Man te Tabo ni Waakinan te Mwakuri ni Mitinare
Te Kanikina n Au Kakabwaia
I mwakuri i Texas Houston i Maiaki n te Aro bwa te mitinare ngai ibukin te taetae n Tibein. N te bongina ao ngai ma toau ti a mwananga ni karebwerebwe iaon mataroa, ni kataia ni kakaeia aomata ake ti na reireiniia. Ti roko n te auti ae iai te bwangabwanga ae bubura, ni bwarantana te kai.
Te unaine are e kaekaira n te mataroa ao e kariniira. I aki koaua ngkana e bon ataira raoi bwa antai ngaira ao terana ae ti karaoia, ma e bon rangi n ataa te katei. Ti a moanna n anga ara moan reirei, ao bwaai a taraa n nakoraoi. E aki maan ao e a roko au tai n anga reirei n taekan Iotebwa Timiti ao te Moan Kaotioti. I noora ubun te aine ngke e a moanna ni kaota te aki oota. E bon mataata bwa e aki iira te bwai are I kataia ni kabwarabwaraa nakoina.
Imwiin titirakinana tabeua titiraki ibukin bwaai ake ti a tia n rinanona ao mwaitira bwaai ake e a tia n atai, I namakinai bwa I a rikirake ni bwarannano bwa bon akea te bwai ae reke irouna ibukin te Moan Kaotioti. E a tia ni bati kanoan te bong, ao te kabanea ni bwai ae e tangiria te mitinare ibukin te aomata bwa e na aki oota n te bwai are e tangiriia aomata bwa a na ataia bwa e bon koaua.
Inanon tabeua te teekan I a namakina au namakin bwa e a moanna n rairaki nakon te un, te kibu ae uarereke mairoun au tamanuea are a roko nakon au iango. Bon te mwakoro ibukin au utu n taai aika a na roko are e tuangai bwa N na reireiniia natiu n taai aika a na roko ibukin ataakin te euangkerio. Ngke e a rin te kibu anne inanon atu, I ataia bwa te Tamnei e tuangai bwa N na anga reirei nakon te aine ae nanorinano aio n ti te arona n aron are N a anga reirei nakon te ataei.
I moana reireinakina ma te kawai ae beebete ma te tangira. I iangoia oin natiu bwa a tekateka ni katobibiia te ru ni motirawa n tararake n taraai, are tamaia, ngke I anga reirei nakoia ibukin Iotebwa Timiti. E bon kamimi nooran te bitaki iaon moana. Buraen matana a tabekaki ao matana a moanna n raneanea. Taraana are e kaota te aki oota e a riki bwa te kan oota ao ni miimi. Ngke I a karakina rongorongon Tamara are i Karawa ma Iesu Kristo ngke a kaoti nakon Iotebwa Timiti, e korakora ranninmatana ao man raanga rikaaki iaon tabana. E korakora namakinan te Tamnei inanon te ruu, ao bwarannanou e a rairaki nakon te kimwareirei ae bati.
N na bon aki kona ni mwaninga te bwai ae riki aei. Ngkai I aki kan tataninga n anga reirei ae te arona nakoia natiu n te bongina ao n namakina te kukurei ae bati anne.
Kamatata iroun Brian Call