Atong mga Panimalay, Atong mga Pamilya

Pag-ugmad sa Akong Mahangturong Kaminyoon

Ni Rosana Pontes Barbosa Neves

Sa dihang tin-edyer pa ko, nakapalambo ko og pagtuo nga ang kaminyoon mahimong usa ka talagsaon ug mahangturong kasinatian. Lisud alang kanako nga kanunayng motuo, bisan pa niana, tungod kay ang mga ehemplo sa kaminyoon nga akong nadak-an dili lig-on, ug adunay nagpahipi nga kahadlok sa akong kasingkasing kabahin sa kaminyoon. Apan akong natino nga ang kapakyas ug kawalay kalipay kinahanglang dili mao ang mopatigbabaw ug nga ang Langitnong Amahan motabang kanako nga masayud kon unsaon pagbaton og malipayong kaminyoon.

Sa dihang nag-edad ko og 26, naminyo ko ni Sidnei didto sa Templo sa São Paulo Brazil. Samtang nag-date pa kami, naningkamot kami sa pag-andam sa among kaugalingon sa espirituhanon ug sa emosyonal nga paagi alang sa labing mahinungdanong panghitabo sa among kinabuhi. Midesisyon kami kon unsa nga matang sa kaminyoon ang among gusto, dungan kaming naghimo og mga tumong, ug nag-ambitay kami sa among mga hunahuna—among mga pagpamatuod sa ebanghelyo, among mga pangandoy ug mga kabalaka, ug among mga damgo. Gibasa usab namo og dungan ang tambag sa mga propeta kalabut sa kaminyoon. Gihimo namo ang tanan kutob sa among mahimo aron sa pagpangandam, naglaum sa paghatag og kalipay ug seguridad ngadto sa usag usa ug sa among umaabut nga mga anak. Nangamuyo kami sa Ginoo sa paghatag kanamo og kaalam sa pagpuyo og usa ka malipayong kinabuhi.

Karon minyo na kami sulod sa 18 ka tuig. Niining mga tuiga, nagpadayon kami sa pagkat-on gikan sa mga lagda sa ebanghelyo, sa mga tambag sa among mga lider, ug, siyempre, sa Espiritu. Pipila sa mga butang nga among gihimo aron makabaton og lig-on, malipayon nga kaminyoon mao:

1. Mag-ampo og dungan matag adlaw. Kon mag-ampo kami inigka gabii, magpasalamat kami sa Langitnong Amahan alang sa among kaminyoon, alang sa gugma nga kami aduna alang sa usag usa, ug mangamuyo kami nga ang among mga pagbati molig-on ug nga kami mahimong lig-on sa tagsa-tagsa sa higayon nga makasugat sa mga pagpanglingla sa yawa, kinsa nagtrabaho aron sa pagbungkag sa mga pamilya.

2. Mangayo og pasaylo. Among gipaningkamutan nga dili tugutan ang garbo nga mobabag kanamo sa pagpangayo og pasaylo o pag-angkon nga kami nasayop. Ang gugma ug panaghiusa mas importante kay sa kinsa ang sakto o kinsa ang sayop.

3. Dili gayud mosulti og dautan kabahin sa usag usa. Klaro kaayo nga walay usa kanamo ang perpekto, apan dili kami mosulti og bati nga mga butang mahitungod sa usag usa, ug kon kauban namo ang ubang mga tawo, mosulti kami og positibo kalabut sa usag usa.

4. Manalipod sa institusyon sa kaminyoon. Bisan kanus-a nga kami adunay higayon—ug ilabi na kon kami kauban sa mga tawo nga misaway sa institusyon sa kaminyoon—kami mobarug alang sa mga pamilya ug sa among gituohan.

5. Magsige og istoryahanay ug maminaw. Among hunongon ang among gibuhat aron maminaw og maayo kon ang usa ka tawo nag-istorya.

6. Magtagad sa usag usa uban sa gugma ug konsiderasyon. Dili kami moinsulto, mopasangil, o mosaway sa usag usa.

7. Magpadayon sa pagtinguha og tabang ug tambag mahitungod sa kaminyoon gikan sa mga kasulatan ug sa mga pulong sa moderno nga mga propeta. Wala kami masayud sa tanan. Dili kami perpekto ug adunay kalagmitan nga makalimot ug makahimo og mga sayop. Among pilion nga dili maghulat sa mga problema nga mosakit kanamo, kondili maningkamot kami sa pag-ugmad og lig-ong kaminyoon sa dili pa ang usa ka sitwasyon makapasakit kanamo.

Kining mga butanga nahimong mahinungdanon sa pagpalig-on sa relasyon tali sa akong bana ug kanako. Nasayud ko nga kon atong ipakigbahin ang atong kinabuhi ug atong mga pagbati ngadto sa Langitnong Amahan ug mangayo og tambag gikan Kaniya, ang Espiritu Santo modasig kanato ug kita mahimong usa ka mahangturong pamilya, nagbuntog sa tanang lisud nga mga panahon. Nasayud usab kami nga ang Langitnong Amahan motabang kanato samtang kita nagtinguha nga masayud ug mobuhat sa Iyang kabubut-on.

Malampuson nga mga Kaminyoon

“Malampuson nga mga kaminyoon ug mga pamilya natukod ug napadayon diha sa mga baruganan sa hugot nga pagtuo, pag-ampo, paghinulsol, pagpasaylo, pagtahud, gugma, kalooy, buhat ug maayong makalingaw nga mga kalihokan.”

“Ang Pamilya: Usa ka Pamahayag ngadto sa Kalibutan,” Liahona, Nob. 2010, 129.

Kaminyoon diha sa Plano sa Langitnong Amahan

“Samtang ang bana ug asawa magpaduol sa Ginoo (tan-awa sa 3 Nephi 27:14), samtang sila nagkat-on sa pag-alagad ug pagmahal sa usag usa, samtang sila nag-ambitay sa mga kasinatian sa kinabuhi ug nagtubo og dungan ug mahimong usa, ug samtang sila mapanalanginan pinaagi sa paghiusa sa ilang managlahi nga mga kinaiyahan, magsugod sila sa pagkakita sa katumanan nga gitinguha sa atong Langitnong Amahan alang sa Iyang mga anak. Ang hingpit nga kalipay, nga mao gayud ang tumong sa plano sa Amahan, madawat pinaagi sa paghimo ug pagtahud sa mahangturong mga pakigsaad sa kaminyoon.”

Elder David A. Bednar sa Korum sa Napulog Duha ka mga Apostoles, “Ang Kaminyoon Mahinungdanon sa Iyang Mahangturong Plano,” Liahona, Hunyo 2006, 54.

Paghulagway sa litrato pinaagi ni Laureni Fochetto