Mweengara, Ara utu
Te Tina n Tangira Rongorongon Maiuna n ana Mition
Ngke I ikawairake i Tonga, tinau e ibuobuoki ni katoatai n angareirei n te tieminarii. Man te tai are I ikawairake ni karokoa ai 10 au ririki, n tainako e kautai imwain te tieminarii ao e kairai nakon te auti are e na kaitibo iai ma ana kiraati. E ngae ngke e kee iaan te kuata ni maire raroana (0.4 te kiromiita) ti rianna n te kawai ribuakon aroka aika taian kuawa, ao e na bae n titirakinai, “Ko maroa?” Ao nna bae ni kaeka ma te ninikoria, “I aki.”
Imwiina ao e kangai, “N te bong teuana ko na bon ninikoria ao ni beku ibukin Tamam are i Karawa. E a tia ni katauraoi bwaai ni kabane ibukira, n aron naba te baire are ti kona n oki ni maeka ma Ngaia. N te bong teuana ko na nako ni mitinare ni beku Ibukina ma nanom ni kabane, am iango ao korakoram. Ko riai ni waaki ni katauraoi ngkai n riki bwa te mitinare ae tamaroa.”
Imwiina au karo a mwaing ma ara utu nako Ontario, California, USA. Tinau e kunea bwa e a maeka n te aba ae aki taneiai iai, n aki kona n taetae n aia taetae ao te katei ae bitaki. N ai aron te moaine are e bobotiia bunna iaan baina, e bootira ngaira aika natina ao ni katorobubua ni bubutiia Tamara are i Karawa bwa akea mai ibuakoia natina ae e na bwaka man ana Ekaretia Aomata Aika A Itiaki ni Boong Aika Kaitira. Au karo a kabonganaa te tataro n utu, ni katoabonga ti wareware ni booki aika a tabu, ao ti aki mamatam n tainako, ni kainutu ni katoa wiiki, ao ni kaaei bootaki n te Ekaretia n ukoukora ana ibuobuoki ni karikirakeaia ara utu.
A kaungaira ara karo bwa ti na riki n aroia mitinare n taai akekei. Ti aki toki ni kabonganai kabaraaki aika mainaina n nakon te taromauri ao ni koroira n aroia mitinare. N aroia ibonga I kakabwaia te toa, ao tariu ae uarereke e katauraoi ni bwaatina te toa n aroia taan reirei ao riikan. I kona n noora tinau ao tamau n tarataraira, ni kakoaua raoi bwa ti katiai mwiokoara ma te kakaonimaki.
Imwain ae I nakon au mition, tinau e taku, “Karaoa tibwangam, ao Nna karaoa tibwangau. Nna aki mamatam ao n tataro ibukim bwa kona kuneia aomata ao n reireiniia.” E reitinako n aki mamatam ao n tataro ibukiia ni kabane natina aika aman n aia tai ni mitinare. Ti bane ni beku ma te kakaonimaki ao n okirii mwengara ma te karineaki.
N rokou irouna imwain matena, tinau kangai, “Peiholani, Ia tia n reireiniko ni kabane bwaai ake I atai aika a rangi ni kakaawaki n te maiu aei ao n te maiu ae e na roko. Anne, ana euangkerio Iesu Kristo ae e koaua. Ana mwakuri ni kamaiu Iesu Kristo bon kamaiuan tamneira. Karaoa aei, ao ara utu ana manga bane ni bootaki. Aio I ataia n akea te nanououa ibukina Tamara are i Karawa ao Iesu Kristo a maiu.”
Au koaua a kateaki iaon te euangkerio, man aia taeka tinau ao tamau are a kangai. I ataia bwa ara utu ana manga bootaki riki n te bong teuana ibukina bwa au karo a kakoroa bukin aia mition n reireiniira te euangkerio ao ni kairiira nakon te Tia Kamaiu.
Taman te tia kororongorongo, Moses, te tina, Lavinia, ao ai natina te aine iaon tanon te Los Angeles California Tembora n te 1999.
Tamnei n anganano mai iroun Peiholani Kauvaka