Rongorongo ni Kakawari n Reirei
Nakomai nakon te Tembora ao Karekei Am Kakabwaia
Kamatebwaia te karaki aio ao, n ae e angaraoi, maroroakinna ma taian tiitita ake ko kawariia. Kabonganai titiraki ni buokiko ni kakorakoraia am tiitita ao ni karaoa te Bootaki n Aine bwa iteran maium ae kakammwakuri.
Onimaki • Utu • Buokaki
Tititati, ti rangin ni kakabwaiakaki. E tei te Tia Kamaiu bwa atuun te Ekaretia aei. Ti kairaki irouia burabeti aika maiu. Iai iroura koroboki aika tabu. Ao iai ara tembora aika mwaiti ni kabuta te aonaaba are ti kona ni karekei mai iai otenanti aika riai ae a na buokiira n oki nakon Tamara are i Karawa.
Ti nako moa nakon te tembora bon ibukira. “Te kantaninga raoi ibukin te tembora,” e kabwarabwara Unimwaane Robert D. Hales kaain te Kooram n Abotoro ake Tengaun ma Uoman, “bwa e na katauraoi otenanti aika riai ibukin karietatakira n te aba n uea ae te tiretio. Otenanti n te tembora e kairiira nakon ara Tia Kamaiu ao n anganiira kakabwaia ake a roko rinanon ana Mwakuri ni Kamaiu Iesu Kristo. Tembora bon kabanea ni korakora n iuniwetiri ibukin te kamatebwai ae ataaki irouia aomata, n anganiira te atatai ao te wanawana ibukin karikan te aonaaba. Kaetieti ibukin te entaunmente e anga te kawai bwa ti na kanga ni kairii maiura n te aonaaba aei. … Iai inanon te otenanti rinanin kaetieti bwa ti na kanga ni maiu ao berita aika ti karekei ni maiuakina te raoiroi man irakin ara Tia Kamaiu.”1
Ma ara makuri n ibuobuoki n te tembora e aki toki ikai. Beretitenti Boyd K. Packer, Beretitenti n te Kooram n te Tengaun ma Uoman, e reirei: “Ngkana ko na tei ibukin temanna ae a tia n nako riaon te roki, ko na tia n rinanona imwaain te berita are ko a tia ni karaoia. Ko na tia ni kakorakora n am iango kakabwaia n tamnei ake a irekereke ma ana auti te Uea. … N te berita ae tabu ao otenanti a boboto iai kakabwaia ake ko a tia ni karekei n te tembora ae tabu.”2
Nakomai nakon te tembora ao nakomai riki. Karaoan ao kawakinan berita aika tabu n te tembora e na kateimatoaira ni kairiira nakon te kabanea ni kakawaki ni kakabwaia—te maiu are akea tokina.
Barbara Thompson, te kauoman ni kauntira n te beretitentii ae kabuta n te Bootaki n Aine.
Man Koroboki Aika A Tabu
Itaia 2:3; 1 I-Korinto 11:11; Te Kaotioti 7:13–15; Doctrine ao Covenants 109
Man Ara Rongorongo ni Kawai
Te burabeti Iotebwa Timiti e aki toki n taetae nakoia aine n te Bootaki n Aine n tain aia bootaki. N te tai are e karaoaki iai te Nauvoo Tembora, te Burabeti e tuangiia aine n te reirei, ni katuaraoia ni karekei atatai rinanon otenanti n te tembora. N te ririki 1842 e taku nakon Mercy Fielding Thompson bwa te entaunmente “e na kaotinakoko man te rootongitong nakon te oota ae kamimi.”3
E katautauaki te mwaiti ae 6,000 Aika Itiaki ni Boong Aika Kaitira ae a tia ni karekei aia otenanti n te tembora imwaain te otinako mai Nauvoo. Beretitenti Brigham Young (1801–77) e taku, “Anne e a tia n riki bwa te ingainga n nano ae kakoauaaki irouia aika itiaki ni karekei otenanti [n te tembora], ao ibukin te nano anne ao ti tauraoi n ara itera n tararuai, are I a tia n anga ngai nanou ni kabane nakon ana mwakuri te Uea n te tembora n te bong ma te ngaina, n aki kabanea ae e raka iaon aua te aoa ni matu, te tai ae tau, ni katoa bong, ao n oki nakon mweengau te taina n te wiiki.”4 Korakoran ao mwaakan berita n te tembora e kakorakoraia Aika Itiaki ngke a kitan aia kaawa ao te tembora ibukin mwanangaia nakon te tabo ae aki ataaki.
Kamatata n te tamnei iroun Athley Glori