Akea Nanou n te Ekaretia
Tanintoa Sexton, Marshall Islands
Akea te bwai ae N na karaoia ma te Ekaretia ngke e titirakiniia mitinare kainnabau ngkana a kona n reireiniia natiu mwaane. Ma I aki totokoia kiona ngkai boni ngaia kaain te aro.
Ngke a moanna n roroko mitinare nakon mweengara uatai n te wiiki, I nako ni kawara ana auti raoraou ae mena irarikiu. Raoraou bon te membwa ae matoatoa n te aro ni Kiritian teuana. Ni katoaa te tai ngkana I kakawaria, e tangiria ni kan maroroakina taekan te Bwaibwara. I tuangnga bwa akea nanou n aekakin bwaai akanne ao n aki tangiria ni kamatebwaia taekan te aro. Ma e teimatoa ni kataia n anaa nanou, ao n tokina I a kariaia. Ngaia are n te tai ae rangin maan I kamatebwaia te Bwaibwara ma raoraou inanon are a reireinaki iai natiu irouia mitinare.
Te bong teuana ao a roko mitinare ni kawara ara auti. Ma n arou are I nanako, I a baireia bwa N na tiku inanon te ruu. Ngke a moana aia reirei mitinare nakoia natiu. I a kunea bwa I a tangiria ni kan ongora riki. I a kaaniai riki nakon te mataroa bwa I aonga n ongora raoi. A reireiniia natiu taekaia abotoro ao burabeti.
Imwiina I atibwa ataia bwa I a tangiria ni kan reiakinaki riki. I a taetae ma mitinare ao n tuangia bwa I a butimaea aia anga reirei bwa ana anganai—n akea ae a na ataia. Kainnabau e aki toki ni mena ikekei, ma akea temanna ae ataa rongorongona.
Ngaiare ngke a roko mitinare bwa a na reireiniia au ataeinimwaane uatai n te wiiki, I nako ni kawara ana auti raoraou. Ao ngkanne te bong teuana ae kaokoro, a na reireinai.
Te bong teuana ngke e taetae n aki akaka raoraou ibukin te Ekaretia, I kamanoa N aiaroia aomata aika a mwaiti n aban Mwatiare, akea ae tau ongona ibukin te Ekaretia ao n aki oota ni bwaai tabeua are a kakoaua Aomata aika Itiaki. Ngke e taekinii bwaai tabeua aika bubuaka, I a manga kamanoa riki te Ekaretia.
Anne aron waakina inanon itiua te namwakaina. Ngkanne n te bong teuana I a ataia bwa te Tamnei ae Raoiroi e a kamatoaa nakoiu bwa bwaai ni kabane are a reirei iaona mitinare a bane ni koaua. I a ataia bwa I riai ni bwabetitoaki, e ngae ngke e aki tau au atatai iaon te euangkerio.
Imwiin bwabetioakiu inanon 2007, I bon rangin kukurei. Tia moana ara kaawakin mwane ibukin nakora nakon te tembora i Hawaii, ngai ma kainnabau, natira aika teniman, ao ai ngaia are ti a kabaeaki inanon Ritembwa 2008.
N riki bwa kaain te Ekaretia e karika te uaa ae korakora inanon maiu. I a baireia bwa N na katoka kauouan au mwakuri ae te kamataku n te tabo n amwarake kiona ngkai I ririmwii n oki nakon te auti ao au kunnikai e na bae ni memea ni menan te moko. N aki ongea buan rakan au karekemwane, te Uea e bon tararuaira raoi.
I ataia bwa e koaua te Ekaretia ao Iotebwa Timiti bon ana burabeti te Atua ibukin te Tamnei are I namakinna ao kakabwaia are I karekei.