Ma Akea te Ekaretia Ikai
Julie Ismail, Aotiteria Maeao, Aotiteria
N tain te mwananga nakon te Miterenian, I botumwaaki ni kaei boowin te Ekaretia n te tabo are I kona i Seville, Tibein, I karakea ana buoka temanna te tia bubutimwaaia aomata n te outero,ni buokia ibukin tareboon n te tabo, ao maben te kaawa bwa aonga ni buokaki ni karekea te autinibootaki ibukiia Aika i Itiaki. I korea te aetureti ao aran te Ekaretia n te taetae n Tibein. N tairikin te Kaonobong I tataro ni kan ataa te tai are e na waaki iai te boowi, ao iai au namakin ae korakora bwa I riai n roko ikekei imwaain 10:00 a.m.
Imwaain ae I mwananga ni kaea te taromauri ae e na boo n 9:30 n ingabongin te Taabati, I a manga tataro riki bwa I aonga ni kona ni kunea te autinibootaki. N ririmwian au mwabe, I a moanna n borauakin kawai aika a irariki aika a mangaongao. Bon te ingabong ae kakukurei. I rirarikin taabo n amwarake ao te mwakete ae onrake ni maan aika rongoaa.
I a roko n te tabo are e baireaki ni kunea te akea ae e na taraaki bwa te tabo n taromauri. I nakonako n rierake ao n ruaaki inanon te kawai ma te bwarannano. Akea au iango ao I a raoraoma, ao e a boni kan boo 10:00 a.m.
N tokina, I a tataro nakon Tamara are i Karawa: “Ko a tia ni katei tuaai bwa n na nako n taromauri, ao aio Ngai, ma akea te tabo n taromauri ikai.”
Ngkanne imwiina e a kaoti man te koona te mwaane ae bane tauraoina ma kunnikaina te kooti. E taraa n ae kaain te Ekaretia, e korakora au namakin bwa n na riai ni kateia. N aron ae kanganga kamatatakina, I tungnga bwa I kakaea te tabo n taromauri. Iai te bwai ae taekinna ae I aki oota iai, ao I a taraa n raoraoma. Ngaia are e a kauka ana buribikeiti ao I a noori uoua booki aika a kabaeaki ae tarakiia bon koroboki aika tabu. I anganna te mwakoro ni beebwa are I korea iaona “La Iglesia de Jesucristo” (Ana Ekaretia Iesu Kristo). E matangare ao e kotea te tabo are I mwananga mai iai, ao ti uaia n nakonako nakon te taromauri. Te kateitei e mena n te tabo teuana ae kaokoro tii tabeua te miniti raroana ao ko kai mwaninga ngkana ko aki ataia ae e mena ikekei. E kateaki n te tabo ae raroa teutana ma te kawai inanon te tikuea ae uarereke, i akuun taian oo aika bubura.
N te autinibootaki I a kunea imwiina bwa te mwaane are e a tia ni buokai bon akea ae raka arona nakon te bitiobi n te uoote ao e na moanaki te bootaki n 10:30 a.m. I a roko ma e a raka riki au tai.
N ana tai te uoote n aki mamatam ao ni kaoti koaua, iai au namakin ae korakora bwa N na kaota au koaua. Ma te mitiare are e raraira au taeka man te Ingriti nakon te taetae n Spanish, I kaota au koaua ao ni kabwarabwaraa bwa e kanga te Uea ni katauraoa te kawai ibukiu n rokou n taromauri. Ngkanne te bitiobi e a kaota ana koaua ao ni kabwarabwaraa bwa e riai ni katea ana kaa n ae raroa riki n te moaningabong anne, bwa e aonga n rimwi nakon are e taneiaia te aba iai. Ngke e noorai, e taku bwa I taraa n ae ngai kaain te Ekaretia, ngaiare e a tei bwa e na buokai. E a taetae ngkanne imwiina ibukiia kaain te aro are a bua tamneia ao n taku bwa ti riai ni buokiia ni kunea te Ekaretia.
N ririki aika mwaiti au ururing ibukin taraakin Seville e a mauna, ma au ururing ibukin kuneakin te taromauri ikekei e bon aki bua. Te ururing anne bon te kakoaua nakoiu ibukin ana tangira ae korakora Tamara are i Karawa ibukira ao Baina e bon nooraki inanon maiu ngkana I tii tarai bwaai ni kabane ake a “mwakuri ni kabane ibukin [au] raoiroi” (I Rom 8:28).