Mi Vida, Mi Historia

Karaki n onimaki man riinga te nano mai irouia 10 Aomata aika Itiaki mai Latin America.

Aomata aika Itiaki ni Boong Aika Kaitira a tibwai aia rongorongo n rairakiia ao aia koaua n ana euangkerio Iesu Kristo n te tain te kaotibwai ae e a tibwa karaoaki n ana Miutiam te Ekaretia n Rongorongo ni kawai. N tatabeua nako a tei ibukiia mirion Aomata aika Itiaki mai Latin America.

Uabwi ma aua karaki ake a kaotaki n ana Miutiam te Ekaretia n Rongorongo ni kawai i Salt Lake City, Utah, man Tuun 2011. Kaotibwai aika mwaiti aekakiia a kona ni matakuakinaki iaon te rain n lds.org/churchhistory/museum/exhibits/mividamihistoria.

Carmen Echeverría Wood

Carmen e bungiaki inanon te utu ae taua te aro i Guatemala City, Guatemala. Ngke ai ruaiwa ana ririki, mitinare n aine man aia aro Aomata aika Itiaki ni Boong aika Kaitira a reireina ana utu te euangkerio. E unga n iriira te Buraimwarii ao e taekina namakinan te kukurei ae boou n ana utu. Teuana te ririki imwiina a bwabetitoaki ma ana utu. E taku, “Aio bon te tai ae rangi n tamaroa, moan te tamaroa.” E kauringa Beretitenti David O. McKay (1873–1970) ngke e kawara Guatemala n te ririki 1954 man reireiniia ataei tuan te kabwianibwai. Ni koron ana 17 e weteaki bwa e na nako ni mitinare n te Mition ae Central America ao e kukurei n tibwa “te kantaninga ibukin te maiu ae tamaroa riki ao ni manga bootaki n aki toki.”

Miriam Puerta Amato

Miriam bon kain Brazil. Ngke e tangiria ni kan mitinare, e kanoaa ana beebwa. Itiua te wiiki imwiina, e bootaki ma ana utu ni mwengana, e wareka te reta are e weteaki iai nako Utah Salt Lake City Tembora Tikuea Mition. E taku, “Ngke I wareka te reta, e bon kakaongora bwa au utu a takarua n aron are a karaoia ngke a e rin aia booro te tiim mai Brazil. I bon rangi ni kukurei naba, ao I ataia bwa te Uea e kanakoai.”

Nelson Mousqués

E aki maan imwiin bungiakin Nelson i Asunción, Paraguay, ana karo a kaitibo ma mitinare. “N te bong teuana tamau n ana bwaranta ni mwengana e noora Tari Higbee ao Tari Johnson ma e aki ataia ae ngaiia mitinare,” Tari Mousqués e kauringa. “E tuanga mwaneu bwa e na uotii kaintekateka uoua ibukina bwa, e kangai, ‘Mwaane akekei ana bitii maiura.’ Ngke a uboubo mitinare n te mataroa, e kaukia man taku, ‘Nakomai riin. Tia kaman tataningai ngkami.’ Tamau ao ara utu ni kabane ti kaaina te Ekaretia.”

Robin Mendoza

Robin e ikawairake i Ecuador inanon te maiu ni kainnano, ma e tangira ae tamaroa riki bon ibukina. N te taina, ngke e mwakuri n te tabo n aroka 12 te aoa n tebongina, e tataro ibukin te kairiiri, ao e iti karawa inanon ana tai n tataro. Robin e taraa aio bwa ana rongorongo te Atua bwa te maiu e taua te berita. “I ataia bwa au namakin e roko mai iroun te Atua,” e kauringa Robin. E ataia bwa rinanon te onimaki, e kona ni bita maiuna. Ngke ai 16 ana ririki e nako ni mwakuri i Guayaquil, ike e a bwabetitotaki iai. Reitinakon te ungannano e kairia nakon te Brigham Young University, ike e a kakoroa bukin ana kouru ni karekean te reirei.

