Kakauongo n te Kabane
“Neienne raoraou mai imwaaina, ao bon tiaki toau,” I taetae ni bon nakoiu. Ngaia are bukin tera ngkai e aki toki ni kauringai te Tamnei ae N na aki riai ni mena ikekei?
Ni menau n te reirei ae rietata, I bon kakabwaiaki ma te kakaewenako iaon te mwakuri ni kataneiai n te kaawa ae raroa nako man mweengau. Raoraou rimoa e maeka n uaakan, ao e ngae ngke tiaki ibuokanibwai n ara aro ae titebo, aron kakaokorora e aki katokiira ngaira aika rao.
Ngke I moan kaitibo ma Madeline (te ara e a tia ni bitaki), ti uaia ni mwakuri ma te kairake n ataeinaine temanna are bon ngaia te banna ni katotoo mairouia Aomata aika Itiaki. I uringa te Tamnei ngke e kaota nakoiu te kaokoro imarenaia kairake n ataeinaine n tatabemania, ni kabwarabwaraa bwa e kanga rinerine aika uarereke ni kona ni katea te kawai ibukin te maiu are imwiina. I uringii iango ibukin te maiu n tamnei aikai inanon ririki aika mwaiti.
N tanrikaaki ngkai inanon reitakira imwiin ririki aika mwaiti, Madeline ao Ngai ti bairea te tai are ti na ikotaki iai. Ngke e a tairiki, te kamiimi bwa e a nako nanou. I toka n te turein nakon ana kaawa, ao ngke I a kaan, e taku te bwanaa are e mena n au iango ao inanou, “Ko riai ni maroroo ma aomata ake a maiuakin kainibaire aika rietaata.”
“Aio tiaki te marooro,” I tabe n iango. “I bon tii kaitibo ma raoraou are mai imwaaina.” Te Tamnei e kaokioka te kauring, e a kaan riki ni karokoa ae I ataia ni koaua bwa bon raou ao I a moanna ni mimii n aron ana kainibaire ao aron maiuna. “E ataia ae Ngai kaain te LDS,” I kabebetea. “E atai au kainibaire, ao a na bon akea te kanganga.”
I karaoia, ma e ngae n anne, moanna ni mimii ngkana taian “kaokoro” are I a tia n ataia mai imwaaina e a karika kawaira bwa a na bwenaua n riaon are I kantaningaia. Ngaia are I a irira ana kairiri te Tamnei, ao I a wetea raoraou ni katoka ara kaitibo. I bon rangin maaku ibukin uruakan nanona. N na kanga ni kabwarabwara au iango ibukin te maiu n tamnei nakon te rao ae aki butimwaea ana mition te Tamnei ae Raoiroi?
I kabwarabwaraa bwa I aki mweengaraoi mai ibuakon teuana te waaki ni kakukurei are ti a tia ni maroroakinna ao te kantaninga bwa e na anganai bukina ae tamaroa ni kamwawaai n te tairiki anne. E bon rawawata ao e anga nanona bwa ti na bita ara baire. E toki raoraomau ao I kariaia nakon te bitaki ibukina ngkai I taku n au iango, “E mena ao tao te waaki ni kakukurei bon anne bukina ae e kauringai iai te Tamnei ae Raoiroi.” Ma te rawawata are I namakinna e bon aki nako.
E reke ara tai ae kakukurei n te tairiki, ma n te tai teuana nakon teuana, te Tamnei e tuangai te kauring are imwaaina e bon kakawaki. N te moan tai akea te bae e tabeakinaki, ma ngke e a roko te tairiki, e moanna ni kamatataaki bwa e ngae ngke ti roko man katei aika ti te arona, ti mwananga ni kawai aika kakaokoro. Ara kainibaire bon tiaki ti te bo—e ngae ngke inanon bwaai aika uarereke. Ngke e a ootana te wain, I kabwarabwaraa nakoina bwa N na aki kabwaka boon te arekoro. E karinea au iango ao e bon kabooa ngaia.
Raoraomau n te maiu n tamnei e teimatoa n rikirake ngke e a tairaa te tairiki anne. Ngke e a tia kanoan te katairiki, I mena ni mangeen au kaintekateka, n tauraoi n nako, ibukina ngkai I ataia bwa te kabanea n turein ibukin te tairiki anne iaon kawaina ni mwananga ao I maeka n ae rangi raroa ibukin kabonganaan te taekitii. N ataakin raoraomau, e taku raoraou bwa I kona ni matu n ana tabo. Ngkai te Tamnei e aki kona ni kitanai, ni kamatoaa te bwai are I a tia n ataia: te tiku bon tiaki te rinerine.
Ngke I rianna n nikiria ni mweengana, I mwakuri korakora n taratara ma te karaurau. “Ko koaua bwa ko aki kan tiku?” e titiraki. I bon koaua. E aki wiimakikii ke ni kairiribai, ma te Tamnei e taetae ma te karaurau ni kamataata riki nakon rebwen te baa. I aki kona n taona au turein!
I tataninga ni karokoa ae I ataia bwa e a rinnako, ngkanne I a kabanea biriu bwa I aonga n roko n te titeition ibukin te turein iaon te tai. I aki kona ni maninga uringakin Iotebwa are i Aikubita ngke e biri nako man te karirii (taraa Karikani Bwaai 39:7–12).
Ngkai I iangoia rikaaki imwiin bwaai aika riki ibukin te tairiki anne, I namakina te maaku ao te kakaitau: te maaku ibukin te bwaia ae e na kona n riki ao te kakaitau ibukin ana iraorao te Tamnei ae Raoiroi. E taetae te Tamnei, ao e ngae ngke N na kaman karaoiap imwaaina, I kakaitau bwa I kakauongo n te kabane.
E mataata bwa au taratara n te bwai ae riki n te tairiki anne e aki kamatataaki raoi n aron ana taratara te Uea. N aron are e koreia Itaia:
“Bwa tiaki nanomi nako nanou nako, ao tiaki naba arou nako aromi nako, bon ana taeka te Uea.
“Bwa aroni karawa ngkae e rietata riki nakon aontano, ao ai aron naba arou nako, bwa e rietata riki nakon aromi nako ao nanou nako nakon nanomi nako.” Itaia 55:8–9.
Tabeua rinerine ake ti kaitarai inanon maiura a waekoa ni karaoaki ao ni manuokinaki taekaia. Iai tabeua rinerine are a roko ma reirei are a tamaroa ara mwakuri iaona bwa tiaki kona ni mwaninga. I bon karabwarabwara n ataakin anne ngkana ti kakauongo nakon ana kairiri te Tamnei ae Raoiroi—ao ti karaoia n te tai naba arei—ti kona n teimatoa n tiku iaon te kawai are e a tia ni katauraoia Iesu Kristo bwa ti na iria.
Kamatata iroun Jeff Ward