa mo e kātaki fuoloa ʻa e ʻOtuá ʻo hangē ko ia kuo foaki kiate kitautolú, pea ʻoku ou pehē ai, ʻoku totonu ke tau moʻui ʻi he anga faka-ʻOtua mo e angatonu ʻo laka hake ʻi he kakai tangata mo fafine kotoa ʻi he māmaní.
Faʻē mo e Tama, tā ʻe Kirk Richards; faitaaʻi ʻe Christina Smith