Te Ririki Aei Bon te Uteute—Koutia

Iroun Mont Poulsen

Ngke I ikawairake i Lehi, Utah, USA, au utu iai aia onaroka ae bon tau buburana are tia kabubutia n unika te koon ao buteeta ni katoa ririki. N te bong teuana e a tuangai tamau bwa N na kouta te koon ngkai e tabe ni koubuteeta. Ngke I tabe ni waaki iaon te rinan ni koon are I mwakuri iaona n te abwaki ae onoua te inti rietana (15 te tientemiita), I a kunea te aroka te buteeta ae rikirake ni bubura n tionako ao n rangin raka tamaroana nakon aroka buteeta ake n iteran ana onaroka Tamau. I weteia ao n titirakinna, “Tera ae N na karaoia ma aei?”

E aki bati n tararake Tamau, “Koutia.”

Ni koauana bwa e aki nooria are I kotokoto nakon te aroka are te buteeta, I aki kariaia, “Ma Tamau, tiaki te uteute. Bon te buteeta.” N aki tararake, e a manga taku riki, “Tiaki te ririki aei. Te ririki aei te tai ni kouteute. Koutia.” Ngaiare I a karaoia.

Man te tai anne I a tia n aki toki n iangoa raoi wanawanan ana taeka tamau. I ataia bwa te ongeaba tiaki tii karaoan te rinerine ae eti ma karaoan te rinerine ae eti n te tai ae eti. Ngkana I iangoi bwaai ni kabane are e na anganai Tamara are i Karawa bwa N na karaoia n te maiu aei, karaoakiia n te tai ae eti e taraa ni kanganga n aron karaoakiia ni kabane. N aron te katotoo, karaoan te mwakuri ni mitinare, te maroro ni kareke tangira, te mare, karikakiia naati, karekean te reirei, ao moanakin te mwakuri ae bwanin taina bon rinerine aika eti. Irarikin anne ngkana aomata a karaoi bwaai aika tamaroa aikai n aroia ae kairua, a na karika te kanganga mwiina.

Te Uea ae Beniamina e reireiniira bwa ti na riai n“taraia bwa … bwaai a riai ni karaoaki n te wanawana ao n aroia” (Motiaea 4:27). Unimwaane Neal A. Maxwell (1926–2004) man te Kooram n te Tengaun ma Uoman n Abotoro a reireiniira, Te onimaki naba e kainnanoa te kakoaua n ana tai te Atua, bwa E taku, bwaai ni kabane a na kakoroaki bukiia n aia tai (taraa D&C 64:32).¹

I kakoaua bwa Tatan e mwamwanaira man anakin nanora ni karaoi bwaai aika eti n aroia aika kairua: wene ni bure imwaain te mare, maroro ni kareke tangira imwaain koron 16 te ririki, ni moantaai n riki bwa kaaro ao imwiina aitibwa te mare, ao a mwaiti riki. Ana tua te Atua aika korakora, ngkana a karaoaki n te boraraoi ke a kabaarekaki, n riki bwa aroka aika rikirake n te tai n—kouteute. Ngkana I a tia ni kaririiaki bwa Nna kabwarabwarai bukin karaoan bwaai aika eti n te tai ae kairua, I bon kakaitau n ana reirei tamau ae kakaawaki: “Tiaki n te ririki aei. Te ririki aei bon te tai ni kouteute. Koutia.”