Ko ʻEtau Tafaʻakí
Ngaahi Tuʻunga Moʻuí: Ko e Kavenga pe ko ha Tāpuaki?
Ko kinautolu ʻoku nau pehē ʻoku ʻi ai e ngaahi fakataputapui ʻi he ngaahi tuʻunga moʻui ʻa e Siasí, ʻoku ngalingali ʻoku ʻi ai ha niʻihi ʻo e kāingalotú ʻoku nau fakakaukau ʻoku fakakavenga ʻa e ngaahi tuʻunga moʻuí ʻo ʻikai ke hoko ia ko ha meʻa ʻaonga ki heʻenau moʻuí. Kapau ʻokú ke loto ke ʻiloʻi ʻe ho ngaahi kaungāmeʻá ʻoku fakatauʻatāinaʻi koe ʻe hoʻo ngaahi tuʻunga moʻuí mei he maʻunimā ʻe ha faʻahinga tōʻonga moʻuí, moʻui fiefia mo feinga leva ke ke fakahaaʻi ʻa e fiefia ʻokú ke maʻú ʻo fakafou ʻi ha sino, ʻatamai, mo ha loto ʻoku moʻui lelei. ʻOku tau faiako ʻaki ʻa e faʻifaʻitakiʻanga, ʻo ʻikai ʻaki ʻa e leá pē. Fakahā kiate kinautolu ʻa e ngaahi tāpuaki ʻo e ngaahi tuʻunga moʻuí ʻaki e founga ʻokú ke fakaʻaongaʻi ʻaki hoʻo tauʻatāina ke filí ki he ngaahi meʻa ʻoku leleí.
Patience O. (toʻomataʻu), taʻu 19, Falanisē
Fekumi ki ha Kaumeʻa
Ne u tui maʻu pē ki he mālohi ʻo e lotú. ʻI heʻeku fuofua hiki ki ʻĒsiá, ne u tatali ʻi ha māhina ʻe ua ke kamata ha semesitā foʻou peá u toki kamata ako. Neongo ʻeku fiefia he fakataha mo hoku fāmilí, ka naʻá ku fie maʻu haku kaumeʻa lelei ʻokú ma tui tatau. Ne iku ke u feʻiloaki kotoa mo hoku ngaahi kaungāʻapí, pea neongo ne u toʻu mo ha niʻihi, ka naʻe ʻikai ke nau maʻu ʻa e ngaahi tuʻunga moʻui tatau mo au.
ʻI he taimi ne u lava ai ʻo ʻalu ki he akó, naʻá ku feʻiloaki mo ha fānau tokolahi ne mau toʻu ʻo maʻu ai hoku ngaahi kaungāmeʻa. Naʻe ʻi ai e taimi ʻe taha ne u ʻalu ai mo haku ngaahi kaungāmeʻa ʻo maʻu meʻatokoni efiafi. Hili ʻemau kaí, naʻe ʻalu ha niʻihi ia ʻo hoku ngaahi kaungāmeʻá, kae fie nofo pē ha niʻihi ʻo fakakaukauʻi ha meʻa ke fai, pea nau fakakaukau leva ke nau ō ʻo inu kava mālohi. Naʻa nau fakaafeʻi au ka naʻá ku talaange ʻikai. Naʻe toe ʻāsili ange ʻeku ongoʻi taʻelatá. Naʻá ku foki ki ʻapi he pō ko iá ʻo lotu ke maʻu haku kaumeʻa lelei.
Hili mei ai ha ngaahi uike siʻi, naʻá ku toe ʻalu mo haku ngaahi kaungāmeʻa ʻo maʻu meʻatokoni efiafi, peá u fakamahinoʻi ange he ʻikai te u ʻalu ʻo inu mo kinautolu. ʻI he ʻosi e kaí, naʻa nau ō kotoa ʻo inu tuku kehe pē ha toko taha. Naʻe kamata ke ma talanoa ʻo ma ʻiloʻi ai naʻe tatau ʻema ngaahi tuʻunga moʻuí—ko ha ngaahi tuʻunga moʻui ne ma fili fakatāutaha pē ki ai.
ʻOku ou ʻilo ʻoku tali maʻu pē ʻe he Tamai Hēvaní ʻa e ngaahi lotú.
Jordan H., taʻu 17, Tekisisi, USA
Ko e Potufolofola ʻOku ou Manako Taha Aí
Ko e taimi kotoa pē ʻoku ou manatuʻi ai e vēsí ni, ʻoku ou fakamanatu pē kiate au kapau te u fai hoku fatongiá ʻi he māmaní (ʻa ia ko e muimui ki he ngaahi fekau ʻa e ʻEikí), ʻe fakapaleʻi ʻaki au ʻa e ngaahi meʻafoaki kuo talaʻofa mai ʻaki ʻe he ʻEikí.
Roland D. (ʻolungá), taʻu 17, Pengasina, Filipaini
Tā ʻo e ongo vaʻakau kaí (chopsticks) © Getty Images; Ko Mōsese mo e Ongo Maká, tā e Jerry Harston © IRI