A Taetae Nakoira
Moanna ni Kakammwakuri
Te kakakibotu iaon te taubuki e kona n taraa n ae te kawai ae ko mano iai n totokoi karaoan kaairua, ma bon te kawai naba n totokoa te rikirake.
E karakinaki rongorongoia te kurubu aika taan kibara te bubu. Mwaane ma aine aika ninikoria aikai a un ma aiin te buakonikai man kabwakakiia n aia baaratiute nako aontano ietan te ai ao n aitara ma ngaia ieta nako naano, ao ake tabeman a kaaitara ma inano.
N tain teuana bueen te buakonikai ae buubura, te tiim ae te kabanea n tamaroa man taan kibara te bubu a bootaki ibukin tuangakiia imwaain kibaia n aia wanikiba. Te dispatcher—te tia tiriai ae wanawana man mwaatai—e tuangiia taan kibara te bubu bwa bwaai a rangi ni kai buee ao e a aki kona n anganiia kaetieti aika eetiruru. Ao te tia tiriai ae wanawana man mwaatai e anga ana kaetieti, taan kibara te bubu a riai n reitaki ma ngaia n te rerio n te tai are a tia ni baratiute nako aon te tabuki are iaon te ai. Ngkanne e na anganiia kaetieti nakon te kooti are a na riai n iiria ni moana tiringan te ai.
A waekoa taan kibara te bubu n tokanako n aia wanikiba, ni baratute nako aon te tabuku iaon te ai ae korakora, ao a bootaki ibukin aia mwakuri. Ngkai a noora te ai mai ieta, a kona n noora te itera n tatin kawai ake a kona n toua ni moana aia mwakuri.
Ni kaawakina aia booraraoi ma te dispatcher, mataniwiin te tiim e waekoa ni kaotinakoa ana reerio ae tauaki n te bai, e kammwakuria nakon are e na tang iai, ao e wetea te tia tiriai ae mwaatai ni butiia kaetieti bwa e ngaa te kawai ae a na iria. Ma bon tii karongoaan te reerio ae a kona n ongo; a aki kona n ongo bwanaan te tia tiriai ae mwaatai.
A iangoia bwa te dispatcher e bon tabetabe ma tabena ake tabeua, taan kibara te bubu a baaireia bwa a na tataninga te 10 te miniti ao ni kataia riki. Ma ngke a kataa te tia tiriai ae mwaatai te kauoua n tai, a karekea tii te arona ma are imwaaina—akea te bwanaa ao e karukaru ao akea te kaetieti.
Taan kibara te bubu a bon marooro imarenaia. A kona n teimatoa n noori kawai aika bati n raabeen te maunga are a kona n anganiia aia tabo ae tamaroa ni kaaitara te buee. Ma a rangi n tabeaianga ngkaie a tuai ni karekea ana kaeitieti te dispatcher. A raraoma bwa ngkana a ruo rikaaki n te kawai are a taku bwa te kabanea n tamaroa irouia, a na kauntabaa te kawai are e tangiriia te tia tiriai ae mwaatai bwa a na toua ao a na manga tuangaki ma te matoa bwa a na manga kaoka kawaia.
Ai ngaia are a baaireia bwa a na tataninga iaon te taubuki. Tebwi ma nimaua te miniti imwiina ao a manga kataa te tia tiriai ae mwaatai riki. Bon te akea. A butii aia baekibaeki ao ni kakae aia tabo n tekateka. Tenibwi te miniti e riki bwa te aoa; te aoa e a riki bwa uoua te aoa. A kataia n tainako ni karekea te tia tiriai ae mwaatai. Ma n aron are imwaaina, a tii karekea karukarun te ang.
Taani kibara te bubu a baaireia bwa a nang kana aia katawanou. Imwiin anne, ngke a teimatoa n aki kona ni karekea te tia tiriai ae mwaatai, a rarai aia baekibaeki ao man rawei motirawaia. A bon taonaki n te bwarannano. Ngke te tia tiriai ae mwaatai bwa e a tia n reitaki ma ngai ao n tuangiia bwa e ngaara kawaia ae a na iria, a kukurei n iira te kooti anne ao ni moana aia kekeiaki ni kauntaba te buee. Ma te tia tiriai ae mwaatai e taraa n ae e a mwaninga taekaia, tao are e a tabeakiniia tabeman. Ao a tia ni baaireia bwa a na bon aki kakammwakuri n akean ana kaeitieti te tia tiriai ae mwaatai. E ngae n anne, kaetieti akanne e a tia ni beritanaki nakoia imwaain are a baratute nako aon te taubuki.
Itiua te aoa imwiin rokoia taan kibara te bubu i taberan te tabuki, temanna ae e a kua ae te tiibi ibukiia taan tiriai mai inano riki n te maunga e waerake n toua te kawai ao ni kuneia taan kibara te bubu. E bon kubanako. E kawara aia tia kairiiri, ao e taku, “Teraa ae kam karaoia n akea te bwai ae kam karaoi iaon te tabuki? Ti bon rangi ni kainnanoa ami ibuobuoki. Te bue e bon kuri n rakanako ma iroura ibukina bwa ti aki karekea te buoka n tiringnga. Ao ni kabane n te tai aio kam a tia n akea te bwai ae kam karaoia ieta ikai iaon te taubuki?”
