Te Tia Raoi Iesu Kristo
Mairoun “Te Tia Raoi,” Ensign, Meei 1977, 54–56.
Iesu Kristo, ara Tia Raoi, e kabwaka te boo are ti aki kona ni kabwaka bwa ti aonga n oki ni maeka ma Tamara are i Karawa.
N na karakina nakoim te karaki—te kaikonaki.
Iai ngkoa te mwaane ae e rangi ni kainnanoa te bwai teuana. E taraa n rangi ni kakaawaki riki nakon bwaai ni kabane inanon maiuna. Bwa e aonga n reke irouna te bwai are e tangiria, e karekea ana taarau ae bati.
E ni kauringaki ibukin ana taarau ae rangi ni bati anne ao ni kaineti riki ibukin ana tia kataarau, te aomata are e anga te mwane. Ma e taraa n ae e rangi ni kakaawaki irouna ni karekea te bwai are e tangiria ngkai. E kakoauaa bwa e na kona ni kabooa mwiina rimwi riki.
Aingaia are e a tiaina te kaonturaeki. E na kabooa mwiina imwiin te tai. E aki rangi n raraomaeakinna, bwa te tai are e na kabwaaka iai e rangi n raroanako. E a reke te bwai are e tangiria ngkai, ao anne are e taraa n ae e kakaawaki.
Te tia kataarau e aki toki n tiitiku i akun ana iango, ao e kaakaraoi kabwaka mwane aika uarereke ngkai ao imwiina riki, n iangoia bwa te bong are e na riai ni kabanea ana kabwaka mwane e na bon aki roko.
Te Motikitaeka ae eti ke te Nanoanga
Ma n aron are e bon riiriki, e a roko te bong ao te kaonturaeki e a roko taina. Te taarau e a aki bane ni kabwaraaki. Ana tia katauraau e a kaoti ao man tangira te kabwaka mwane ni kabane.
Ai tibwa n te tai anne are e a ataia bwa ana tia kataarau e aki n ae ti iai te mwaaka irouna n anai ana bwai ni kabane ma iai naba irouna te mwaaka ni karina n te karabuuti naba.
“I aki kona ni kabooko, ibukina bwa akea irou te mwaaka ni karaoia,” e kaotibure.
“Ngkanne,” e taku te tia kataarau, “ti na anai am bwai nako , ao ngkoe ko na nako ni kabureaki. Ko kariaia anne. Bon nanom anne. Ko tiaina te kaonturaeki, ao ngkai e na riai n iraki nanona.”
“Ko kona ni kaabwaka n te tai ke ni kaakea te taarau?” te tia taarau e bubuti. “Bairea tabeua te kawai ibukiu ni kawakinii au bwai ake irou ao n aki kabureaki. Ni koauana ko bon kakoaua te nanoanga? Ko na bon aki kaota te nanoanga?”
E kaeka te tia kataarau, “Te Nanoanga e bon aki toki n tabe itera. E na bon tii mwakuri ibukim. Ngkana I kaota te nanoanga nakoim, e na kitanai n aki kabooaki. I tangira te motikitaeka ae eti. Ko kakoaua te motikitaeka ae eti?”
“I kakoaua te motikitaeka ngke I tiaina te kaonturaeki,” e taku te tia taarau. “E bon mena iaon au itera ngkanne, ibukina I iangoia e na kamanoai. I aki kainnanoa te nanoanga ngkanne ke n iangoia bwa N na kainannoia riki.”
“Bon te motikitaeka ae eti ae tangiria bwa ko na kabooa te kaonturaeki ke kona rootaki n te tuua,” e kaeka te tia kataarau. “Bon te tua anne. Ko a tia ni kariaia, ao anne arona are e na bon riai. Te Nanoanga e aki kona n iraea te motikitaeka.”
Anne ngkanne aroia: Temanna e tangira te motikitaeka ae eti, are temanna e bubuti ibukin te nanoanga. Akea ae kona n tokanikai tii man ana kabanemwane are temanna.
“Ngkana ko aki mwaninga te taarau, a ana akea te nanoanga,” e bubuti te tia taarau.
“Ngkana I nanoanga, a ana akea te motikitaeka ae eti,” bon te kaeka.
Tuua ni kauoua, e taraa, n aki kona ni kammwakuraki. Bon koaua ni kauoua aika akea tokiia ake a taraa ni kauntaba i bon irouia. Bon akea te kawai ibukin te motikitaeka bwa e na kammwakuraki raoi ao te nanoanga naba?
