Uoua Kaawa aika buubura ao te Nanoanga n Tangira

Tiffany Taylor Bowles, Illinois, USA

N ai aron Nauvoo, Illinois, kaawan Natchez ae buubura, i Mississippi, USA, e tei n rietaata iaon te tabuki ni kaaitara te karaanga ae te Mississippi. Aomata aika Itiaki ngkoa ake a roko mai England a aki toki n rinanon Natchez iaon kawaia ni waerake n te karaanga mai New Orleans nako Nauvoo. Te bwai ae riki, inanon 1844 te kurubu n aomata aika buakaka a kabueka te booti are e taoke i Natchez are e uotiia aika bati Aomata aika Itiaki ni Boong aika Kaitira.

Ngke I a roko i Natchez ni butimwaea te mwakuri ma te U.S. National Park Service, I karekei nano uoua ao maaku. I a tia ni katikui bwaai ni kabane aika I mweengaraoi iai ao man ataaki irou i Utah, ao ngke I a maeka inanon te kaawa ae buubura aei man boou ao ni kamiimi, I a namakina te bua ao te maroaa.

Inanon au moan bong ni kataneiai, te tia tararua are te tiubwawatia e moanna ni kairai rinanon te bwaake are e tei iai mwiin te Buaka Inanoa te auti ae buubura ao man kaota aron te kaneweaba are e tararuaaki are I kantaningaaki bwa N na kairia. N te tai are ti a bane ni matakuakina te moan burooa (floor), I a bon kaman namakina te kaangaanga irou ni kataia n uring bwaai ni kabane ake a kabwarabwaraaki. Man ana kateitei te French are e kabuta n te 18 n tienture ae bwain nanon te auti nakon te English porcelain china, te bwai ni katamaaroa n te mweenga are e a kaota kaubwain te i Maiaki i America—ao e a bon taonainako. N ataakina bwa ti na manga noora te kauoua ni burooa n te mweenga, I a bon taonaki ma te namakin ni bwarannano ao te kan oki rikaaki nakon mweengau.

Ngkai ti tabe n tamwarakea te kaintamwarake, te korobanna n te oera ae tamnein te taaun e a katika matau. I tuai man nooria mai imwaaina, ma e ngae n anne bon iai te bwai teuana ae I kinaa iai. Matau a bon katikaki nakon tamnein te kateitei ae buubura iaon te tabuki n te taaun, ao I kinaa te bwaoua are e karaoia te karaanga ni katoobibiia te kaawa ae buubura. E kona n ae te bwai are I iangoia bwa boni ngaia?

I titiraki bwa te korobanna bon tamnein Nauvoo. Au tiubwawaaitia, e kubanako n au titiraki, e kaekaai bwa bon ngaia raoi. I waekoa n ataia bwa te korobanna e a tia ni kabooaki iroun temanna te tia bwaibwai n te mweenga ibukina bwa tao a tia ni korotamneiaki inanon nuukan te 19 n tieture ao tamnein te karaanga bon te aekaki raoi are n taraan te Natchez.

Aomata aika Itiaki ake a mwananga rinanon Natchez ribuakon te bwainikirinaki a riai n tia n namakina te namakin ae korakora ibukin te bwai ae e nako mairoum ao te kakaatau ngke n tokina ao a roko i Nauvoo. N ti te arona naba, I namakina te karaunano ngke I noora te korobanna n tamnein Nauvoo inanon te auti ae buubura i Natchez. Nooran te tamnei ni korobanna e buokai n ataia bwa Tamara are i Karawa e bon ataa arou ao e na kakabwaiaai ma te korakora n tokanikai iaon uringan mweengau, te maaku, ao te nanououa. I ataia bwa te korobanna n tamnein Nauvoo bon ana nanoanga n tangira te Uea.

Ngkai ti tabe n tamwarakea te kaintamwarake, te korobanna n te oera ae tamnein te taaun e a katika matau. E kona n ae te bwai are I iangoia bwa boni ngaia?