Iango Ibukin te Bootakin te Utu n te Tairiki
Te iango aio iai kanoana rongorongo ao waaki ni kakukurei ake a na kona ni kamanenaaki ibukin te bootakin te utu.n te tairiki. Aika imwiina bon katooto tabeua.
“Ni Ururinga n Taai Nako,” iteraniba 20: Iangoia ni maroroakinna n te utu ana taeka n reirei Unimwaane Christofferson “Ti kona ni moan waakinna man kanakoan bwaai ni kabane man maiura ao ni kaoki ni kabane ni karinanakin ake a moanibwai bwa te Tia Kamaiu mai i nuuka.” Iangoi taekinan tabeua kakabwaia ake taekin Unimwaane Christofferson ake a na roko ngkana ti “aki toki ni ururinga te Tia Kamaiu.”
“Mwaakan te Koroboki ae Tabu,” iteraniba 52: Imwin warekan te rongorongo aio ni bootaki, kaoia membwa n te utu n tibwauai aia namakin ibukin warekan koroboki aika a tabu ao iirakin tieminari. Kaoia bwa a na koroi aia koaua inanon aia tienero ni kaineti ma mwakan koroboki aika tabu. Kaungaia natim bwa ana kamatebwai ao ni kamatenanoi koroboki aika a tabu n te kaati-ataakin koroboki aika tabu.
“Te Tia Raoi Iesu Kristo,” iteraniba 56: Ngkai kam ikotaki ni wareka te rongorongo, kaoia am utu n ongora ibukinkakawakin te tia raoi. Titirakinia bwa tera ae e na tia n riki ngke e a tia n aki buoka te mwaane are e taraau te tia raoi. Ko kona naba ni wareki koroboki aika tabu ao ni maroroakinna bwa e kanga te Tia Kamaiu n riki bwa ara tia raoi. Iangoia ni wareka 2 Nibwaai 2:27–28 ao Aramwa 42:24–25.
“Ti Bane ni Kunnikainira,” iteraniba 70: Iangoia ni kaoia membwa n te utu ni kunnikainia ni bon oin katein kunnikaia ke ni baka n riki bwa temanna. Anganiia n tatabeman te tai n tibwauaia bwa antai ngaia. Imwiin warekan te karaki, kabwarbwara bwa e aki akaka bwa baikara mwakuri ake ti karaoi, ngaira n taai nako bon natin te Atua.
Taai aika a Kakukurei ao Kabaebae aika Akea Tokiia
Ngke a uarereke natiu, a tangiria n takakaro imwiin te bootakin te Utu n te tairiki. Teuana maamaten nanoia, “Turangki te Erebwanti,” e aranaki man ana anene natira te aine, Jocelyn, ae reiakinna n te reirei. Imwiin tiara nikabane n anenea te anene, Nna riki bwa Turangki ao ni katokaia natiu iaon nukau. Te moan, natiu temmwaane ae uoua ana ririki, Jorge; imwina, natiu te aine ae aua ana ririki, Jocelyn; ao te kabanea buu, Elizabeth, are e na tamwarake iaoou. Ni kateniman nikabane iaon nukau, N na kararaunia ni katobibia te ru ni katangaina. Ti bon rangi ni kukurei.
Ririki imwina, natiu ake a ikawai a kaai n tataninga ibukin weteaia ni mitinare. N tain teuana te bootakin te Utu n te tairiki, a uringa “Turangki te Erebwanti.” Ti ikotaki n anenea te anene; ngkanne, imwiin te motirawa n ririki aika bati, I a manga riki naba bwa te erebwanti. Te moan natiu te mwaane, imwiina natiu te aine, ao te kabanea tinaia are e tamwarake iaon nukau. N tokina ao I borarabaua iaon te buroa, ao ti bane ni ngare n tokina.
Ururingan te tai anne e kakukureia nanora bwa burabeti a tia n reireinira rongorongon te bootaki n Utu n te tairiki. Ti reiakinna bwa aekakira aron bebeten karaoan ara bootaki n Utu n te tairiki, e kona n riki bwa te bwai ae rangi ni kakaawaki bwa ara tai ae kakukurei ma ara utu, taai ake e kakorakora kabaeakira n te tai are akea tokina.
Víctor G. Chauca Rivera