Ursula Binder Brock

Titita Brock e uringa iangoan nanon te maiu ngke e kairake i Venezuela, mitinare a reireinna ma ana utu te uangkerio, ao a bwabetitoaki. A kaonaki n te onimaki, e weteaki bwa e na riki bwa te beretitenti n te Buraimwarii ngke 16 ana ririki. Ngkai, imwiin maiuna ni mwakuri, ea ataia bwa bon ibukina, “te onimaki bon te rinerine.” E kabwarabwaraa, “I rineia ni karekea te ruu ibukin te Tia Kamaiu inanon maiu. Ia ataia bwa te Mwakuri ni Kamaiu bon moan te kamiimi, te mwakuri n tangira ibukiia aomata ni kabane. Au Tia Kamaiu ao te Tia Kabooai, te Tia Angangaa te rau, ea tia n riki bwa raraou—e teimatoa ibukiu.”

Lincoln Peters

Lincoln e maeka ma ana utu i Santiago, Chile, ni karokoa e mate tinana ngke ea koro 10 ana ririki. Imwiina, e maeka ma ai tinana ao ai tamana. Ngke ai 18 ana ririki Lincoln, Tari Barton ao Tari Bentley a kawariia ai tinana ao ai tamana ni mwengaia. A waekoa ni butimwaea te euangkerio ai tinana ao tibuna te unaine, ma Lincoln e totokoia mitinare. Ingabongin te Tabati teuana, tibuna te unaine are e tataneiai n roko ni karaurau inanon ana ruu, e burita rabunan ana kainiwene, ao e tuanga bwa e na iriia n nako n taromauri. E bon rangi n tounako ni katein tibuna ae aki taneiai iai ao ibukin karineana, I teirake ao n nako n taromauri. N te bong anne e namakina te bwai ae e boou ao e korakora inanona are e bita maiuna. E waekoa n riki ngaia bwa temanna te moan rairaki i Chile.

Luis ao Karla Hernández

Luis ao Karla a kaitibo ngke kairake i Honduras. A waaki ni mamaroro ao a waekoa ni mareaki. Luis, tiaki te membwa n te Ekaretia, e mataiakiniia ana karo Karla, ake a “ikarinerine imarenaia ao n itangitangiri ao aio te bwai ae e karikai ni kan reiakina anuaia.” N te tai ae e waekoa e a bwabetitoaki, ao Karla ma Luis a kabaeaki n te Guatemala City Tembora i Guatemala. N aia 30 n ririki ni mare a rootaki n te kanganga, ao Karla e kiitana mwengana, ma te titiraki ngkana aia iein n roroia ae tebwitabun e kairua. Luis e aki mamatam ao e tataro ni bubutiia te Atua ni “kaira Karla n okira mwengana, ao E bon oki. E bon oki.” N te bong aei aia iein e a korakora riki nakon are mai imwaina.

Noemí Guzman de Abrea

Noemí e bungiaki i Argentina, n te tabo are a kaina iai te Ekaretia ana utu. A mwananga nakon te United States ngke ai tebwitabun ana ririki. Ngke e karekea tangiran rikina n I-Amerika, e rangi ni kukurei ngkai e kona n rinanon te katei n Argentina. “I Latin America, aomata a bon rangi n tatangira. A waekoa ni kariniko; n iraorao nakoim; ni karekea te reitaki ma ngkoe. A tatangiria ni mena irarikiia aia utu ao raraoia, n amwarake aika raraoi. Aio e bon tikiraoi, ao ataakin te katei anne bon te bwai teuana ae I aki kan bitaki ibukin te bwai teuana.”

Omar Canals

I Uruguay n te ririki 1948, tinan Omar e anganiia mitinare aine te kiaba n aia aro Aomata aika Itiaki Ni Boong Aika Kaitira. N tokina, e a waaki ni maroroo ma mitinare, ao tarin Omar te ikawai ea bwabetitoaki imwiina. E bungiaki n 1948, Omar bon te moan merimeri ni kakabwaiaaki n te Mition i Uruguay, are e a tia n uki n 1947. Omar ao ana karo a bwabetitoaki ngke ai waniua ana ririki. Tabeua te ririki imwiina Omar e mareaki ma ana tangira, a mwananga nakon te United States. E a tia n riki bwa te tia kanakobwanaa, Omar e kateirakeaki iroun te Ekaretia n 1973 ao e riki bwa te tia raitaeka n te taetae n Tibaeniti ibukin maungatabu ni kabuta.

Tamnei iroun Mark J. Davis, Craig Dimond, Kent Miles, ao Craig J. Law