Tii Teimatoa n Uaua
Monica Saili ae tebwi ma uoua ana ririki ni maiu e bane nanona n te uaua. Boni ngaia temanna mai ibuakoia kairake aika taan uaua ae e totokanikai i New Zealand. Neienne e kona n ae iai ana itera n iika.
E raoiroi, ana itera n iika e bon aki koaua. Ma kabwarabwarana teuana bwa ibukin tera ngkai e rangin tamaroa ibukina ngkai e rangin kataneiai mwaaka.
E memena n te tabo n tebotebo inanon uoua te aoa ni katoa Moanibong, Katenibong, ao moaningabongin te Kanimabong n te aoa 5:00 n te ingabong. N te Kauabong, Kabong, ao n te Kaonobong e karaoi taian biri aika uarereke ke biri aika ananau imwiin te reirei.
Ana kabane n uaua ae mamate nanona iai bon te butterfly stroke ma angan baina ae ti teaina, teimatoa n tabekarake bwangena, ao rairakin angan baina ni katoa 100 te miita. “Ana bon buee angam,” e taetae.
Ma e reiakinna bwa ngkana e kanganga te mwananga, te taenikai e bon aki kabebetea aron te maiu. Karaoan te mwakuri ae matoatoa bon te bwai ae e karika korakorana.
Mwakuri Korakora ao Taai aika Matoatoa
Ni kabane mwakuri aika matoatoa a bon ibuobuoki. E moanna ni karekei kaniwanga aika meetera ngke e koro 10 ana ririki. N ana ka 11 n ririki e reke ibuakon te katengaun n tokanikai n te aba ibuakoia ana kurubu n roro n te uaua ae n te butterfly stroke. Ngke ai te 12 ana ririki ni maiu e rineaki ibukin te kaembwa ni karikirake ibukin te uaua man te tiim n te aba ao e rineaki bwa e na uaua n te Oceania Games i Samoa ni kaitaraia taan uaua man aaba tabeua.
E taku, “Tamau e aki toki n taekinna, ‘Te tokanikai e reke man te mwakuri korakora. E aki n ae e a tii roko naba n akea te kekeiaki.’”
E reiakinna Monica bwa e koaua ibukin te uaua, ao e kunea bwa e koaua naba inanon te maiu ngke e mate tamana n ae aki kantaningaki tabeua te namwakaina imwiin koron ana ka te 11 n ririki.
“I bon rangin kaan ma tamau,” E taku Monica. “E reireinai te uaua. E ninikirai n au tabo ni kataneiai ao n takakaro ni kaboo. Ngke e mate, I namakinna bwa ai akea ae N na taetae nakoina.”
Tai Kabwara Nanom
Buan tamana e bon matoatoa. Ma e aki bwara nanon Monica inanon taai ni kataneiai aika matoatoa, ngaiare ngke e mate tamana, e bon aki bwara nanona n ana onimaki naba iroun Tamara are i Karawa.
“Tamau bon te banna ni katotoo, e taku. “E reireinai bwa N na kanga ni maiuakina te euangkerio.”
N tain matena Monica e a moanna ni kamatebwai koroboki aika tabu imwaain matuna, “ni kataia ni karaoia bwa kateina,” e taekinna. E tei ibukin ana koaua n te reirei. “I karekei titiraki aika mwaiti n rongorongon te Ekaretia,” e taekinna. Ao e beku n riki bwa te tia kairiri ngaia n te katangitang n te uoote.
“I bon kakabwaiaki n riki bwa te membwa,” E taku Monica. “I bon anganaki te raunnano ngkana I taonaki n te kanganga.”
Te Korakora n te Kabane
Monica e teimatoa n ururinga tamana. Ma n ana boutoka tinana ao ana utu, e teimatoa ni waaki nako.
Maiuna e riki ngaia bwa te tia katangitang ae bane arona iaon te biaano ao te waeoriin, bowi ni kauntira ibukiia ataein te reirei, uaua, Rikirakem ibon Iroum, ao kairan te anene n tain te bootaki n toa.
E tuai raoi n ataia bwa e uara ana kekeiaki ao maanra n teimatoa iaona. Ma n aron ae kantaningaki n te euangkerio, e teimatoa n tiku bwa ngaia te tia mwakuri ni karokoa te toki.
“N taai tabetai e bon matotoa te maiu,” E taku Monica. “Ma karaoan bwaai aika matotoa e kona ni karikiira bwa ti na korakora. Ko riai n tii teimatoa n uaua.”
Tamnei iroun Adam C. Olson