Iesu Kristo bon au Tia Kamaiu ao te Tia Kabooi Maiura

Iroun Ana Maria Coburn ao Cristina Franco

Ko kona ni kamanena te reirei aei ao te waaki ni kakukurei n reireiniko riki ibukin ana boto n iango te Moanrinan ibukin te namakaina aio.

“Ti kakoaua bwa rinanon ana Mwakuri ni Kamaiu Kristo, aomata ni kabane a kona ni kamaiuaki, man te ongotaeka nakon tuua ao otenanti n te Euangkerio.” (Taekan te Onimaki 1:3).

Terana ae ko na tauraoi n anga ibukin temanna ae ko rangi, n tatangiria? Ara Tia Kamaiu, Iesu Kristo, e rangi n tangiriira n te aro are E anga oin maiuna ibukira.

Tamara are i Karawa e ataia bwa ngkana ti bure ao ni karaoa te kaairua, ti na aki ko na ni maeka ma ngaia riki. Aingaia are Natina, Iesu Kristo, e anga ngaia bwa ara Tia Kamaiu. Tamara are i Karawa e rineia bwa e na kamaiura ibukina bwa tii ngaia ae e kona ni maiu n akea ana bure.

Iesu e mmaraki ao e mate bwa e na kamaiura man te mate ao ara bure. Te mwakuri n tangira aio e aranaki bwa te Mwakuri ni Kamaiu. Ibukin te Mwakuri ni Kamaiu, ti kona n raira nanora man ara bure, ni kabwaraaki ara bure, ao n riki n itiaki ao ni kororaoi n aiaron Iesu.

Iesu e bon tauraki ao man mate, ma imwiin tenibong E a manga kautaki. E a manga maiu! Ibukina bwa e a manga uti, ti na manga uti naba. E nanonaki n aio bwa rabwatara ao tamneira ana manga bootaki n akea tokiia.

Ni koauana, Iesu Kristo bon ara Tia Kamaiu ao te Tia Kabooira. Bon te katotoo ae te kabanea n tamaroa ibukira ni kabane. E reireiniira bwa ti na kanga n reitaki n tatabemaniira nako ma te akoi. E reireiniira bwa ti na kanga ni buokiira i bon imanerara. E reireiniira bwa ti na kanga n rikirake n tamaroa riki. Ti aki kona ni maiuakina te maiu ae kororaoi n airona, ma ti kona n okiria ni maeka ma Iesu Kristo ao Tamara are i Karawa n ongotaekara n taian tua ao ni karaoa ara kabanea n tamaroa. Ti tangiria n iriia Iesu Kristo ni katoa bong.