O Se Konafesi Aoao mo Na o A’u Lava
O le mea sa ma fetaia’i sa taufaafefe, peitai na silafia a’u e le Tama Faalelagi i le faaiuga o lena vaiaso muamua o Oketopa.
Sa ou ola ae i se aiga lea e avea konafesi aoao ma se vaega sili ona tulimatai atu i ai e pei o se aso malolo. Ou te manatua ao ou laitiiti le tuuina mai o se gaoioiga a le Aoga Sa e faafetaui ia ata o le Au Pulega Aoao ma taimi e faaali mai ai i luga o le televise ao latou lauga mai i le taimi o le konafesi. Ina ua oo ina ou matua, sa ou aoao e matau na Uso Taitai e le na o o latou foliga ae faapea foi i o latou leo ma savali e tuuina mai. I le avea ai ma se tasi e tausaga muamua i le iunivesite, sa ou fiafia lava ina ua valaaulia le matou aufaipese a le inisitituti o mataupu faalelotu e pepese i se sauniga o le konafesi i le Tapeneko. I se faapuupuuga, e oo atu i le 20 o ou tausaga ua leva ona ou maua se lagona faapitoa e uiga i faaiuga o na vaiaso muamua o Aperila ma Oketopa i tausaga taitasi.
Peitai ou te lei aoao lava i le auala e matuai patino ai lava le konafesi aoao. Sa maua e la matou siteki ni pepa ulufale mo le sauniga aoao o le Aualofa ia Setema 2008 i le Nofoaga Autu mo Konafesi. Sa ou naunau lava e feofeoai ma tamaitai o la matou siteki, tulimatai atu i musika ma lauga musuia, ma e faapitoa le agaga lotomaulalo e mafaufau ai o le a matou faalogo i se savali mai ia Peresitene Dieter F. Uchtdorf, Fesoasoani Lua i le Au Peresitene Sili. Sa ou faalogo ma le naunautai i upu uma, tusi ma le malosi ni faamatalaga, ma tautino atu o le a faatinoina mea na tuuina mai tatou te faia. Sa ou lagona o se amataga matagofie lea mo sauniga aoao o le a mulimuli mai i le faaiuga o le vaiaso o le a sosoo ai.
Ona olopalaina lea o lo’u lalolagi. Ao ou faigaluega i le Aso Toonai na sosoo ai, sa ou mauaina se valaau mai le telefoni mai la’u fomai e ta’u mai ai o suesuega na faia mo a’u i le vaiaso ua te’a ua faailoa mai ai o le kanesa.
O aso na sosoo ai sa avea lea o ni lagona o le le mautonu, atuatuvale, popole, faanoanoa, leai se faamoemoe, ma le tiga. Sa ou aafia i le tele o lagona ma na le mafai ai ona maua se moe ma e le matu le tafe ifo o ou loimata. Ou te lei lagonaina lava muamua se fefe tele.
Ina ua oo i le taeao o le Aso Toonai, sa ou fuafua e faalogo i le konafesi ao faia nisi galuega. O lou le malolo, sa ou faamoemoe ai, o le a fesoasoani lea e taulai ese atu ai lo’u mafaufau mai o’u luitau. Peitai sa ou tuuina i lalo le tagamea ma tuu ai pea ipu i le faatanoa fufulu ipu ae ou sioa atu i le televise. Toeitiiti lava a misi le tata o lo’u fatu ina ua amata e Elder L. Tom Perry o le Korama a Aposetolo e Toasefululua le sauniga muamua i lana faamatalaga faapea: “E le mafai ona tatou valoia tauiviga uma ma afā o le olaga, e oo lava i mea ua lalata mai, ae o i tatou, i le avea ai o ni tagata o le faatuatua ma le faamoemoe, ua iloa e aunoa ma se masalosalo e moni le talalelei a Iesu Keriso, ma e le i oo mai mea silisili.”1
Sa ou mafaufau, e mautinoa lava, o le autu o le a sosoo ai e faatatau lea i le ola mama po o le aso Sapati. Peitai o savali taitasi na sosoo ai na faatatau foi i le faamoemoe i taimi o tofotofoga!
O le Aso Sa o se aso filemu e tuufaatasi ai lo matou aiga i le tatalo ma le anapogi ona o a’u. Sa faaauau pea ona ou faalogo i upu o le faamoemoe e pei foi ona sa ou faalogo i ai i le aso ua tea, faatasi ai ma se savali faaiu malosi i le aoauli mai ia Elder Quentin L. Cook o le Korama a Aposetolo e Toasefululua: “Ou te molimau atu o le Togiola a Iesu Keriso ua aofia ai tofotofoga ma faigata uma o le a oo i ai soo se tasi o i tatou i lenei olaga,” o lana saunoaga lea. “I taimi tatou te lagonaina ai le fia faapea atu, ‘E faamoemoe ua e silafia, sa ou oo i se taimi sili ona faigata,’ ia tatou mautinoa o loo i ai o Ia iina, ma o loo tatou saogalemu i Ona aao agaalofa.”2
Masalo o le anapogi po o tatalo pe ua na o so’u lava tulaga faaalia lotomaulalo, ae mai lava i le amataga seia oo i le faaiuga, sa ou lagona le pei o sa’u lava konafesi aoao patino ma e toatasi le tagata maimoa.
O aso, vaiaso, ma masina na sosoo ai na oo mai ai le tele o luitau ao ou feagai ai ma suesuega, taotoga, togafitiga i le leisa ma masini faaonapo nei. Maimau pe ana mafai ona ou fai atu ou te lei lagonaina muamua lava le faanoanoa i lena 12 masina. Ae na ou lagonaina. Peitai i lena vaitaimi, sa ou lagonaina foi le lagolagoina e ala i tatalo ma anapogi a le uarota ma tagata o le aiga, faamanuiaga faaleperisitua na tuuina mai e lo’u tama, ma le faatuatua o lo’u tina. Sa ou faitauina atoa le Tusi a Mamona i nai masina muamua o ou togafitiga, ma le iloaina o le a oo mai le faamafanafanaga e ala mai i le afioga a le Atua.
Ae peitai o aso sili ona pogisa, e masani ai ona ou tago i la’u kopi masaesae o le Liahona ia Novema 2008 ma toe faitau na upu lea na sau mai se Tama alofa e ala mai i auauna musuia ma e tuusao mai lava i lo’u loto atuatuvale. Sa ou ofo i le fasi fuaitau lea ou te lei manatuaina o saunoa i ai Peresitene Thomas S. Monson i lana saunoaga amata: “Ua silafia e lo tatou Tama Faalelagi i tatou taitoatasi ma mea tatou te manaomia. Ia faatumulia i tatou i Lona Agaga a o tatou auai i taualumaga o lenei Konafesi Aoao Lona 178 Faaleafatausaga.”3
Sa ou mauaina se molimau o lena upumoni. Sa silafia a’u e le Tama Faalelagi i le faaiuga o lena vaiaso ia Oketopa. Sa Ia silafia lo’u manaomia o le faamoemoe i Lona alofa ma le faamoemoe i Lana fuafuaga mo a’u. Sa Ia saunoa mai ma sa ou faalogo.
Ata na tusia e Dilleen Marsh