Ni Karokoa Ae Ti A Manga Kaitiboaki
Bau ae Kateketeke, Bau n Tokanikai
Nakoiu te bau ae kateketeke e a tia n riki bwa te kanikina ibukin ana atatai te Tia Kamaiu ibukin ni kabane marakira aika a raba—ao Ana konabwai ni kamarurungiira.
Aokati n te Aba ae Tabu. Ni katobibiira kateitein Kaberenaum ake a uruaki a raaitiiti ni kabuebuen taai n te bwakantaai. Bon te tabo ae kakamataku ni kan nooraki, ma ara tia kaneweaba ao te man ae te tikaata a tia ni maningoongo ibukin tabeua te tai, ao au iango e a moanna n tiotio.
N te tai ae karina I a bon katauraoai ngke ara tia kaneweaba e kotea te aroka are e kanuira ao n taetae n aki iangoia raoi, “A arana te aroka anne te “bau ae kateketeke.” I tararake n taraa te mwaanga ae bati baana. A angara tenaan kateketeke? I kanakoa baiu, I karaurau n katika te mwaanga ae uarereke nakoiu.
Ikekei, ibuakon baana aika kai rauaaki, I noori taian kateketeke. E irariki ao ni kiriin, n rangi ni kakang ao man abwaabwaki n aron abwakin waebuau, a aki kona n nooraki man aki raka iaon tabeua te buuti raroaina. Ma te aomata are e taua teuana ma ibuakon baana anne e na bon namakina te maraki.
I iangoi korotamnei aika bati ake I a tia noori n tamnein te Tia Kamaiu n tei imatan te boowi are e a bwainingareaki iai, ni kunikaiaki n te beeboro ao ni baunaki ni kain te kureebe aika mwau man bwakeeke ao ni kateketeke. N te tai ae tawe ao e roko nakoiu bwa te toro ke te tautia are e katabeaki bwa e na karaoa te bau arei e na kona n tangiria ni mwakuri ma te mwaanga ae kiriin man maraurau n aiaron te kai are ietara—tiaki ma kaina aika a kaaimaoto, ao ni mautengetenge. Nanora riki, te kantaninga ibukin te bau bwa tiaki tii ibukin te kammaraki ma ni kakanikoa ao ni ngareakinna.
N te aonaaba n taai akekei te bau ke te mwae n te roroa ae kiriin, ao ni baanikai—angiin te tai man baan te raurere ae boiarara—bon taainako a anganaki taan tokanikai n te takaakaro ke te buaka. Ueen te raurere ake a kamronronaki a katamaroa tamneia ueea ao embera. Tao te bau are e buakaka are e taona ana aari te Tia Kamaiu e boni baanikai ao man kiriin ni bwainingarea te karinerine ngkoangkoa. Bon tii te katautau, tiaki bwain te reirei. Ma ibukiu, taraakina n te aro anne e a uota teuana aron te Mwakuri ni Kamaiu ni kaota riki n taraakina: te Tia Kamaiu e atai nanokawakira, ao E konai ni kamaiura.
Te kunnikai are e katokaaki iaona bon te kanikina ni kakaniko ibukiia utu ni uea. E rabuni bwangabwangan ao mwakoron kunna aika nano man te kainikataere are E a tibwa kamarakaki iai. N tii te arona, te bau te akanta are e baanikai e na taraa n ae ana bau te tia tokanikai ao man karaba te mwaraki are e atia ni karikia.
E rangi ni bati mairoura ae a kakoaua te maaraki ae e aki nooraki. Te anene n taromauri e reireiniira bwa “inanon te nano ae aariki e bon karabaaki te nanokaawaki ae e aki kona n nooria te mata” (“Te Uea, N na iririko,” Anene, nambwa. 220). Ma te Tia Kamaiu e nooria. E bon atai raoi ara kaangaanga aika a onoti. Ana mwakuri ae bwanin e bon maiuakinna n onimakinan te Mwakuri ni Kamaiu ao te Mangauti. E ngae n anne ma te koraki ake e reireiniia ao ni kamaiuia a aki ataia. E ngae ngke bon oin Ana reirei a bon aki te roko n ataia.
Te Tia Kamaiu e nooria riaon te “niniira” ao te “bau” are e karabai rawawatara ma irouia tabeman. N rinanon te kainnano “ni maraki ao te karawawataki ao te kariiriaki n aekaia nako,” E onrake n te nanoanga ao e ataia bwa e na kanga ni buokiira ngkana ti katikui ara kaangaanga i Waena (taraa Aramwa 7:11–12). Bon ngaia te bai are e kona ni kamaoa te ikoaki ae nano man raba. Ao te bau are E taua nakoira bon ana bwai te tia tokanikai.
Iesu ma te Bau ae Kateketeke, iroun Carl Heinrich Bloch, kabonganaaki man ana kariaia te National Historic Museum n te Frederiksborg i Hillerød, Denmark, e tabuaki kaeweana.