E toki Korakaira Irouna
Barbara Winter, Arizona, USA
Ngkai te neeti n te tabo n tarua ibukiia aika tibwa bungiaki, I taruaia aoraki, n tabetai ataei aika rangin uarereke. N te tairiki teuana I a katabeaki nakon te ataeinimwaane ae bungiaki 17 ana wiiki ni moantaai ao rawawatana ae tii iaon (0.5 kg). Baina a bon bingingi, rangana aika uarereke ti te bo buburana ma tabonibaiu, ao waena ti te bo ma buburan waebuau. Ibukin korakoran kanganga n aron ikeikena, taokita aki kantaningaia bwa e na maiu ni karokoa te tairiki anne.
Te tai ae rau are e a bwakara te iunite ngke e a kataia ni iangoa maiuna te tei ae a tiba bungiaki. E tabe ni korakora te raoraoma iaoia aomata nako, ai moarara riki ana neeti te tei ane e uarereke, ao n tairiki boni ngai. Ana karo a bon mena irarikina inanon boong nako, ma a bon kua. Tinana e a oki nakon ana ruu ma kainnanoakin te motirawa ae bati.
Ana ruu te tei ae onoti e mena inanona te (inkubeita) ae kaokoroaki, monita, bwai ni ikeike, ao taian bwam ibukin te IV, are a kateimatoaa maiuna. Ibukina ngkai e bon rangin mamaara ao ni kainnanoa te tararuaki raoi, I aki katabeaki nakon temanna te aoraki n te tairiki anne. N na mena irarikina ni kabanea te bong, n tabetabe ma bwain aoraki, monita, ikuaki, ao kanganga.
Ngkai e waaki nako kanoan te tairiki, I kataia n iangoaia bwa e kanga au namakin ngke arona bwa ngai tinana. Te rawawata n nano e bon kanganga totokoana.
I karaurau n teboka ubuna, n ringii baina aika uarereke ao waena, ni karaurau raoi n oneia ao ni katukua inanon te burangketi ae boou ae maraurau. I mimii bwa tera riki ae I kona ni karaoia ibukin au aoraki ae uarereke. Tera ae e na kona ni karaoia tinana. Tera ae tangiria Tamara are i Karawa bwa n na karaoia?
Te tamnei ae uarereke ae itiaki man onoti e na oki rimwii nakon Tamara are i Karawa. I mimii ngkana e maaku. I angoia oin natiu. Ngke a uarereke ao a maaku, I anenea nakoia. “Ngai Natin te Atua” ae bon mamaten nanoia. Ni kataia n aki tang, I anene nakon te ataei ae uarereke.
Ngkai te neeti I noora taian bwaibi ao te rara, ni wareka keeraken ao bwakan bwabwaan te ataei, ni kakauongo nakon ruberuben buroona, ao ni matuakin taian nambwa iaon tain monita. Ngkai te Aomata ae Itiaki I noora tamnei n te tiretio ao ni mimii ibukin te babaire ni kamaiu.
Ngke e waaki nako te tairiki, marurungina e a tabe ni kekerikaaki. E rikirake te kanganga are e a karika tinakon te rara inanon bwabwaana.
N te moaningabong au aoraki ae uarereke e a motirawa ma te rau. E a kitana bain tinana ao “e uotaki n okira mweengana nakon te Atua are e anga [nakoina] te maiu” (Aramwa 40:11).
I rikirake ni kaan nakon te Tia Kamaiu ao Tamara are i Karawa n te tairiki anne. I a karikirakea te atatai ae korakora ibukin ana tangira te Uea ibukiia aomata ni kabane—ao Ana tangira ibukiu. I kauringaki, ni mimii naba, man nanon te tangira are I namakinna ibukina. Ao I namakina te kantaninga n rangin akoi riki, n nimamannei riki, ni kai kabwarai buure, n tituaraoi—n riki n aiarona—n te bong teuana ao teuana te rubennano n te tai ae ti teuana.