N aki Raraoma ibukin te Ran
Joseph man te Atimwakoro ae Apu Inti, Lake Titicaca, Peru
Joseph ae itiua ana ririki e a tia n rikirake n te tabo ae bati iai te ran. Ke e a tia n ikawai rake ma te ran ae katoobibia ngaia—e otabwaniniaki n ranin Lake Titicaca ae maitorotoro i Peru. Anne ae na riki ngkana ko maeka iaon te atimwakoro ae uarereke are e karaoaki man uteute aika beti.
Joseph ao ana utu bon kaain te botanaomata ae te Uros, ake a tia ni katea ao ni maeka iaon Lake Titicaca inanon bubua n ririki. A akawa inanon te nei. A tebotebo inanon te nei. A bwennarina iaon te nei n nakon te atimwakoro teuana ma teuana.
Ko kona n iangoia bwa Joseph, e a rangi n taneiai n te ran, e na aki nako n nano ibukin teina n te nei ni bwabetito inanon tabeua te namakaina are e na bwabetitioaki iai. Ma a na namakin bon ti te arona ma ataei ake tabeman.
“I ingainga,” e taku. “Ma I raraoma ibukin nakou nako aan te ran.”
Ma te ran ae katomimiia, ataein te Uros a reireinaki bwa a riai n tararuaia man te ran. Ai ngaia are imwiin Joseph ngke e tuangiia ana karo ibukin raraomana, te utu a marooro iaon te bwabetito n tain aia kainnutu n te tairiki, ao Joseph ma tamana a kataneiai n te bwai are e na karaoaki.
“Tamau e na bwabetitoai,” e taku Joseph. “E buokai bwa N na a aki maaku.”
Ngkai Joseph e a bon mwakuri korakora ni katauraoia ibukin ana bwabetito. E bon kataia ni kakorakora ni kakauongo raoi n tain te Buraimwarii ao ni kamatea Taekan te Onimaki. E ataia bwa e na buokia ngkai ao inanon taai aika a na roko.
“N na nako ni mitinare,” e taku. “N aron Nibwaai are e taku, N na nako ao ni karaoi bwaai ake e tuangai te Uea” (taraa 1 Nibwaai 3:7).
Korotamnei iroun Adam C. Olson