Te tia kairiiri irouia taan kibara te bubu e kabwarabwaraa aia kaangaanga nakon te tiibi are e roko. A tia n tuangaki kaeitieti mairoun te tia tiriai ae mwaatai. A tia n tabeakina raoi aia konamaki ni karekean kaetieti akanne. Ma te tia tiriai ae mwaatai e a tia ni mwaninga taekaia, n aki kaeka aia weewete. E koaua, a noori kawai aika bati n ruo nako naano nakon te buee. Ma a bon mwaaku bwa a rawa n toua ae bure. Ai ngai are a baaireia n tataninga ni karokoa ae a karekea kaetieti ake a tia ni beritanaki mairoun te tia tiriai ae mwaatai.
Te tiibi irouia taan tiriai e taakina baina ao n ana te reerio are e uarereke are a tia ni kamanena taan kibara te bubu. E ruorikaaki tao 50 te iaati (45 m) n toua te kawai rikaaki nakon te buee. E tei ao e katanga te reerio. Bwanaan te tia tiriai ae mwaatai e roko ni baibati ao ni maataata. E a manga waerake n oki nakon te taubuki ao ni manga ruo n toua te kawai teuana 50 te iaati riki raroana rikaaki. E toki ao e wetea te tia tiriai ae mwaatai. Ngaia riki bwanaan te tia tiriai ae mwaatai e roko ni waekoa.
Te tiibi irouia taan tiriai e rianna ni waerake n okiriia taan kibara te bubu ao e karea te tia kairiiri, n taku, “Kam mena n te tabo ae mate. Te bwai ae ko riai n tia ni karaoia bon moanna n toua teuana te kawai nako naano, ao te tia tiriai ae mwaatai e kona n tia n anganingkami kaetan ami kooti ao n nikiringkami raoi n te tabo are ti tangiringkami iai. N oneamwiina kam wenewene i karawa ikai, ao bon akea mwanenami nakoira.”
N taainako inanon kainanora ibukin kaawakinara ao kairara n te tamnei, ti kona ni kariiriaki ni karaoa ae ti te arona ma ake a karaoia taan kibara te bubu. Ti a mena n taabo aika ti aki ataia. Ti noori kawai aika bati ake a tauraoi nakoira, ao ti aki koaua bwa e ngaa ae ti na toua. Ti a tia ni beritanaki kairiiri ao ibuobuoki mairoun Tamara are i Karawa. Ma e aki n taainako n roko n te tai ae waekoa. Ti rikirake ni bwarannano ao ni baaireia bwa ti na tii tekateka ao n tataninga ni karokoa te berita ni kaawakin e roko. Ti tataninga ao ti tataninga ao ti tataninga, ao ni miiakinna bukin tera te Tia tiriai ae mwaatai mai karawa e aki buokiira ma ara kooti.
Ni karaoakina, ti aki taraa te koaua ae rangi ni kakaawaki man te kaotioti. Tamara are i Karawa e kantaningaira ni kamanenaa oin wanawanara, konabwai, ao te taneiai ni katanea ara moan kooti. Ngkai ti waaki rake iaon te kawai are ti a tia n rineia, ti a mena inanon te tabo ae rangi n tamaroa riki ni karekea kaetan kooti are iai Irouna ibukira. Ma ngkana ti a tii tekateka iaon te tabuki ao n rarai ara baekibaeki ni karokoa E anganiira kaetieti, ti a karekeira inanon te tabo are e mate iai te tamnei.
Beretitenti Boyd K. Packer, Beretitenti n te Kooram are Tengaun ma Uoman, e a tia n reireiniira:
“Ti kantaningaaki bwa ti na kamanenaa te oota ao te rabakau are e a kaman reke iroura ni mwakuriia maiura. Ti aki kainnanoa te kaotioti bwa e na tuangiira bwaai aika ti riai ni kaakaraoi ao ibukin tabera, bwa ti a tia n tuangaki ni karaoa anne are iai inanon booki aika tabu; ngke ni kaantaninga te kaotioti n onea mwiin te wanawana n tamnei ke te rabwata are ti a kaman karekea—tii ni karakaa riki. Ti riai ni waakin maiura n aron ae ti tataneiai, n arona ni katoa bong, n iiri aroaro ma babaaire ake a tautaekana maiura.
“Aroaro ao babaaire ao tuua a bongana ibukin kamanoakira. Ngke ti tangirii kaetieti aika kaotioti ni bitii ara kooti, e na tataninga irarikin te kawai ngkana ti a roko n te tabo are ti tangiria.”1
I kakoaua bwa te kairiiri ae te kabanea n tamaroa ao n itiaki e roko inanon maiura ti aki ngke ti tii tataninga Tamara are i Karawa ni kanakoa te buoka ao te kakaawakin ma ngkana ti karaoi tabera ma te aki taningaroti ma korakorara ni kabane iaon te mwakuri. Nakoimi ngkami ake kam kantaninga te Uea ibukin ana kakaawakin inanon maiumi—ake a tangira te ibuobuoki ma te babaaire ke te titiraki ae buubura— I anganingkami te kakaawenako aio: Tataroakinna ao karaurau ni kamanenaa raoi oin wanawanam ao oin kaubwaim n rinea te kawai are e taraa n eti nakoim. Ngkanne riki ni kakorakorako ni mwakuri inanon te kawai anne (taraa D&C 58:26–28). Ngkana e roko te tai ibukin kaetan ara kooti, E na mena ikekei ni buokiko ao ni kaawakiniko.
Korotamnei © Landov