Iai te kawai! Te tua ibukin te motikitaeka ae eti e kona ni kanakoraoaki raoi ao te nanoanga e kona ni kabwabwakaki raoi—ma e na tangira temanna riki. Ao ngaia ae e a riki n te tai aei.
Ana Tia Raoi
Te tia taraau iai raoraona. E a roko n ibuobuoki. E rangi ni kinaa raoi te tia taarau. E iangoia bwa e rangi ni burababa ni karekerekea ma te kaangaanga aio. E ngae n anne, e tangiria ni buokia bwa e tangiria. E a roko imarenaia, e kaaitara te tia kataarau, ao ni karaoa te anganano. “N na kabwakaa te taarau ngkana ko na kainaomata te tia taarau man ana kaonturaeki n te aro bwa e na kaawakin ana bwai nako ao n aki kabureaki.”
Ngke e tabe n iangoia raoi te tia kataarau te anganano, te tia raoi e reitia, “Ko tangira te motikitaeka. E ngae ngke e aki kona ni kabwaka mwane nakoim, ngai ae N na karaoa anne. Ko na kona ni kaman butimwaia n te aro ae e eti ao man akea ae ko na tangiria. E na bon aki raoiroi.”
Ao aingaia are e a kariaia te tia kataarau.
Te tia raoi e rairaki ngkanne nakon te tia taarau. “Ngkana I kabwakaa am taarau, ko na butimwaeai bwa am tia kataarau ngai?
“O eng, eng,” e tang te tia taarau. “Ko kamaiuai man te karabuuti ao ko kaota te nanoanga nakoiu.”
“Ngkanne, e taku te tia boutoka [temanna are e ibuobuoki], “ko na kabwakaa te taraau nakoiu, ao ngai ae N na karaoa te boraraoi. E na aki beebete, ma e na kona ni karaoaki. N na katauraoa te kawai. Ko aki tangiria bwa ko na kabureaki.”
Ao aingaia are te tia kataarau e a kabwakaaki te mwane nakoina ni kabane. E a tia ni karaoaki te bwai ae riai nakoina. Akea te kaonturaeki ae e a tia n uruakaki. Te tia taarau, imwiina, e a tia ni kaananauaki te nanoanga nakoina. Tuua ni kauoua a kakoroaki nanoia. Ibukina bwa iai te tia raoi, te motikitaeka e a tia ni karekea tibwana ae bwanin ao te nanoanga e a koro bukina raoi.
Ara Tia Raoi
Ngaira n tatabemaniira nako ti maiu n te taarau n te tamnei, te bae. N te bongina ao e na kainaki ara akaunti, te kabwara taarau e na tangiraki. E ngae n anne n aki iangoia raoi ti kona n taraia ngkai, ma ngkana e a roko te bong anne ao kainakina e a kaan, ti na tarataranako ma te kainnano ibukin temanna bwa e na buokiira.
Ao n aron te tua are akea tokina, te nanoanga e aki kona ni kabwaabwakaki ni karokoa ae iai temanna ae e tauraoi ni kauataboa ao ni kona kabwarai ara taarau ao ni kabwakaa boona ao ni bairea taekan kabooara.
Ngkana akea te tia raoi, ngkana akea raoraora, rawawatan te motikitaeka ae bwanin e na bwaka iaora. Te kaboomwi ae bwanin ibukin ara bure nako, e ngae ngke e uarereke ke e nano e na anaaki mairoura nakon are te kabanea ni bubura.
Ma ata aio: Te Koaua, ae mimitong, a taekinna bwa iai te Tia Raoi. “Bwa ti temanna te Atua, ao ti temanna te tia raoi imarenan te Atua ao aomata, are te aomata, are Kristo Iesu” (1 Timoteo 2:5). Rinanona te nanoanga e kona ni kananauaki raoi nakoira n tatabemaniira nako n akea kaitaraan te tua ni motikitaeka are akea tokina.
Kaabwaabwakan te nanoanga e aki karaoaki n aki akaaka. E na rinanon berita aika tabu ma Ngaia. E na nakon Ana babaaire, Ana babaaire aika akoi, ake a karinaki iai, bwaai ake a riai, te bwabetito ni kateboaki ibukin kamaunaan buure.
Ni kabane aomata nako a kona ni kamanoaki n tuan te motikitaeka ae eti, ao n te tai ae ti teuana ngaira n tatabemaniira nako e kona ni kabwaabwakaki te kakabwaia ni kabooakira ao kanakoraoan te nanoanga.
Kamatata iroun Dan Burr