Te Ekaretia e aki kariaia ni kabane takakaro n te witeo ke tii ake a kaota te kakeru?

A rawata takakaro n te witeo aika itiaki, kammwakura te iango, ao kangare, ao tabeua takakaro aika bati kaaia a kona n riki bwa waaki ni kakukurei nakon te botanaomata. Te Ekaretia e bon aki totokoi takakaro man te witeo, ma kairake a kauringaki bwa a na timwaati n rineakin aia takakaro ao mwaitin te tai are a na kabanea n takakaro ma ngaai. Ti a tia n tuangaki bwa ti na kamanena raoi ara tai (taraa D&C 60:13). Tii ibukina bwa te bwai teuana e bon itiaki ao ni kangare ti aki nanona bwa e tau karaoana.

Unimwaane M. Russell Ballard n te Kooram n Abotoro are Tengaun ma Uoman e kabwarabwaraa: “Teuana man ana kawai Tatan … are e a kamamaraa korakoran tamneim bon man kaungakim ni kabanea am tai ae bati ni karaoan bwaai aika uarereke manenaia. I taetae iaon bwaai n aron te tekateka inanon aoa aika bati ni mataku n te terewition ke te witeo, n takakaro n te witeo ni kabwanina te tairiki ni katoa tairiki, [ke] ni kakaae ni kabutaa te intanete” (“Be Strong in the Lord,” Ensign, Tuurai 2004, 13).

E bon tamaroa ni kabanea tabeua am tai n takakarona te witeo ake a ira te kainibaire nako ibukin bwaa ni kaongora ake a kuneaki inanon Kakorakoraia te Roronrikirake. Ma kona riai ni kariaia ni katikui mwiina n taotaonaki ke ni kamatea te kaombiuta ao ni mwaing nakon te bwai teuana riki. Tai kariaia bwa takakaro n te witeo a na tukiko man waaki aika manena n ai aron te kamarurung, kamatebwaian te euangkerio, karaoan am bwai n reirei, ke ni kabanea am tai ma am utu.