Ngkana I a Manga Kaitiboaki ma Tariu

María Isabel Parra de Uribe, Mexico

Ngke te kairake n ataeinaine ngai, I rangi n tangiria bwa mwaaneu ae, Juan Fernando, e na biri ao n takakaro n aekaia ataei ake tabeman. Ngke I titirakina tinau bwa e aera ngkai e aki kona, e taku bwa e a tia n rootaki kaburorona n te aro ae e kaakaiaki ngke e moan bungiaki man akean te okititen ao e na bon aki kona ni karaoi bwaai akanne.

Mwaaneu e kabanea maiuina iaon ana kainiwene. Ibukina bwa I bon karikirakeaki inanon te Ekaretia, I ataia ao man butimwaea arona ao n ataa kakannaton tamneina. E ngae n anne, nanou ae kairake e tangiria bwa e na katotoongiia ataei ake tabeman, e ngae ngke I aki kona n iangoia bwa aekakira tarakina n nakonako ke ni biri ke n taetae.

I bon raraoma ibukina bwa antai ae e na tararuaia ngkana a bane ni mate kaain te utu imwaain ae mate ngaia. Inanon au tataro aika nano ao I buubutia Tamara are i Karawa bwa e na aki anaira imwaain ae E ana Juan Fernando. I ataia bwa E na kaekaai.

Mwaaneu bon 16 ngke e mate n te bwakantaai n te winta ae mwaitorotoro, ao man katikua te bwangabwanga ae rangi ni buubura n ara utu. Ti namakina te nanokawaki ma te kantaninga naba. Tabeua te bong imwiin matena, I bon matunako ao ngke I tabe n iangoia ao bon iai miiu ae rangi n tikiraoi.

I bon nakonako, ma au taratara e a kamaabubuaki n te nang. I kona n noora te bwai teuana ae raroa, ai ngaia are I a reita nakonakou nako iai. Ngke I a kaan riki, I a nooria bwa te waekon ae e onrake n te uee. Ngke I tabe n taraia, I kinaa te kairake n ataeinimwaane ae botonimwaane, ae kunnikaina n te mainaina, ae e tabe n tei n te waekon. I aki kakammwakuri n te tai anne, I kataia ni kinaa, ao ngkanne I ataia bwa bon mwaaneu. I bon rangi ni kukurei n nooria. E taetae nakoiu, ao I tangiria n rabwatia ao n arokia. Ngkanne I a uti.

I bon rangi ni kakaaitau bwa I ongo bwanaana ao n nooria ni mwarurung. I kona n ti iangoa te tai are ti na manga kaitiboaki iai. I bon kakoauaa bwa e na iai teirabwati ao te kiiti ao taeka n tangira—kakaaitau ni kabane nakon ana Mwakuri ni Kamaiu Iesu Kristo. Ibukin te Tia Kamaiu ti na bane n uti man te ruanimate ao ni bootaki bwa utu, n aki manga kamaenakoaki.

I uringa ana taeka Amureki: “Te tamnei ao te rabwata a na manga ikotaki riki n aroia ae kororaoi; bwaai ma wae ma toman te rabwata ana manga kaokaki nakon teia ni koaua” (Aramwa 11:43).

I kakaaitau ibukin kaokakin ana euangkerio Iesu Kristo, are e a uota te rau nakon tamneiu. I ataia bwa N na manga noora mwaaneu n te bong teuana.