Te Tamnei are Raoiroi e bon katautauaki bwa raora n taainako, ma I aki ataia bwa I namakina te Tamnei n taainako. Iai te bwai ae e bure irou?

Ngkana ko a tau ma ko aki namakina te Tamnei n taainako, e kona n nanonaki bwa ae ko bon tabe naba n rereiniko ni kina ao ni mwakuri iaon ana kakawakin te Tia Karaunano. Unimwaane David A. Bednar n te Kooram n Abotoro are Tengaun ma Uoman e kabwarabwara, “E ngae ngkai ti kakoraira n riki ni kakaonimaki ao n ongotaeka, bon iai taai ngke kairiiri ao taeka ni kakea te nano uoua, ao raun te Tamnei a aki waekoa ni kinaaki inanon maiura” (“Bwa Ti na Kona n Taainako ni Karekea Tamneina bwa e Tiku Iroura,” Riaona, Meei 2006, 29).

Ngkana ko aki ataia ngkana te Tamnei are Raoiroi e mena iroum, karekea te tai n aki kakammwakuri ao ni kakauongo. Ko kona n namakina ana mwakuri te Tamnei ni kaunganano ae e aariki man rau. Kataia ni kina te bwana ae maraara ao ni uarereke ngkana ko karaoi bwaai aika a na kaoa te Tamnei, n aron te tataro, kamatebwaiakan booki aika tabu, ke iirakin te bootaki n toa. Ngkai ko mwakuri iaon wirikiriki ao ni kataneiaiko ni kakauongo nakon teTamnei, am konabwai n ataa te kaokoro ni bwaai aika aariki, namakin aika uarereke a na rikirake n tamaroa.

Ko riai ni maiuakina te maiu ae tau ibukin te Tamnei e na tiku iroum (taraa Motiaea 2:36). Ngkana ko aki namakina ana mwakuri te Tamnei inanon maium, aio e kona n ae te kanikina ni kauring bwa ko kainnanoa te rairannano ao n tarai raoi ni karinani bwaai ake kona karaoi. Ko kona ni kaoa te Tamnei nakon maium ma te rairannano raoi, tataro, kamatebwaian booki aika tabu ao waaki aika tabeua aika a na tabekiko rake.